Kut 39
39
1Mpaho baatwara Yosefu Misiri. Reero Potifaari omukungu wa Faraaho, kandi omukuru w'abarinzi Omunyamisiri, yaamugura aha Baishimaeli abaabaire bamushuumizeyo. 2Nyakubaho yaaguma na Yosefu, yaaba omushaija orikugyenderwa gye byona. Yaaguma naaraara omu nju ya mukama we Omunyamisiri. 3Mukama we yaareeba ku Nyakubaho ari hamwe nawe, kandi ku ahaire omugisha byona ebi Yosefu arikukora. 4Atyo Yosefu yaashongoka ahari mukama we yaamugaragira. Mukama we yaamuha okureeberera eka ye, yaamukwatsa byona ebi yaabaire atungire. 5Haza okwiha obu yaamuhindura omureeberezi w'eka ye, akamukwatsa byona ebi atungire, Nyakubaho akaha eka y'ogwo Munyamisiri omugisha ahabwa Yosefu ogwo. Omugisha gwa Nyakubaho gwaguma ahari byona ebi atungire, eby'omu ka n'eby'omu ishwa. 6Mpaho byona yaabita omu bushoboorozi bwa Yosefu, kandi akimwine, tiyaagira kintu kyona eki arikujunaanwa kukora, kureka ebyokurya ebi yaabaire arya.
Ebya Yosefu na muka Potifaari
Yosefu akaba aine ahamaisho harungi kandi anyeetsire gye. 7Ku haahingwireho ebiro, muka mukama we yaamureeba, yaamurigira. Yaamugira ati: Ija obyame naanye. 8Kwonka Yosefu yaayanga; yaagira muka mukama we, ati: Ngaaha! Reeba, mukama wangye obu anyine, taine kintu kyona eky'omu ka eki arikumanya. Byona ebi atungire akabinkwatsa, 9n'egi ka tarikuginkiramu; kandi tihariho ki atarandekuriire, kureka iwe omukazi we. Mbwenu nimbaasa nta kukora ekibi kirikwingana kityo, nkacumura ahari Ruhanga? 10Ogwo mukazi, nobu araabe yaabaire agambira atyo Yosefu buri izooba, onu akaba ataikiriza kubyama nawe nari kumwehitsya.
11Eizooba rimwe Yosefu ku yaataahire omu nju kukora omurimo gwe, hatariho ondi muntu omu b'egyo ka, 12ogwo mukazi yaamukwata omwenda, yaamugira ati: Byama naanye. Onu agumurekurira ahunga aruga omu nju. 13Ogwo mukazi ku areeba onu yaamutsigira omwenda gwe, yaahunga yaaruga omu nju, 14ayeta abashaija b'omuri egyo ka, abagira ati: Nimureebe ku ibanye yandeeteire ogu Muyudaaya kuunyeshungiraho. Reeba yantaahirira kubyama naanye; naanye nikwo kuborooga. 15Ku yaareeba naayamuza nimborooga, yantsigira omwenda gwe, yaahunga yaaruga omu nju.
16Atyo ogwo mukazi abiika ogwo mwenda, okuhitsya obu mukama wa Yosefu yaagarukire omuka. 17Mpaho abimuteekyerereza ati: Omugaragwa Omuheburaayo ou waatureetsiremu, yaija ahi ndi kuunyeshungiraho. 18Kwonka ahonaaho ku naayamuza nimborooga yantsigira omwenda gwe, yaahunga yaaruga omu nju.
Yosefu okuteebwa omu kihome
19Mukama wa Yosefu ku yaahuriire omukazi we yaamugambira oku omugaragwa we yaamutwaza, ekiniga kyayenda kumubarura. 20Yaakwata Yosefu yaamwigatira omu kihome eki baabaire barindiramu embohe z'omugabe; n'onu yaakigumamu. 21Kwonka Nyakubaho yaaguma na Yosefu amwiniire rukundo etahararuka yaamuha okukundwa omurinzi w'ekihome. 22Ogwo murinzi w'ekihome yaakwatsa Yosefu embohe zaamwo zoona; na byona ebyabaire nibikorerwamu niwe yaabaire abireeberera. 23Omurinzi w'ekihome akaba ataine ki arikwemerereza omutima; ahabw'okuba byona akaba abikwatsize Yosefu kubireeberera, haza Nyakubaho yaaguma nawe, n'ebi yaabaire akora byona abibaisa gye.
Yosefu okurootorora ebirooto by'abakungu ba Faraaho
Currently Selected:
Kut 39: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
