Maariko 10

Amangʼana agha öbhötëti na ëmböröri

(Mataayo 19:1-12; Ruuka 16:18)

1Mbe, Yëësu na abheegha abhaaye bhakatanora ukurwa Kaperenaumu, bhakaghya mo-mokowa ughwa Yudea. Hano bhaamarrë, bhakaamboka, bhakaghya humbu iya omooro ughwa Yorodani. Ghwiki amakomo agha abhantö abhaaru, ghakamotoora ghatë. Akabha arabhëëghya kya bhoora eteemo iyaaye yaarë.

2Mbe, ho urusikö nyabhorebhe Abhafarisaayo bhaaishirë okore bhamushaashi. Bhakamöbhöörya igha, “Umushaasha araikërërribhwa na imighiro ighya Waryobha igha abhorre mokaaye?”

3Yëësu akabhahonshora igha, “Iyakë Mosa yaabharaghërrëëyi?”

4Bhakamohonshora igha, “Mosa yaaikërëëyi igha, umushaasha aratora ukwandekera mokaaye ritashandighi irya ëmböröri, atighane nawe.”#10:4 Maaha mo-ketabho ikya Eheetoko iya Etoraati 24:1.

5Ho Yëësu yaamarrë akabhatëëbhya igha, “Mosa yaabhandëkëëyë igho, ko okoghera iya emetwe ëmëköngʼu gheno moonaghyo. 6Kasi ukurwa bhosemoka hano Waryobha yaabhömbirë ekebhara keno, yaabhömbirë omokari na umushaasha,#10:6 Maaha mo-ketabho ikya Okosemoka 1:27. 7‘Ku bhuyö, umushaasha naraatighe suwaabho na nyakuwaabho, aghootane na mokaaye. 8Abhantö abhabhërë bhayö, nkobha bharë kya ömöbhërë öghömwë.’#10:7-8 Maaha mo-ketabho ikya Okosemoka 2:24. Bhoono hayö, abhantö bhayö te-bhabhërë hë, kasi nkobha bharë kya ömöbhërë öghömwë. 9Mbe, abhantö bhano Waryobha yaatoora hamwë, ömöntö atakaasha okokora bhaahokane.”

10Hano bhaasöhirë ghwiki mu-nyumba, abheegha abhaaye bhakamöbhöörya engʼana iyö. 11Yëësu akabhahonshora igha, “Ömöntö ono araabhorre mokaaye, atete omokari uwöndë, uyö no-bhosooraare akokora. 12Kora omokari ono akutigha mushaasha uwaaye, aghya okotetwa na umushaasha uwöndë, uyö wonswe no-bhosooraare akokora.”

Yëësu arangʼoora abhaana abhake

(Mataayo 19:13-15; Ruuka 18:15-17)

13Abhantö nyabhorebhe bhakahira abhaana abhake ku-Yëësu, okore abhakuni na okobhangʼoora. Kasi, abheegha abhaaye bhakahamera abhaibhöri bhayö. 14Hano Yëësu yaarööshë abheegha abhaaye bharakora igho, akarerra. Akabhatëëbhya igha, “Mutighe abhaana abhake bhayö, bhaashenga ku-öni, motakaabhakaanianga! Ko bhoora Obhokama ubhwa Waryobha, nu-bhwa abhantö bhano bharëngë kya abhaana bhayö. 15No-bhoheene nkobhatëëbhya igha, ömöntö ono atakwikërrya Öbhötöngi ubhwa Waryobha kya omoona omoke bhono akukumya, taatore okosoha mo-Bhokama ubhwa Waryobha hë.” 16Mbe, akaibhaara abhaana bhayö, akabhatoorra amabhoko aghaaye, akabhangʼoora.

Umwamë aratuna öbhöhöru ubhwa amakora ghonswe igho

(Mataayo 19:16-26; Ruuka 18:18-30)

17Hano Yëësu na abheegha abhaaye bhaatanoranga, ömöntö ömwë akaiha ikibhuusë akaasha, akatema hansë ibhiru mbere iya Yëësu. Akamöbhöörya igha, “Umwëghya uwa heene, iyakë nkaakora, okore ndiisha okorya umwandö ughwa öbhöhöru ubhwa amakora ghonswe igho?”

18Yëësu akamohonshora igha, “N-kwakë okomberekera igha uwa heene? Ömöntö uwa heene taaho hë, kasi n-Waryobha umwene igho. 19Bhoono, omanyirë imighiro ighya Waryobha bhono ghekoghamba? Gheraghamba igha, ‘Otakaita ömöntö, otakaabha omosooraare, otakaibha, otakaimererra amangʼana agha obhorongo, otakangʼaina, osooke suwëënyu na nyakuwëënyu.’ #10:19 Maaha mo-ketabho ikya Ukurishoka 20:12-16; Eheetoko iya Etoraati 5:16-20.”

20Ömöntö uyö akamohonshora igha, “Umwëghya, ghayö ghonswe igho naghaghoota ukurwa nkërëngë moke.”

21Yëësu akamomaaherra, akamohansha, akamötëëbhya igha, “Usuuhirwë engʼana ëmwë. Kaghi öghöri ëbhëntö bhyonswe igho bheno onabhyo, seehera seno oraanyoore-mo, ohaane abhatöbhu, hayö ho oraabhe na emongo mu-ryobha ku-Waryobha. Bhoono hayö omanye kuusha konsoorana.” 22Kasi, hano ömöntö uyö yaaighuurë igho, akaringa ikisyö. Akatanora abhaabhayëëyë, ko bhoora m-mwamë bhököngʼu yaarë.

23Yëësu akamoghorra abhantö aramaaha eno na eno, akatëëbhya abheegha abhaaye igha, “N-këköngʼu ko-bhaamë okosoha mo-Bhokama ubhwa Waryobha.” 24Abheegha abhaaye bhakaroghoora engamba iyö. Yëësu akabhatëëbhya ghwiki igha, “Abhaana abhaane, momaahe mbe bhono ërëngë këköngʼu okosoha mo-Bhokama ubhwa Waryobha.#10:24 Bhono ërëngë këköngʼu okosoha mo-Bhokama ubhwa Waryobha. Senakara isyëndë syandëkirë igha, n-këköngʼu okosoha mo-Bhokama ubhwa Waryobha ko-bhantö bhano bhakwitengʼera ubhwamë ubhwabho. 25Ne-ngʼana ntöbhu engamia okoheta mu-ribhanga irya insindani, okokera umwamë okosoha mo-Bhokama ubhwa Waryobha.”

26Abheegha abhaaye bhakaroghoora bhököngʼu ko engʼana iyö. Bhakabhoorania abheene ko abheene igha, “Bhoono nyoore amangʼana ni-igho gharë, nawë araatore ökötööribhwa?”

27Yëësu akabhamoghorra, akamara akabhatëëbhya igha, “Amangʼana ghano abhantö bhatakotora okokora, Waryobha nkoghatora arë, ko bhoora Waryobha nkotora arë ghonswe igho.”

28Peetero akatëëbhya Yëësu igha, “Maaha, bhëëtö twatigha ëbhëntö bhyonswe igho, twakosoorana, twabha abheegha abhaaho.”

29Mbe, Yëësu akaghamba igha, “No-bhoheene nkobhatëëbhya igha, ömöntö ono yaatigha inyumba handë mura uwaabho, umusubhaati uwaaye handë nyakuwaabho, suwaabho handë abhaana abhaaye, handë ëmëghöndö, ko okoghera iya öni, na ko okoghera iya Amangʼana Amaiya, 30Waryobha naremohaana ëbhëntö ibhyaru bhököngʼu okokera bhiyö. Ko-kebhara kono ikya bhoono igho, naraanyoore sinyumba, bhamura abhaabho, abhasubhaati na bhanyakuwaabho, abhaana bheena ëmëghöndö. Hamwë na ghayö ghonswe igho, narinyoora inyaanyi. Ghwiki ko-kebhara keno kiriisha, narinyoora öbhöhöru ubhwa amakora ghonswe igho. 31Kasi abhantö abhaaru mo-bhano bhakwimaaha igha bhaana ubhwera bhoono igho, tebharebha na ubhwera hë. Na abhantö abhaaru bhano bhataana ubhwera bhoono igho, mbo bharebha na ubhwera.”

Yëësu arashumaashera urwa katatö engʼana iya ukukwa na ukuryoka ukwaye

(Mataayo 20:17-19; Ruuka 18:31-34)

32Yëësu na abheegha abhaaye bhaatiirrë ukughya Yërusarëëmu, Yëësu yaarenga atangatirë. Abheegha abhaaye bhakaroghoora, kora abhantö abhandë bhano bhaamosoorananga bhonswe bhakabha na entarëki. Mbe, Yëësu ghwiki akabherekera mbareka abheegha abhaaye ikömi na abhabhërë, akasimya okobhatëëbhya ghano gharaamunyoore. 33Akaghamba igha, “Maaha, nkughya törë Yërusarëëmu, kasi Yërusarëëmu iyö tukughya, yo öni Omoona uwa Ömöntö ndaahirwe ko-bhanene abha abhasëngëri abha Waryobha na abhëëghya abha amaraghërryö agha Mosa. Bhayö mbo bharaambotorre ikiina igha nkwe. Ghwiki, mbaraahire ko-Bhakyaro. 34Abhantö bhayö mbaraansere, kora bhantwere amate. Mbaraanteme imishariti kora bhaanyite. Kasi urusikö urwa katatö, nindiryoka.”

Omotangati atighinkanere bhano akotangata

(Mataayo 20:20-28)

35Abhamura abhabhërë abha Zebhedaayo, Yaakobho bhaana Yohana, bhakasuntarra Yëësu bhakamötëëbhya igha, “Umwëghya, torakosabha otokorre-ko engʼana nyabhorebhe.”

36Yëësu akabhabhöörya igha, “Ne-ngʼana kë mukutuna mbakorre?”

37Bhakamohonshora igha, “Torakosabha igha, hano urisimya okotonga mu-bhuhika ubhwaho, ototoore twikarenga hamwë na uwe, ömwë abhe orobhareka urwaho urwa bhoryo, na uwöndë abhe bhömösi.”

38Yëësu akabhatëëbhya igha, “Temomanyirë keno mokosabha hë. Bhoono, motora ukunywa ekekombe ikya inyaanyi kya keno ndaanywe, handë motora okobhatiisibhwa obhobhatiisyo ubhwa uruku bhono ndaabhatiisibhwi?”

39Mbe, bhakamohonshora igha, “Ntoraatore.” Yëësu akabhatëëbhya igha, “Obhoheene, moraanywe ekekombe ikya inyaanyi eno ndaanyoore, na moraabhe na enkaagha ënköngʼu kya iyaane.#10:39 Moraabhe na enkaagha ënköngʼu kya iyaane. Mu-Kiyunaani ni-igha, mobhatiisibhwa kya bhono öni ndaabhatiisibhwi. 40Kasi okotoora ömöntö aikare bhoryo ubhwane handë bhömösi, ghuyö te-moremo ughwane hë. Waryobha umwene we arehaana bhano yaamara ökösëëmërya.”

41Mbe, hano abheegha bharikyabho ikömi bhaara bhaaighuurë ghayö, bhakabharererra. 42Mbe, ku bhuyö Yëësu akabhabherekera bhamusuntarre. Akatëëbhya abheegha abhaaye bhonswe igho igha, “Mmomanyirë igha, abhatöngi Abhakyaro, mbaana ubhwera ko-bhantö abhaabho kora nkobhabhandërrya bharë. 43Kasi, kö-bhëënyu tinkutuna ebhe igho hë. Ömöntö wowonswe ono akutuna abhe omonene mö-bhëënyu, ni-igha abhatighinkanere. 44Na ömöntö wowonswe ono akutuna abhe uwa mbere mö-bhëënyu, ni-igha abhe omoghorwa uwëënyu. 45Kora öni Omoona uwa Ömöntö, tenaasha igha abhantö bhantighinkanere hë, kasi naasha igha, ntighinkanere abhantö, na ukwiruusya öbhöhöru ubhwane, okore ntunguri abhantö abhaaru.”

Yëësu arahwënia umuhukuru

(Mataayo 20:29-34; Ruuka 18:35-43)

46Mbe, bhakahika Yërikö. Hano Yëësu na abheegha abhaaye hamwë na rikomo rinene irya abhantö bhaatanööyë ukurwa Yërikö, bhakanyoora umuhukuru aikaayë mbareka iya enshera, arasabherra seehera. Ömöntö uyö yaabherekerwanga igha Bhatimaayo, mura uwa Timaayo. 47Hano yaaighuurë igha Yëësu uwa Nazarëëti we akoheta hayö, akasimya okokonga bhököngʼu igha, “Yëësu, umwebhorwa Daudi,#10:47 Umwebhorwa Daudi. Abhayahudi bhaitengʼera igha Mesiya nakaruure mo-eka ya omokama Daudi. Maaha mo-faharaasa. otanyabhera!” 48Abhantö abhaaru bhakamohamera okore akire. Kasi umwene akëngërya okokonga bhököngʼu igha, “Umwebhorwa Daudi, otanyabhera!”

49Yëësu akemerra, akaghamba igha, “Momobherekere aashe hano.”

Mbe, bhakabherekera umuhukuru uyö, bhakamötëëbhya igha, “Terema! Emoka arakobherekera.”

50Bhatimaayo akarekera hansë ingibho iyaaye, akemerra bhöngöbhöngö, akaghya ku-Yëësu.

51Yëësu akamöbhöörya igha, “N-kë ukutuna nkokorre?”

Umuhukuru uyö akamohonshora igha, “Umwëghya, nkutuna ndë igha maahe.”

52Yëësu akamohonshora igha, “Keno këghërrë uhwënirë, nu-mukumo ughwaho. Kaghi ka.” Hayö na hayö igho, ömöntö uyö akasimya okomaaha, akasoorana Yëësu ko-nshera.

Currently Selected:

Maariko 10: ssc

Highlight

Copy