Maariko 8

Abhantö ëbhëkwë bhine, bharahaanwa ibhyakorya na Yëësu

(Mataayo 15:32-39)

1Ko-nkaagha iyö, rikomo iryëndë rinene irya abhantö, rekaikomania ghwiki. Mbe ekahika enkaagha, abhantö bhayö, bhakabhorwa ibhyakorya. Ku bhuyö Yëësu akabherekera abheegha abhaaye, akabhatëëbhya igha, 2“Urusikö rono, nu-urwa katatö, abhantö bhano bharëngë hamwë na bhëëtö, bhoono tebhaana ibhyakorya bhyobhyonswe igho hë, nkobhaabhera ndë. 3Hano ndaabhatighe bhaghi waabho igho na umweko, bharatora korambokera ko-nshera, kora abhandë n-hare bharuurë.”

4Abheegha abhaaye bhakamohonshora igha, “Taaho ömöntö ono akotora ukunyoora emekaate mwi-sisi hano, gheno gheraaise abhantö bhangʼana hano bhonswe igho!”

5Yëësu akabhabhöörya igha, “Emekaate ne-renga moonaghyo?”

Bhakamohonshora igha, “Toona emekaate muhungatë.”

6Yëësu akaraghërrya igha, abhantö bhonswe igho bhaikare hansë. Akaghegha emekaate muhungatë ghiyö, akakumya Waryobha, akaghebhotorabhotora. Akahaana abheegha abhaaye, bhatwenere abhantö. 7Ghwiki bhaarenga na ibhiswë ebheke igho, Yëësu ghwiki akakumya Waryobha, akahaana abheegha abhaaye, akabharaghërrya bhatwenere abhantö.

8Abhantö bhakarya igho bhakeeghota. Abheegha bhakakomania ebhesansa ibhya ibhyakorya bheno bhyaatamirë, bhakaishörya ebhekapo muhungatë. 9Abhantö bhano bhaarëëyë ibhyakorya bhiyö, n-kya ëbhëkwë bhine bhaarë. Yëësu akaragha abhantö bhayö, okore bhaghi waabho. 10Kamwë igho, akariina mu-bhwato na abheegha abhaaye, bhakaghya ku-kyaro ikya Darimanuta.

Yëësu arahamera bhano bhakutuna ekemanyërryö

(Mataayo 12:38-42, 16:1-4)

11Hano Yëësu na abheegha abhaaye bhaahikirë Darimanuta, Abhafarisaayo bhakaasha ku-Yëësu. Bhakasimya ukunyeerana nawe senkaani, okore bhamoghashani. Bhaatunanga abhööröki ekemanyërryö ikya rikono, keno keraabhööröki igha, Waryobha we yaamotoma.

12Yëësu akaighwa bhoghogho mo-nkoro iyaaye. Akabhabhöörya igha, “N-kwakë bhëënyu abhantö abha rekora reno, mukutuna ekemanyërryö? No-bhoheene nkobhatëëbhya igha, tëmbööröki ekemanyërryö kyokyonswe igho hë.” 13Akabhatigha hayö, akasoha ghwiki mu-bhwato. Akatanora na abheegha abhaaye, okore amboke, aghi humbu iya inyansha.

Amëëghyö amaghogho agha Abhafarisaayona agha Herode Antipa

(Mataayo 16:5-12)

14Abheegha abha Yëësu bhaarenga na omokaate ghömwë igho mu-bhwato, ko bhoora bhaarenga bhëëbhirë okoghegha emekaate ighya okobhaisa. 15Mbe, Yëësu akabhatëëbhya igha, “Mwiyangarre na ehamiira#8:15 Ehamiira. Yëësu ararengʼania ehamiira iyö, na öbhösëëghërrya obhoghogho bhono Abhafarisaayo bhaana Herode Antipa bhaakoranga ko-bhantö. Öbhösëëghërrya ubhwa Abhafarisaayo bhwaarenga ubhwa amëëghyö agha obhorongo. Herode Antipa yaarë ömösëëghërrya uwa enshera engogho. iya Abhafarisaayo, bheena iya omokama Herode Antipa.”

16Kasi abheegha bhayö tëbhöngööyë hë, bhakashumaasha abheene ko bheene bharaghamba igha, “Keno këghërrë aghambirë igho, n-ko bhoora twëbhirë okoghegha emekaate.” 17Yëësu yaamanyirë ghonswe igho ghano bhaashumaashanga, ku bhuyö akabhabhöörya igha, “N-kwakë mukushumaasha igha temoona emekaate hë? Nko okoghamba igha, nanyabhoono temoraamanya na okoneghora engʼana yoyonswe hë? Senkoro isyënyu ni-ndibhu isya okomanyërrya engʼana iyö? 18Amaiso mmoonagho, kasi temokomaaha hë? Amatwë mmoonagho, kasi timukwighwa hë. Timukuhiita hë? 19Enkaagha eera naabhötööyëbhötööyë emekaate etaano gheera, mokahaana abhantö okoheteera ëbhëkwë bhitaano, m-bekapo bherenga ibhya ebhesansa bheno mwaakomaini?” Bhakamohonshora igha, “Ntwaakomaini ebhekapo ikömi na bhibhërë.”

20“Hano naabhötööyëbhötööyë emekaate muhungatë gheera na mokahaana abhantö ëbhëkwë bhine, m-bekapo bherenga ibhya ebhesansa bheno mwaakomaini?” Bhakamohonshora igha, “Ntwaakomaini ebhekapo muhungatë.”

21Mbe, ho yaamarrë akabhabhöörya igha, “Kora nanyabhoono temoraamanya ngʼana hë?”

Yëësu arahwënia umuhukuru

22Yëësu na abheegha abhaaye bhakahika mu-kishishi ikya Bhëtisaida. Abhantö nyabhorebhe bhakareeta umuhukuru ku-Yëësu. Bhakamosabha igha amukuni, amuhwëni. 23Yëësu akaghoota umuhukuru uyö okobhoko, akaghya nawe okoheteera ikishishi kiyö. Akamutwera amate ko-maiso, akamotoorra amabhoko ko-maiso, akamöbhöörya igha, “N-kë okomaaha?”

24Ömöntö uyö akamaaha, akaghamba igha, “Nkomaaha ndë abhantö, bhabhaayë kya ëmëtë gheno ghekoghenda.”

25Yëësu akamotoorra ghwiki amabhoko ko-maiso, ömöntö uyö akamoghora bhököngʼu. Akatora okomaaha ëbhëntö bhyonswe igho bhuuya. 26Yëësu akamötëëbhya igha, “Kaghi yeeka waaho, kasi otakahetera mu-kishishi.”

Peetero araghamba igha Yëësu n-Kiristo

(Mataayo 16:13-20; Ruuka 9:18-21)

27Yëësu akatanora na abheegha abhaaye ukurwa Bhëtisaida, akaghya mu-bhishishi ibhya haangʼë na umughi ghono ghwaabherekerwanga igha, Kaisaaria Firipi. Hano bhaaghendanga ko-nshera, Yëësu akabhöörya abheegha abhaaye igha, “Abhantö bharangamba igha nö-öni wë?”

28Bhakamohonshora igha, “Abhandë nkoghamba bharë igha, Yohana Omobhatiisya, abhandë bharaghamba igha, uwe nö-mörööti Ëriya, abhandë nkoghamba bharë igha nö-mörööti uwöndë mo-bharööti abha kare abha Waryobha.”

29Akabhabhöörya igha, “Bhoono bhëënyu bho, iyakë mokoghamba?”

Peetero akamohonshora igha, “Uwe nu-uwe Kiristo.”

30Mbe, Yëësu akabhakaania bhatakaatobhorra ömöntö wowonswe oora engʼana iyö.

Yëësu arashumaashera urwa mbere engʼana iya ukukwa na ukuryoka ukwaye

(Mataayo 16:21-28; Ruuka 9:22-27)

31Ho Yëësu yaamarrë, akasimya ukwëghya abheegha abhaaye igha, Omoona uwa Ömöntö, ni-igha nnyankibhwi bhököngʼu. Kora abhaghaaka abha Ikiyahudi, abhanene abha abhasëngëri abha Waryobha, bheena abhëëghya abha amaraghërryö agha Mosa, mbaraanyange kora bhaanyite, kasi urusikö urwa katatö, nindiryoka. 32Yëësu akabha aratëëbhya abheegha abhaaye engʼana iyö harabhu igho. Peetero akahira Yëësu mbareka, akasimya okomokaania.

33Kasi Yëësu akaisyörya, akamaaherra abheegha abhaaye. Akahamera Peetero igha, “Ndwera-ho ghore Oghosambwa! Amaitegherro aghaaho ghayö, n-ga kinyabhantö, tegharëngë agha Waryobha hë.”

34Akabherekera rikomo irya abhantö hamwë na abheegha abhaaye, akabhatëëbhya igha, “Ömöntö wowonswe ono akutuna igha ansoorane, ni-igha aikaane umwene, aiteeke omosarabha ughwaye, ansoorane. 35Ku bhuyö, ömöntö ono akutuna aitööri öbhöhöru ubhwaye umwene, uyö nkwimara arë-ho umwene amakora ghonswe igho. Obhoheene ni-igha, ono akuruusya öbhöhöru ubhwaye ko okoghera iya öni, na ko okoghera iya Amangʼana Amaiya, uyö we araaitööri. 36N-hoorohooro kë ömöntö araanyoore, hano akaanyoora ëbhëntö bhyonswe igho ibhya ko-kebhara kono, kasi asiri öbhöhöru ubhwaye ubhwa amakora ghonswe igho? 37Bhoono n-kë ömöntö akaaruusya, okore anyoore öbhöhöru ubhwa amakora ghonswe igho? 38Ömöntö ono akoommaahera sënsöni öni na amangʼana aghaane, ko-nkaagha eno iya abhantö bhano bhakokora ëbhëbhë, uyö we öni Omoona uwa Ömöntö ndemaahera sënsöni ku-bhuhika ubhwa Taata, hano ndiisha ukurwa mu-ryobha, hamwë na abhamaraika abhahörëëru.”

Currently Selected:

Maariko 8: ssc

Highlight

Copy