Kut 37
37
1Yakobo akatuura omu nsi ya Kanaani ei ishe yaabaire ashuuhuukiiremu. 2Mbwenu ebi nibyo byabaire aha b'omuryango gwa Yakobo.
Yosefu akaba aine emyaka ikumi na mushanju. Ku yaabaire naakinyeeta, yaaguma naariisa obusyo bw'entaama na bakuru be batabani ba Biliha na Zilipa baka ishe. Haza Yosefu ogwo akaba agambira ishebo ebibi ebi baabaire nibakora. 3Reero Isiraeli akaba akunda Yosefu okukira abandi baana be boona, ahabw'okuba akaba ari omutabani ou yaazaire yaabaire omugurusi; atyo yaamubaziiriza ekanzu y'emikono miraingwa. 4Kwonka bakuru be ku baareebire ishebo naamukunda okukira beene ishe boona, baamwanga, baaguma batarikugamba gye nawe.
5Mbwenu Yosefu akaroota ekirooto. Ku yaakigambiire bakuru be baayongyera kumwanga. 6Manya akabagira ati: Nimuhurire ekirooto ki ndootsire. 7Ku tubaire nituboha emiba y'engano omu musiri, omuba ogwangye gwaimuka gwayemerera burunga. Reero emiba eyaanyu yaayemerera egwehinguririize, yainikira omuba ogwangye emitwe. 8Bakuru be nikwo kumugira bati: Noogira ngu buzimazima noija kuba omugabe waitu? Nari kwo noija kututegyeka? Batyo baayongyera kumwanga ahabw'ebirooto bye n'ahabw'ebi yaagamba. 9Bwanyima akaroota ekindi kirooto, yaakigambira bakuru be, ati: Reeba ndootsire ekindi kirooto; naareeba eizooba n'okwezi n'enyonyoozi ikumi n'emwe nibintangirira. 10Kwonka ku yaakigambiire atyo ishe na bakuru be, ishe ogwo yaamukabukira naamugira ati: Mbwenu ekyo ni kirooto ki eki orootsire? Noogira ngu buzimazima nyowe na nyoko na bakuru baawe, turyaija kurambira ahansi omu maisho gaawe? 11Bakuru be batyo baamugirira eihari; kwonka ishe yaaguma naijuka ekyo ekyagambwa.
Bakuru ba Yosefu okumugirira enaama y'okumwita
12Bakuru ba Yosefu bakaza kuriisa obusyo bwa ishebo haihi na Shekemu. 13Mpaho Isiraeli yaagira Yosefu, ati: Hari bakuru baawe tibarikuriisiza obusyo Shekemu? Ija nu mbakutumeho. N'onu amugarukamu ati: Reeba ndi aha. 14Atyo amugira ati: Mbwenu irooko oreebe yaaba bakuru baawe bari gye, n'amasyo gari gye; haza oije ongambire. Atyo amutuma; onu aruga omu ruhanga rwa Heburooni aza Shekemu.
15Reero omushaija omweija amushanga naajaayanira omu bwerere. Ogwo mushaija amubuuza ati: Beitu nooronda ki? 16Onu ati: Manya ninsherura bakuru bangye. Naakweshengyereza ngambira ahi bariisiize obusyo. 17Ogwo mushaija amugira ati: Bafurukire, ahabw'okuba mpuriire nibagira bati: Ka tuze Dotani. Yosefu nawe nikwo kukurata bakuru be, akabashanga Dotani.
18Kwonka ku baamureebeire hare atakabahikire, baamugiira omu naama y'okumwita. 19Baagambirana bati: Ngugwo ruroota yaija. 20Mbwenu nimwije tumwite, tumunagye omu kiina kimwe ahari ebi, haza twije tugire tuti enyamaishwa engoora-nyama emuriire; reero tureebe ah'ebirooto bye biraaherere.
Yosefu okutundwa bakuru be
21Kwonka Reubeeni ku yaakihuriire, yaabamujuna naagira ati: Ka turekye kumwita. 22Reubeeni yaabagira ati: Nyaabura 'mwe mutasheesha eshagama. Mumunagye omuri eki kiina ekiri aha omu ihamba, kwonka mutamukozaho orukumu. Ekyo akakigamba ngu abone kumubakiza n'okumugarurira ishe. 23Yosefu ku yaahikire bakuru be, baamujuura ekanzu ye ey'emikono miraingwa, ei yaabaire ajwaire. 24Baamutwara, baamunaga omu kiina ekyabaire kirimu busha kitarimu maizi.
25Bwanyima baashutama kurya. Ku baimukize amaisho baareeba ekimbuuro ky'abagyenzi Abaishimaeli, nibaruga Gileadi, baine engamira zaabo zeekoreire amacanda, n'emibazi erimu emigaju n'entsinda, bari omu muhanda nibabitwara Misiri. 26Yuda nikwo kugira beene ishe ati: Mbwenu nikitugasira ki kwita murumuna waitu tukashereka ku tumwitsire? 27Nimwije tumuguze Abaishimaeli mbaba, arekye kutugwaho. Manya ni murumuna waitu, ow'orura rumwe naitwe. Beene ishe nabo baamwikiriza. 28Ago magingo abashuubuzi Abamidiyani ku baizire nibarabaho, banu baatuuhuurayo Yosefu baamwiha omu kiina, baamuguza Abaishimaeli empiiha z'efeeza makumi abiri; na bari baamutwara Misiri.
29Reubeeni ku yaagarukire ahari ekyo kiina, yaashanga Yosefu atakirimu, yaataagura ebi ajwaire. 30Atyo agaruka aha barumuna abagira ati: Omwana tariyo, mbwenu ntoore hi? 31Nabo baihayo ekanzu ya Yosefu, baita embuzi, ekanzu ye baagijabika omu shagama. 32Baakwata egyo kanzu y'emikono miraingwa, baagitwarira ishebo; haza bamugira bati: Eki nikyo tugwireho. Reeba yaaba eri ekanzu y'omwana waawe nari etari yo.
Yakobo okucurira Yosefu omutabani
33Yakobo agimanya, agira ati: N'ekanzu y'omwana wangye; enyamaishwa emuriire. Tihariho kubangaanisa, Yosefu egyo nyamaishwa emugaashwire. 34Mpaho Yakobo ataagura ebi ajwaire, ayezirika ekiguniya, amara ebiro bingi naacurira omutabani. 35Batabani be na bahara be boona baimuka kumugumyagumya, kwonka we ayanga abagira ati: Nimundekye! Ndyarugaho nshangye omwana wangye okuzimu owa Nyamuteza ninkimucurira. Nikwo ishe yaamucuriire atyo. 36Reero Abamidiyani ku baahikire Misiri, Yosefu ogwo baamuguza Potifaari omukungu wa Faraaho, owaabaire ari omukuru w'abarinzi b'ekikaari.
Ebya Yuda na Tamari
Currently Selected:
Kut 37: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
