Maariko 11

Yëësu araturungʼanwa Yërusarëëmu kya omokama

(Mataayo 21:1-11; Ruuka 19:28-40; Yohana 12:12-19)

1Hano Yëësu na abheegha abhaaye bhaahikirë haangʼë na Yërusarëëmu, mu-bhishishi ibhya Bhetifaghe na Bhetania, haangʼë na inguku iya Ëmëzëituuni, Yëësu akatoma abheegha abhaaye bhabhërë. 2Akabhatëëbhya igha, “Moghende mu-kishishi kiyö kërëngë mbere hayö, hano moraasohe-mo, moraamaahe ekeghaini ikya itikërë kisibhirwë, keno ketakaaikarëëywë na ömöntö. Moketashore mokendeetere. 3Nyoore ömöntö wowonswe igho nabhabhöörya igha, ‘N-kwakë mokokora igho?’ mömötëëbhi igha, ‘Omonene arakituna, naraamare akikyöri.’#11:3 Maaha mo-ketabho ikya Zakaria 9:9. ”

4Mbe bhakaghya, bhakanyoora ekeghaini ikya itikërë këbhöhirwë kebhara, haangʼë na ekesaku ikya inyumba, mbareka iya enshera enene, bhakaketashora. 5Abhantö nyabhorebhe bhano bhaarenga bhaimërëëyë hayö, bhakabhabhöörya igha, “Bhëënyu! N-kwakë mokotashora ekeghaini ikya itikërë kiyö?” 6Abheegha bhayö bhakabhahonshora kya bhoora Yëësu yaabhatëëbhëri. Mbe, abhantö bhayö bhakabhaikërërrya bhagheghe itikërë iyö. 7Bhakakeherra Yëësu, ekeghaini ikya itikërë kiyö, bhakaarya-ko singibho isyabho. Yëësu akariina-ko, akaikara. 8Abhantö bhano bhaarë ko-roghendo urwa ukughya Yërusarëëmu, bhakatandeka singibho isyabho ko-nshera, abhandë bhakagheesha amasagharya agha ëmëtë mö-mëghöndö, bhakaarya ko-nshera. 9Abhantö abhandë bhaarenga bhatangatirë, na abhandë bhaarwanga nyuma Yëësu. Bhonswe igho, bhaasherranga bharaghamba igha,

“Hosana!#11:9a Hosana. Ne-ngʼana iya Ikiyunaani. Kare hayö ensonga iyaaryo yaarenga Töörya handë Tötööri, kasi ko-nkaagha iya Yëësu, engʼana iyö yaamanyekaini igha n-kituri ikya ukwörökya igha ömöntö uyö angʼöörrwë, ku bhuyö bharamukumya.

Waryobha akongʼoore ono ukuusha okohetera iriina irya Omonene Waryobha!#11:9b Maaha mo-ketabho ikya Zabhuri 118:25-26.

10Obhokama ubhwa ghuuka uwëëtö Daudi bhono bhukuusha, bhongʼoorwe!

Waryobha uwa mu-ryobha akumibhwi!”

11Yëësu akasoha Yërusarëëmu, akaheterrania këmwë, akaghya mu-risengerro irya Waryobha.#11:11 Risengerro irya Waryobha. Maaha mo-faharaasa. Akaitaaha bhuuya ëbhëntö bhyonswe igho bheno bhyaarë hayö. Kasi okanyoora omoghoroobha ghuhikirë, ku bhuyö akatanora hamwë na abheegha abhaaye ikömi na bhabhërë, akaghya Bhetania.

Yëësu araihiima umutiini ghono ghotakwama

(Mataayo 21:18-19)

12Hano bhwaakëëyë, Yëësu na abheegha abhaaye bhakarwa Bhetania, bhakaghya Yërusarëëmu, akaighwa asëngëëyë. 13Akërëngë hare, akamaaha ömötë ughwa umutiini ghunyërëghëtirë. Akaghuhika haangʼë, okore amaahe-ko hanga sitiini seeko. Hano yaahikirë, akanyoora sitiini teseeko hë, na-matö agheene ghaishööyë-ko, ko bhoora enkaagha iya ukwama tewanyöörrë eraabha hë. 14Mbe, akatëëbhya ömötë ghuyö igha, “Ukurwa urusikö urwa reero na amakora ghonswe igho, otakaasha ukwama sehagho.”#11:14 Ukurwa urusikö urwa reero na amakora ghonswe igho, otakaasha ukwama sehagho. Yëësu yaaihiimirë umutiini, ukwörökya kya bhono Waryobha arishibhya Abhayahudi, ko bhoora bhataarë na sehagho isya eteemo inshiiya. Abheegha abhaaye bhakaighwa amangʼana ghayö.

Yëësu ararughya abhaköri abha ibhyasharamo-bhogho ubhwa risengerro

(Mataayo 21:12-17; Ruuka 19:45-48; Yohana 2:13-22)

15Mbe, hano bhaahikirë Yërusarëëmu, Yëësu akasoha mo-bhogho ubhwa risengerro irya Waryobha. Akasimya ökökënyia abhantö bhano bhaaghöryanga na bhano bhaaghoranga-mo ëbhëntö. Akahenora semeeza isya bhano bhaaswënianga seehera. Akahenora na ibhitumbë ibhya bhano bhaaghöryanga ibhighuuti. 16Kora tiyaikërëëyi igha, ömöntö wowonswe igho ono aghëghirë ëkëntö kyokyonswe igho ikya ököghörya, ahete nakyo mo-bhogho ubhwa risengerro irya Waryobha.

17Hano Yëësu yaamarrë, akabhëëghya igha, “Kasi tiyandëkirwë mo-Maandeko Amahörëëru igha, ‘Risengerro iryane, nderaabhe ahasë aha amasabhi ko-bhantö abha ibhyaro bhonswe igho’?#11:17a Maaha mo-ketabho ikya Isaaya 56:7. Kasi bhoono bhëënyu mörëkörrë kya ‘risana irya abhasaki!’#11:17b Maaha mo-ketabho ikya Yeremia 7:11.”

18Hano abhanene abha abhasëngëri abha Waryobha na abhëëghya abha amaraghërryö agha Mosa bhaaighuurë amangʼana ghayö, bhakasimya ukutuna enshera iya ukumwita, ko bhoora mbaamwöbhöhirë. Abhantö bhonswe igho, mbaaröghööribhwanga na amëëghyö agha Yëësu. 19Hano omoghoroobha ghwaahikirë, Yëësu na abheegha abhaaye bhakatanora ukurwa mu-mughi muyö.

Okosabha ukwa umukumo ku-Waryobha

(Mataayo 21:20-22)

20Mbe, nyinkyo iyaako hano bhaakyoranga mu-mughi ughwa Yërusarëëmu, mbaanyöörrë ömötë ughwa umutiini ghoora, ghwömirë törö kora imiri. 21Peetero akahiita amangʼana ghano Yëësu yaaghambirë, akamötëëbhya igha, “Raabhi, tamaaha! Umutiini ghono waaihiimirë, ghwömirë!”

22Yëësu akabhatëëbhya igha, “Mukuminga Waryobha. 23No-bhoheene nkobhatëëbhya igha, hano ömöntö araakumi engʼana igha neraabhe, ange okobha na entarëki mo-nkoro iyaaye, reno araasabhe nderaabhe. Ömöntö uyö aratora ökötëëbhya inguku eno igha, ‘Iheka wirekere mu-nyansha,’ na ni-igho eraabhe. 24Ku bhuyö ndabhatëëbhya igha, hano mwasaasaama na okosabha kyokyonswe keera, mukuminga igha, mukinyöörrë, hayö ho moraakinyoore. 25Kasi hano wanyoora morasabha, mwabherenga kera ömöntö ono ukunyoora abhasarëëyi engʼana nyabhorebhe. Ho kora na Suwëënyu uwa mu-ryobha wonswe araabhaabhere obhosarya ubhwënyu. [26Kasi hano motaabherenga abhandë, Suwëënyu uwa mu-ryobha wonswe, tabhaabhere obhosarya ubhwënyu hë.]#11:26 Amangʼana ghano gharëngë mo-bhebhandërryö kya bheno […] ni-igha, tegharëngë mo-senakara isyëndë isya Ikiyunaani.”

Yëësu arabhööribhwa hano yaaruusya ubhwera ubhwaye

(Mataayo 21:23-27; Ruuka 20:1-8)

27Mbe, Yëësu na abheegha abhaaye ghwiki bhakahika Yërusarëëmu. Hano bhaaghendanga mu-risengerro irya Waryobha, abhanene abha abhasëngëri abha Waryobha, abhëëghya abha amaraghërryö agha Mosa, bheena abhaghaaka abha Ikiyahudi, bhakaghya ku-Yëësu. 28Bhakamöbhöörya igha, “Amangʼana ghano okokora, m-bwera kë okoghakorra? N-nawë yaakohaana ubhwera ubhwa okokora ghayö?”

29Yëësu akabhahonshora igha, “Tigha öni wonswe mbabhööri-ko engʼana. Hano moraahonshore engʼana iyö, öni wonswe nendaabhatëëbhi, hano naaruusya ubhwera bhono. 30Ubhwera ubhwa Yohana ubhwa okobhatiisya abhantö, hai yaabhuruusiri? Nku-Waryobha, kasi nko-bhantö? Monhonshore twighwe!”

31Bhakabhoorania abheene ko abheene igha, “Hano toraaghambe igha, nku-Waryobha bhwaaruurë, naraatöbhööri igha, ‘Ndarra mbe temwamukumiri hë?’ 32Na hano toraaghambe igha, ‘Nko-bhantö bhwaaruurë, abhantö mbatorererra.’” Bhoobhohanga abhantö, ko bhoora abhantö bhonswe igho, mbaakumiri igha, Yohana nö-mörööti uwa Waryobha yaarë. 33Mbe, bhakahonshora Yëësu igha, “Tetomanyirë hë.”

Yëësu wonswe akabhatëëbhya igha, “Kora öni wonswe, tembatëëbhi hano naaruusya ubhwera ubhwa okokora amangʼana ghano.”

Currently Selected:

Maariko 11: ssc

Highlight

Copy