Maariko 13

Yëësu arashumaashera okotemorwaukwa risengerro irya Waryobha

(Mataayo 24:1-2; Ruuka 21:5-6)

1Hano Yëësu yaarwanga mu-risengerro irya Waryobha arëngë hamwë na abheegha abhaaye, umwegha uwaaye ömwë akamötëëbhya igha, “Umwëghya, maaha amaghena amanene ghayö gharëngë ko-manyumba kuyö, na amanyumba amanene ghayö kya bhono gharë, nköröghöörya gharë!”

2Yëësu akahonshora igha, “Amanyumba amanene ghayö mokomaaha hayö, tereeho reghena reno reretama ku-ryëndë hë!”

Yëësu arashumaashera inyaanyi enene eno ikuusha

(Mataayo 24:3-14; Ruuka 21:7-19)

3Hano Yëësu yaarenga aikaayë ku-nguku iya Ëmëzëituuni amaahërrëëyë risengerro irya Waryobha, Peetero, Yaakobho, Yohana bhaana Anderea bhakamöbhöörya bharëngë abheene igho hagharë igha, 4“Torakosabha ötötëëbhi, ghayö okoghamba n-dööhë gharyebhoka? N-kemanyërryö kë keno kereghera tomanye igha, ghayö haangʼë gharë ghabhe?”

5Mbe, Yëësu akabhahonshora igha, “Mwiyangarre, motakaasha okongʼainwa! 6Abhantö abhaaru mbariisha bharaibherekera iriina iryane, eno bharaikora igha, mbo Kiristo. Na abhantö bhayö, mbarengʼaina abhantö abhaaru. 7Ko-nkaagha iyö, muriighwanga amangʼana agha riihë na ibhingʼurusa ibhya riihë. Motakaasha okoroghoora hano moremaahanga amangʼana ghayö, ni-igha ghabhe, kasi umuhiko ughwa ekebhara,#13:7 Umuhiko ughwa ekebhara. Eratora okobha igha, nu-muhiko ughwa ekebhara handë umuhiko ughwa risengerro. turinyoora ghoraahika hë. 8Ikyaro nyabhorebhe, nkiriitana na ikyaro ikyëndë, obhokama mburiitana na obhokama ubhwöndë. Ibhirighiti na inshara, mberebha ahasë ahaaru ko-kebhara kono. Amangʼana ghayö, n-kya ebhesa ibhya omokari bheno bhekotangata omoona atareebhorwa.

9“Kasi bhëënyu mwiyangarre bhököngʼu. Abhantö mbarebhaghoota bhabhahire mo-sebharasa, kora mbarebhatemanga bhököngʼu mu-sinyumba isya esango iya Abhayahudi. Mbarebhahira ko-bhanene abha ikyaro na ko-bhakama, ko bhoora igha, m-bantö abhaane mörë. Iyö yo erebha enkaagha iya bhëënyu ukwimererra Amangʼana Amaiya ko-bhantö bhayö. 10Kasi Amangʼana Amaiya, ni-igha gharaarekwe ku-bhyaro bhyonswe igho tangata, umuhiko ghotaraahika. 11Hano abhantö bhayö bharebhaghoota bhabhahire mo-sebharasa, na okobhabhotorra ikiina, motakaasha okohaha igha, n-kë moraaghambe. Bhëënyu moghambe keno mörëtëëbhibhwa hayöhayö na Waryobha. Ti-igha m-bëënyu moreghamba hë, kasi nu-Mwika Ömöhörëëru ono arëngë mö-bhëënyu, uyö we arebhatöörryanga okoghamba.

12“Ömöntö narinyeera inikö mura uwaabho, okore aitwe. Na umwibhöri uwa ikishaasha narinyeera inikö omoona uwaaye, na abhaana mbarinyeera inikö abhaibhöri abhaabho okore bhabhaite. 13Abhantö mbarebharegha ahasë honswe igho, ko bhoora igha, m-beegha abhaane mörë.#13:13 M-beegha abhaane mörë. Mu-Kiyunaani ni-igha, ko okoghera iya iriina iryane. Kasi ono arëghömërrya okohekera ku-muhiko, Waryobha narëmötöörya.”

Inyaanyi enene enkaagha iya okotemorwa ukwa risengerro

(Mataayo 24:15-28; Ruuka 21:20-24)

14Ömöntö ono akosoma amaandeko ghano, amanyërri ensonga iyaako. Yëësu akaghëndërrya okoghamba igha, “Hano moremaaha omosarya ono akoreeta amanyënyëëri,#13:14 Omosarya ono akoreeta amanyënyëëri. Eratora okobha igha, obhosarya bhono bhokoreeta ubhunyanku. Maaha mo-ketabho ikya Daniëri 9:27, 11:31, 12:11. aimërëëyë Ahasë Ahahörëëru, ahasë hano ataingʼarëëyi okobha-ho, hayö ho bhoono abhantö abha Yudea, bhangʼosere mu-singuku! 15Ömöntö ono urinyoora arëngë kwi-rongo, atakaika hansë igha asohe mu-nyumba, okoghegha ëkëntö kyokyonswe keera, kasi angʼose bhöngöbhöngö, atakaategheta! 16Ömöntö ono urinyoora arëngë kö-möghöndö, atakaasha okohonshoka okoghegha ingibho iyaaye. 17Toraabhera abhakari bhano urinyoora bharaghönkya, na bhano urinyoora bharëngë enda ku-sinsikö siyö. 18Ku bhuyö mosabhe Waryobha igha, amangʼana ghayö, ghatakaasha kobha ko-nkaagha iya embeho. 19Sinsikö siyö abhantö mbarinyoora inyaanyi indito bhököngʼu, eno etakaabhaayë-ho kerenga Waryobha yaabhomba ekebhara keno. Inyaanyi kya iyö terebha-ho ghwiki hë. 20Kora m-bono Omonene Waryobha yaasuuhya sinsikö siyö, singa atasisuuhya, taaho ömöntö ono akaahönirë hë. Kasi Waryobha yaasuuhya sinsikö siyö, ko okoghera iya abhaahorwa abhaaye.

21“Mbe, ko-nkaagha iyö, hano ömöntö arebhatëëbhyanga igha, ‘Tamaaha, Kiristo n-goono hano arë!’ handë igha, ‘Tamaaha, ne-eera arë!’ motakaikërrya. 22Ko bhoora mbariisha abhantö abharongo bhano bharibherekeranga igha, mbo Kiristo. Kora mbariisha abharööti abha obhorongo, bhano bharekora amakono na ebhemanyërryö, okore bhangʼaine abhantö, kora abhaahorwa abha Waryobha. 23Mbe, kasi bhëënyu mwiyangarre! Öni mmarrë okobharoma ökötwë, amangʼana ghayö ghatareebhoka.

Ukuusha ukwa Omoona uwa Ömöntö

(Mataayo 24:29-35; Ruuka 21:25-33)

24“Mbe, kasi hano sinsikö isya inyaanyi siyö serehehwa, iryobha ndirisyöribhwa rebhe ikisuntë, na umwëri teghorebha na emerengaari ghwiki hë.#13:24 Maaha mo-ketabho ikya Isaaya 13:10. 25Sinyota syonswe nsereghwa hansë ukurwa ighörö iyö. Waryobha narisingisya singuru isya mu-ryobha.#13:25 Maaha mo-ketabho ikya Isaaya 34:4.

26“Ho abhantö bhonswe igho bharemmaaha öni Omoona uwa Ömöntö, ndaasha ndëngë ko-masaarö, neena obhotoro na ubhuhika.#13:26 Maaha mo-ketabho ikya Daniëri 7:13; Okohonyora 1:7. 27Ho ndetoma abhamaraika#13:27 Abhamaraika. Maaha mo-faharaasa. abhaane, bhakomani abhaahorwa abhaane, ukurwa mbaara syonswe igho isya ekebhara keno, ukurwa hano ekebhara kisimiiyi, okohekera hano kikuhwera.”

28Yëësu akaghëndërrya okobharëngërya igha, “Momaahere kö-mötë ughwa umutiini. Hano amatö agha amasagharya aghaako ghasëbhökirë ghakore umunyeenye, hayö nkomanya mörë igha, enkaagha iya emaaho n-haangʼë ërë. 29Ni-ighoigho na bhëënyu bhonswe, hano moremaaha ghayö gharaikora, momanye igha, n-haangʼë ndë ukuusha. 30No-bhoheene nkobhatëëbhya igha, rekora reno, terehete igho, ghayö ghonswe igho ngambirë ghataraaikora. 31Ekebhara na ighörö iyö mbereheta, kasi amangʼana aghaane, ngarëghëndërrya okobha-ho igho kughya iyö.

Taaho ömöntö ono amanyirë urusikö handë esa iya umuhiko

(Mataayo 24:36-44)

32“Kasi urusikö ruyö, handë enkaagha iya ukuusha ukwane öni Omoona uwa Ömöntö, taaho ömöntö ono amanyirë hë, mbakaabha abhamaraika abha mu-ryobha, handë Omoona uwa Waryobha. Kasi Taata Waryobha, we umwene igho amanyirë. 33Mbe, mwiyangarre! Mwisëëmi, ko bhoora motamanyirë enkaagha iyö rono irihika.

34“Ukuusha ukwane öni Omoona uwa Ömöntö, nkutuubhaini kya ëkërëngyö keno hano. Igha, n-kya hano ömöntö areemoke ukughya oroghendo, umughi ughwaye ateghere abhaghorwa abhaaye bhamonaghëri. Abhatwenani emeremo ighya okokora. Amare atëëbhi ömörëndi uwa mu-kihiita igha, angarre.”

35Yëësu akaghëndërrya akaghamba igha, “Ku bhuyö mwiyangarre ko bhoora motamanyirë igha n-dööhë mwene mughi arikyora. Temomanyirë hanga no-moghoroobha, handë mu-bhutikö ghatë, handë öröghörö rosambirë handë nyinkyo. 36Mwiyangarre, okore atakaasha okobhatwërërrya mwihiriibhwi. 37Engʼana eno nkobhatëëbhya hano, m-bonswe igho nkötëëbhya igha, mwiyangarre.”

Currently Selected:

Maariko 13: ssc

Highlight

Copy