Kut 38
38
1Omu biro ebyo Yuda akashuuma yaaruga omuri beene ishe yaataaha ow'omuntu orikwetwa Hiira Omunyadulaamu. 2Okwo niyo Yuda yaareebeire muhara w'Omunyakanaani orikwetwa Shua. Ku yaamushweire yaabyama nawe. 3Onu yaatwara yaazaara omutabani, yaamweta Eeri. 4Agaruka atwara, azaara ondi mutabani, amweta Onani. 5Ayongyera atwara, azaara ondiijo mutabani, amweta Sheela. Obwo obu amuzaara akaba ari Kezibu.
6Bwanyima Yuda akashwererera Eeri omutabani omukuru omukazi orikwetwa Tamari. 7Kwonka Eeri ogwo mutabani wa Yuda omukuru akaba ari enyabibi naagwisa kubi Nyakubaho; na Nyakubaho nikwo kumwita. 8Bwanyima Yuda yaagira Onani ati: Irooko oraarire muka mukuru waawe, omugirire ebi omuntu akorera muramu we, obone kuzaarira mukuru waawe abaana. 9Kwonka Onani akamanya ku orwo ruzaaro rutariba orwe. N'ahabw'ekyo ku yaabyamire na muka mukuru we, yaasheesha ahansi ngu atakaazaarira mukuru we abaana. 10Haza eki yaakozire kyagwisa kubi Nyakubaho, nawe yaamwita. 11Yuda nikwo kugambira Tamari omukaamwana ati: Irooko ogume ori omufaakazi omu ka ya sho, okuhitsya obu Sheela mutabani wangye araakure ahabw'okuba akaba naatiina, ngu onu atakaafa nka bakuru be. Tamari atyo agyenda, aguma owa ishe.
12Ku haahingwireho ebiro, muka Yuda muhara wa Shua yaafa. Reero Yuda ku yaarugire omu rufu, yainamuka Timuna omu bashazi b'ebyoya by'entaama ze, aine munywani we Hiira Omunyadulaamu. 13Tamari ku baamugambiire bati: Shozaara naaza Timuna kushara entaama ze ebyoya, 14yaajuura ebijwaro by'obufaakazi, yaayetwekyerera yaayehumbika, yaashutama aha irembo rya Enaimu ery'aha muhanda gurikuza Timuna; ahabw'okuba akareeba ku Sheela akuzire, kandi ku batamumuhaire kumushwera.
15Yuda ku yaamureebire, yaateekateeka ngu ni maraaya, ahabw'okuba akaba ayesangiire ahamaisho. 16Atyo akiikama amushanga aha rubaju rw'omuhanda, amugira ati: Naakweshengyereza, rugayo mbyame naiwe. Haza obwo atamanyire ku ari omukaamwana. N'onu nikwo kumubuuza ati: Noija kumpa ki, obone kubyama naanye? 17Nawe amugarukamu ati: Niinyija kukutwekyera akaana k'embuzi, nkaihe omu busyo bwangye. N'onu ati: Mbwenu noija kunkwatiriza ki okuhitsya obu oraakoohereze? 18Onu ati: Mbwenu shi nkukwatirize ki? N'onu ati: Empeta yaawe eriho akamanyiso n'orukoba rwawe, n'egi nkoni yaawe ei okwaitse. Atyo abimuha abyama nawe, haza amutweka. 19Bwanyima ogwo mukazi aimuka agyenda ajuura ebi ayetwekyereire, ajwara ebye by'obufaakazi.
20Yuda ku yaatwekire munywani we Omunyadulaamu akabuzi, ngu ogwo mukazi amugarurire ebi yaamukwatiriize, onu tiyaamushangaho. 21Nikwo kubuuza ab'omuri ogwo mwanya ati: Maraaya obaire ari Enaimu aha rubaju rw'omuhanda ari nkahi? Baamugarukamu bati: Tihariho maraaya obaire ari aha. 22Nawe agaruka ahari Yuda amugira ati: Tinaamureeba, kandi ab'omuri ogwo mwanya baagira bati: Tihariho maraaya obaire ari aha. 23Yuda atyo amugarukamu ati: Ebyo bintu k'agume nabyo bibe ebye, batakaatushekyeerera. Naiwe nooreeba ku naakutweka aka kaana k'embuzi haza otamubone.
24Ku haahingwireho ameezi nk'ashatu, abantu baagambira Yuda bati: Tamari mukaamwana waawe ahindukire maraaya, kandi aine enda ei ahire omu bwamaraaya. Yuda ati: Nimumushohoze, bamwotsye afe. 25Ogwo mukazi ku baabaire nibamushohoza, yaatuma ahari ishezaara ati: Mukama w'ebintu ebi niwe yantwekire. Ayongyera agira ati: Naakweshengyereza yetegyereze mukama w'empeta egi eriho akamanyiso, n'orukoba, n'egi nkoni. 26Atyo Yuda abyemera, agira ati: Ogu mukazi yansinga, ahabw'okuba tindamuhaire mutabani wangye Sheela. Kwonka Yuda taragarukire kubyama nawe bundi.
27Obunaku bwe bw'okuzaara ku bwahikire, omu nda ye haashangwa harimu amahasha. 28Ku yaabaire naarumwa, omwe yaashohoza omukono, omuzaarisa yaagukomaho akahuuzi karikutukura, naagira ati: Ogu niwe yaabanza kushohora. 29Kwonka ogwo mwana ku yaagarwireyo ati omukono, mugyenzi we yaashohora. Omuzaarisa nikwo kugira ati: Kandi shi ka niiwe waabanza kushohora! Nikyo yaayeteirwe Pereezi. 30Bwanyima omurumuna yaashohora aine ako kahuuzi karikutukura aha mukono, baamweta Zeela.
Yosefu okukwatsibwa eby'omuka ya Potifaari
Currently Selected:
Kut 38: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
