Maariko 9

1Yëësu akaghëndërrya okobhatëëbhya igha, “No-bhoheene nkobhatëëbhya igha, mo-bhantö bhano bhaimërëëyë hano, bhaamo abhandë bhano bhatarikwa igho, bhatarööshë Obhokama ubhwa Waryobha.”

Yëësu araisyörya ekesosa

(Mataayo 17:1-13; Ruuka 9:28-36)

2Hano syaahëtirë sinsikö isansabha, Yëësu akaghegha Peetero, Yaakobho na Yohana, akaghya nabho righara ku-nguku entambë. Yëësu akaisyörya ekesosa ikyaye, akamaahekana bhöndë igho. 3Singibho isyaye sekamekameka bhököngʼu, sekarabherra okokera bhono sekaafurrwë na umufuri uwa singibho wowonswe igho, ko-kebhara kono. 4Ëriya bhaana Mosa, abharööti abha Waryobha abha kare, bhakabhabhooshokera, bhakashumaasha na Yëësu.

5Peetero akatëëbhya Yëësu igha, “Raabhi, m-buuya bhëëtö tobhe hano. Tohaghaashe ibhighutu bhitatö. Ëkëmwë ikyaho, ikyëndë ikya Mosa, na ikyëndë ikya Ëriya.” 6Tiyaamanyirë engʼana iya okoghamba hë, ko bhoora umwene hamwë na bharikyaye, mbööbhöhirë bhököngʼu.

7Mbe, risaarö rekaasha, rekabhakundikirya. Engamba iya Waryobha ekarwera mu-risaarö muyö eraghamba igha, “Ono no-Moona uwaane omoghonshe, mumwitegherre.” 8Kamwë igho abheegha bhayö, bhakamaghamagha eno na eno, tebhaarööshë-ho ömöntö uwöndë hë, kasi Yëësu umwene igho.

9Hano bhaangʼararanga ukurwa ku-nguku kuyö, Yëësu akabhakaania igha, bhatakaatëëbhya ömöntö wowonswe igho, ghano bhaarööshë, okohekera hano Omoona uwa Ömöntö urinyoora ndyökirë ukurwa mo-bhaku. 10Abheegha bhayö bhakaghoota engʼana iyö, bhakabha bharabhöörania abheene ko abheene igha, “Ensonga iya ukuryoka ukwaye ukurwa mo-bhaku në-ëëhë?”

11Bhakabhöörya Yëësu igha, “N-kwakë mbe abhëëghya abha amaraghërryö agha Mosa bhakoghambanga igha, Ëriya ömörööti uwa Waryobha we aretangata ukuusha, Kiristo ataraasha?”#9:11 Maaha mo-ketabho ikya Maraaki 4:5-6.

12Yëësu akabhahonshora igha, “Obhoheene ni-igha Ëriya nakaaishirë mbere asëëmi ghonswe igho. Nokaanyoora ni-igho ërë, kasi n-kwakë yandëkirwë mo-Maandeko Amahörëëru igha, ‘Omoona uwa Ömöntö narinyoora inyaanyi bhököngʼu kora aserwe?’ 13Tigha mbatëëbhi, Ëriya yaamara kuusha,#9:13a Ëriya yaamara kuusha. Yëësu nkutuubhania arë Ëriya na Yohana Omobhatiisya we yaasëëmëëyi Yëësu enshera, emeremo gheno Abhayahudi bhaaitengʼeranga igha, Ëriya we akaaghëkörrë. Maaha mo-ketabho ikya Mataayo 11:13-14, 17:10-13; Maariko 1:2-4. bhakamokorra amaghogho ghonswe igho, bhono bhaatunanga,#9:13b Maaha mo-ketabho ikya Maariko 6:14-29. kya bhono Amaandeko ghakoghamba.”

Yëësu araata risambwa irya ëndööri

(Mataayo 17:14-21; Ruuka 9:37-43)

14Mbe, hano Yëësu, Peetero, Yohana na Yaakobho bhaahikirë ko-bheegha abhandë haara, bhakanyoora-ho rikomo rinene irya abhantö abhaaru, rebhanaarri. Abhëëghya abha amaraghërryö agha Mosa bhaaryanga senkaani na abheegha bhayö. 15Kamwë igho, hano rikomo irya abhantö bhayö ryaarööshë Yëësu, bhakaroghoora bhököngʼu bhonswe igho, bhakamokenyerra, bhakamökëërya.

16Yëësu akabhöörya abheegha abhaaye igha, “N-kë mwaarë kunyeerania senkaani nabho?”

17Ömöntö ömwë mu-rikomo riyö, akamohonshora igha, “Umwëghya, ndëëtirë omoona uwaane ku-uwe, aana risambwa irya ubhumuumu. 18Hano ryamoghoota, nkumughwësya rërë hansë, arwa rihuro mu-munywa, akaraatya amaino, ömöbhërë ghonswe igho ghohangarra. Nsabhirë abheegha abhaaho igha, bhaate risambwa riyö, kasi bhaakërrwë.”

19Yëësu akabhatëëbhya igha, “Bhëënyu urwebhoro rono motaana umukumo! Nendaaikarane na bhëënyu ndabhaghömërrya igho okohekera rööhë? Momondeetere hano.”

20Bhakamuhira, kasi bhuyö risambwa ryaarööshë Yëësu igho, rekakora omoona uyö akaghwa ëndööri, akaighaaraghaara hansë, ararwa rihuro mu-munywa.

21Yëësu akabhöörya suwaabho omoona uyö igha, “Inyanko eno nkurwa rööhë yaamunyoora?” Suwaabho omoona akahonshora igha, “Nkurwa kare, akërëngë moke. 22N-kaaru risambwa riyö rekomorekeranga mo-morro handë mo-manshë, okore rimwite. Bhoono nyoore notora okokora ryoryonswe igho, twabhere, ötötöörri.”

23Yëësu akamohonshora igha, “N-kwakë oghambirë igha, ‘Nyoore notora?’ Ömöntö ono akukumya Waryobha, nkotora arë ghonswe igho.”

24Kamwë igho suwaabho omoona uyö, akakuura bhököngʼu igha, “Nkukumya ndë! Kasi umukumo ughwane tighukwisa hë, otankora mbe na umukumo omonene.”

25Hano Yëësu yaarööshë rikomo irya abhantö reraaruha, akahamera risambwa riyö igha, “Uwe, ririsambwa! Waakora omoona ono yaabha rimuumu kora wamukiröhya. Bhoono ndakohamera igha, karwe ko-moona ono, otakaasha kumukyora-ko ghwiki.” 26Ho risambwa riyö ryaakörrë ikituri bhököngʼu, rekaghwësya omoona uyö, rekamogharabhökya bhoghogho hansë hayö, rekamurwa-ko. Omoona uyö akabha kya ono akuurë. Abhantö abhaaru bhakaghamba igha, “Akuurë!” 27Kasi, Yëësu akamoghoota okobhoko, akamöghörrökya, akemerra.

28Mbe, hano Yëësu yaasöhirë mu-nyumba, abheegha abhaaye bhakanyoorra-ho umweya ughwa ökömöbhöörya igha, “N-kwakë bhëëtö bho twaarë tökërrwë ukwata risambwa riyö?”

29Yëësu akabhahonshora igha, “Risambwa kya riyö, tirikwatwa na engʼana yoyonswe igho hë, kasi na-masabhi ngo ghakuryata.”#9:29 Na-masabhi ngo ghakuryata. Senakara isyëndë syandëkirë igha, amasabhi bheena ukwisasa okorya mbyo bhikuryata.

Yëësu arashumaashera urwa kabhërë engʼana iya ukukwa na ukuryoka ukwaye

(Mataayo 17:22-23; Ruuka 9:43b-45)

30Yëësu na abheegha abhaaye bhakatanora ukurwa iyö, bhakaheta ghatëghatë iya omokowa ughwa Ghariraaya. Yëësu tiyaatunanga abhantö bhamanye igha hai arëngë, 31ko bhoora yëëghyanga abheegha abhaaye igha, “Öni Omoona uwa Ömöntö nendaaghootwe nhirwe ko-bhantö bhano bharaanyite, kasi urusikö urwa katatö, nindiryoka.” 32Amangʼana ghayö Yëësu yaabhatëëbhëri, tebhaghamanyërrëëyi hë, kasi bhakoobhoha ökömöbhöörya.

N-nawë omonene okokera abhandë?

(Mataayo 18:1-5; Ruuka 9:46-48)

33Yëësu na abheegha abhaaye bhakahika mu-mughi ughwa Kaperenaumu. Hano bhaasöhirë mu-nyumba, Yëësu akabhabhöörya igha, “N-kë mwaarë kunyeerana senkaani ko-nshera haara?” 34Bhakakira kiri, ko bhoora bhaanyeerananga senkaani abheene ko abheene ko-nshera igha, ghatë iyaabho nawë omonene okokera abhandë bhonswe igho. 35Yëësu akaikara hansë, akabherekera abheegha abhaaye ikömi na bhabhërë. Akabhatëëbhya igha, “Ömöntö ono akutuna igha abhe omonene ko bhonswe igho, ni-igha aisuuhi umwene, kora atighinkanere abhandë bhonswe igho.”

36Akaghegha omoona omoke, akamwimërrya ghatë yaabho hayö. Akamwibhaara, akabhatëëbhya igha, 37“Ömöntö wowonswe igho ono akösërëënia omoona kya ono ku iriina iryane, uyö nö-öni ukunyoora aikërëëyi. Ghwiki ömöntö ono akunyikërrya, tö-öni umwene igho ukunyoora aikërëëyi hë, kasi obhoheene nkunyoora örë aikërëëyi Waryobha ono yaantoma.”

Ömöntö ono atakwanga Yëësu hamwë arë na we

(Ruuka 9:49-50)

38Yohana akatëëbhya Yëësu igha, “Umwëghya, törööshë ömöntö araata amasambwa ko obhotoro ubhwa iriina iryaho, tokamokaania, ko bhoora atarëngë hamwë na bhëëtö.”

39Kasi, Yëësu akamohonshora igha, “Hano mörööshë ömöntö kya uyö, motakaamokaania. Taaho ömöntö ono araakore amakono ku iriina iryane, amare ghwiki angambe bhoghogho. 40Ömöntö ono atakutunyeera senkaani, uyö, hamwë arë na bhëëtö. 41Ömöntö wowonswe igho ono araabhahaane amanshë agha ukunywa ko bhoora igha m-bantö abha Kiristo mörë, no-bhoheene nkobhatëëbhya igha, ömöntö uyö, Waryobha narimutuha.”

Ukushaashwa okokora ëbhëbhë

(Mataayo 18:6-9; Ruuka 17:1-2)

42Yëësu akaghëndërrya okoghamba igha, “Kasi hano ömöntö araakore ömwë uwa bhano bhataraakongʼa ku-mukumo asire, kora akore ëbhëbhë, nyakara ömöntö uyö, abhoherwe mö-bhëghöti oroghena oronene urwa okoseera, arekerwe mu-nyansha. 43Ghwiki hano okobhoko ukwaho koraakokorerre okore ëbhëbhë, kobhotore. Nyakara osohe mö-bhöhöru ubhwa amakora ghonswe igho, oona ekebheera ikya okobhoko ökömwë, okokera okobha na amabhoko abhërë, kasi oghende mo-morro ghotakurima. [44Sinyende isya iyö tisikukwa hë, na omorro ughwa iyö, ghonswe tighukurima röndë hë.]#9:44 Maaha mo-ketabho ikya Isaaya 66:24. 45Hano ököghörö ukwaho koraakokorerre okore ëbhëbhë, kobhotore. Nyakara osohe mö-bhöhöru ubhwa amakora ghonswe igho, oona ekebheera ikya ököghörö ökömwë, okokera okobha na amaghörö ghonswe igho abhërë, omare otabhutwe mo-morro ghotakurima. [46Sinyende isya iyö, tisikukwa hë, na omorro ughwa iyö ghonswe tighukurima röndë hë.]#9:44, 46 Amangʼana ghano gharëngë mo-bhebhandërryö kya bheno […] ni-igha, tegharëngë mo-senakara isyëndë isya Ikiyunaani. 47Hano iriiso iryaho reraakokorerre okore ëbhëbhë, resomore. Nyakara osohe mo-Bhokama ubhwa Waryobha oona eketongʼo, okokera okobha na amaiso abhërë ghonswe igho, omare otabhutwe mo-morro ghotakurima. 48Sinyende isya iyö, tisikukwa hë, na omorro ughwa iyö, ghonswe tighukurima röndë hë.

49“Kera ömöntö naresaabhuurwa na omorro,#9:49a Omorro. Kiyö në-kërëngyö ikya inyaanyi eno eraanyoore Abhakiristo na okotogheka umukumo ughwabho. kya hano bhakotoora ömöönyö#9:49b Ömöönyö. Abhayahudi bho bhaahakanga inyama ömöönyö okore bhaghesaabhuure ataraamwenswa. Yaabherekerwanga igha, ikimwenso ikya ukusikya. Bhaaghesambanga igho erongora ehwa etarëëywë na ömöntö. Maaha mo-ketabho ikya Amangʼana agha Abharaawi 2:13; Ezekieri 43:24. mu-kimwenso bhataraamwensa.#9:49c Kera ömöntö naresaabhuurwa na omorro, kya hano bhakotoora ömöönyö mu-kimwenso bhataraamwensa. Senakara isyëndë syandëkirë igha, Kera ömöntö naretoorwa-mo ömöönyö na omorro. 50Ömöönyö n-këntö ikiiya, kasi hano ömöönyö ghoraabhorwe obhosambaaroku, n-kë kekaatoorwa-mo ghosambaaroke? Kora na bhëënyu bhonswe ni-igha mobhe kya ömöönyö ghono ghokosambaarokya. Mobhe na ubhwighwerrani abheene ko abheene.”

Currently Selected:

Maariko 9: ssc

Highlight

Copy