Malëkë 14

Mikwa-lwaangu bakotë fuundu mu kuvoondë Yeesu

(Mat 26.1-5; Lik 22.1-2; Za 11.45-53)

1Fë kaambu bilumbu byooli mu kuvaangë n'saangu Paakë#14.1 Lub 12.1-27. , yimunë n'saangu mëmpa mëkaambu m'bweeli. Bëkuluutu bë singangë-Nzaambi i miloonji n'kaakë, bëlëtoombaangë buni bukubwililë Yeesu ku mësweeci i mu kun'voondë. 2Licyelikë, bëlëtubësënaangë : « Beeso kupodi ve kuvaangë lyaliili fë ntaangu n'saangu, mu kumaangë nkoongë baatu mu kututombukëlë. »

N'cyeetu wadukulë yaafë fë n'tu Yeesu

(Mat 26.6-13; Za 12.1-8)

3Yeesu wabë ku bwaalë bën'teelë Betani, ku n'zo Simu wunë wabë yi bwaasi. Buni kwaba fë meesë, n'cyeetu wusë kotë yimunë cibulikë ci alëbaatë#14.3 alëbaatë: limanyi li mpeembi like bukaalu, bën'vangilaangë bipoopo. Mat 26.7. ciwaalë yaafë yike bukaalu, bëvangilë mu biteekë bi naalë#14.3 naalë: citeekë cike nfiimbu yi mboti bën'kunaangë mu si Aziiya.. Naandi kubulë cibulikë i wusë sekulë yaafë fë n'tu Yeesu. 4Bën'viipë mu banë babë foofë bisë nyotëkënë i bisë tubënë baveekë yi baveekë : « Cibilë-mbici kutwakini-nkoli yaafë be yooyi? 5Nkani tubëyisumbisi kwaandi mu luvunu lu nkamë-tatu li binkongulu bi mboongo#14.5 6.37. i kubivaanë ke biyeembi! » Baawu bisë ke dyeengaangë n'cyeetu mu bubaalu booso. 6Kasi Yeesu wusë tubë : « Lwe m'bicyaanu n'sikë. Mu cibilë-mbici beeno lukun'vangisi lusweenu? Lyo naandi kwavaangë mu miinu liboti. 7Licyelikë biyeembi bin'kalë yiinu sintaangu syooso i mpaapë vyaasi beeno ningë lube lizolë,#14.7 Det 15.11. lum'podi kubëvangilë liboti, kasi miinu yisë yim'ba yiinu ko mu ntaangu syooso. 8Naandi wavaangë lyaambu lyo kwapodi kuvaangë. Naandi watwamisi kutuulë yaafë mu nyitwaami bwiinji kuyibelikilë bosu bëyiziikë#14.8 cikulu ci singaandë sinvuumbi si Sizwiifë sintaangu sina silëvangënaangë mu simpaangu mu kumwamunë yaafi mu kumaangë vuumbi kubolë.. 9Miinu licyelikë yakuluzabisi: fosuku faamë, fanë bën'tendulë Mpolu Mboti, mu buloongo n'viipë, bën'kwalulë linë n'cyeetu awu kwavaangë i bën'tebukë moonyi mu naandi. »

Zuda wun'toombë kusumbisi Yeesu

(Mat 26.14-16; Lik 22.3-6)

10Bwaawu Zuda Iskalyootë, wumweekë mu likuumi bëbwaali li bilaanzi, wusë ke monë bëkuluutu bë singangë-Nzaambi wubëkanyi lusumbusulu lu Yeesu. 11Baawu bisë ba mu liyaanji mu kun'yuwulu i bisë n'kani simboongo. Zuda wusë ba li kutoombë luvoto luboti mu kubësumbisilë Yeesu.

Yeesu wakwambulë ndiiwu Paakë yimunë bilaanzi byaandi

(Mat 26.17-25; Lik 22.7-14,21-23; Za 13.21-30)

12Cilumbu cin'tetë ci n'saangu mëmpa mëkaambu m'bweeli, cilumbu cyo bëlëvakulë limemë li ndiiwu Paakë, bilaanzi bi Yeesu kun'yufulë : « Faamë mbi, njeeyi zolisi beeso mu kukubelikilë ndiiwu Paakë? » 13Mu lyaawu, Yeesu wusë twamisi bilaanzi byooli, yimunë lutumu alu : « Yendaanu ku daalë, beeno lun'dyengënaanu libakëlë limweekë wuke nataangë n'kesë masi. N'laandyaanu, 14fo naandi kun'kotilë, lwe kaambyaanu wunë wubakisi n'zo: “N'loonji wun'kufulë : Kuni kukeeli civeenji cyo bëbelikilë, cinë yin'kwambulilë ndiiwu Paakë a yimunë bilaanzi byaami?” 15Naandi wululeesi, cibaangë cinenë cinë cibelikulu kalë, a yimunë byakë byooso bifwenikini. Fa foofo, faawu beeno lutubelikilë ndiiwu. » 16Bilaanzi beenë bi byooli bisë basikë i ke yendaangë ku daalë i baawu ke zakënë bunë Yeesu kubëkambilë i baawu bisë belikë ndiiwu Paakë.

17Mësikë matuuci, Yeesu wusë kutuukë yimunë likuumi bëbwaali li bilaanzi. 18Bunë babë fë meesë i baawu bëlëkwambulaangë, Yeesu wusë tubë : « Miinu yakuluzabisi ti, licyelikë: wun'viipë mu beeno wulë mu kwambulë yaami wukun'sumbisi#14.18 Twi 41.10.. » 19Bilaanzi bisë ba mu cyuundë cinenë i wumweekë-wumweekë, wusë n'kufulë : « A buni, miinu kwee? » 20Yeesu wusë bëvutulilë : « Muutu wukun'sumbisi ke wun'viipë mu likuumi bëbwaali, wulë mu kubwiikë yaami limpa mu lubuci#14.20 Banë bëtelu ku cikaanvu bëlëkwabulaangë baveekë mu lubuci lu cintwaali. Twi 41.10. . 21Cibeeni, Mwaanë muutu sya kufwa, buni bësonikinë mu cibilë cyaandi#14.21 Twi 22.2-19; Ezy 53. mu Libuuku li Nzaambi. Kasi mënyoni ke muutu wunë wun'sumbisi Mwaanë muutu! Mëyoolë muutu be woowo wuleembu kwaandi kubutu! »

Ndiiwu yi Fumu

(Mat 26.26-30; Lik 22.14-20; 1 Ko 11.23-25)

22Ntaangu bëlëkwambulilë, Yeesu kuboongë limpa i kwatoondi Nzaambi, naandi kulimukënë i kulitambikë ke bilaanzi byaandi i wusë bëkaambë : « Boongaanu aciici, cya nyitwaami. » 23Naandi kube boongooso mbuungu viinyi i kwamani kutoondë Nzaambi, wusë bëvaanë i bakë booso bisë kunwa. 24Yeesu wusë bëkaambë : « Amaama meengë maami, meengë mën'luundë n'kangulu yimunë Nzaambi#14.24 Lub 24.8; Zel 31.31-34. i mësekukë mu lukoongu lu mpaapë baatu. 25Miinu yakuluzabisi ti licyelikë: yisë bënwa ko viinyi tee cilumbu cinë yin'nwa viinyi yimoonë ku Lwaangu lu Nzaambi. » 26Baawu bisë dumisi Nzaambi mu twiimbu tu n'saangu#14.26 Mat 26.30., tee bisë ke yendaangë ku moongo miti Oliivë.

Yeesu wazabikini lutununu lu Pyeelë

(Mat 26.31-53; Lik 22.31-34; Za 13.36-38)

27Yeesu wusë kaambë bilaanzi byaandi : « Beeno booso lukun'yacikë, cibilë bësonikë mu Libuuku li Nzaambi: “Miinu yim'bulë n'liici mëmemë i mëmemë mën'yambëkënë tweeku twaaku tooso#14.27 Zak 13.7..” » 28Kasi, Yeesu wutubooso : « Bunë miinu yin'vulumukë, yilutwaminë ku Ngalilee. » 29Pyeelë wusë n'kaambë : « Ningë ti bakë booso bëkukunyacikë, miinu yisë kun'yacikë ko. » 30Tee Yeesu wusë kun'vutulilë : « Miinu licyelikë yikuzabisi: cibubwayi, mu bwiilu be buubu, bosuku susu yin'kokilë vyaasi wali, njeeyi wukun'tunë fë vyaasi tatu ti njeeyi sye kun'zaabë ko. » 31Kasi Pyeelë wusë vutulooso yi n'viingu : « Miinu yisë m'podi ko kutubë : yisye kuzaabë kuve, bosuku yilë fwa yimunë njeeyi. » Bilaanzi bimesi, bisë tubilë bo bumweekë.

Yeesu wulë mu kusambilë ku Ngetësëmaanë

(Mat 26.36-46; Lik 22.39-46)

32Baawu bisë ke tuukooso fë mbiinji bën'telë Ngetësëmaanë#14.32 Mat 26.36. i Yeesu wusë kaambë bilaanzi byaandi : « Lwe kalyaanu beeno afa, ntaangu yo miinu yin'kwendë mu kusambilë. » 33Tee naandi wusë natë yaandi Pyeelë, Zaakë i Za. Naandi wusë toonë kuwu mëbaasë yimunë lusweenu. 34Naandi wusë bëkaambë : « N'timaami weekë mu cyuundë ci lufwa. Lwe kalyaanu afa i zungululaanu. » 35Naandi wusë kwakënë mwa cinaanu, wusë yilumbikë fë n'toto i wusë sambilë Nzaambi, bwiinji ningë bum'podi, zoolë be yooyi yi simpasi yiyakënë fo fëke naandi. 36Naandi wulëtubaangë : « Abaa! O a Tataami, makë mooso kupodi, yakini fëke miinu mbuungu ayiiyi yi simpasi. Bosuku bubeeli, yaaku ti lyo yin'zolë miinu, vandi kasi lyo wuzolisi njeeyi. » 37Naandyooso wusë vutukë kuke bilaanzi bi tatu i wusë bëzakënë bëyidofaangë tolo. Naandi wusë kaambë Pyeelë : « Simu, nje wanuukë? Njeeyi wusë m'podi ko kukalë mu kuzungululë keti mu zoolë mweekë? 38Lwe zungululaanu i sambilaanu, mu kumaangë kubwa mu lisokë. Cibilë ciluunzi ci muutu ciciindë, kasi n'sunyi wudekë. »

39Naandi wusë be kwakënooso i wusë sambilë mu ke vutukilaangë mëbuungu mo më mweekë. 40Tee naandi wusë vutukooso ke bilaanzi byaandi i kubëzakënë bëyidofaangë tolo. Baawu bësye podi ko kukalë meeso mëtyemunë i baawu bësye zaabaangë ko linë li kun'vutulilë. 41Buni kwavutukë fë vyaasi yin'tatu, naandi wusë bëkaambë : « Beeno lucini n'nuukooso, beeno lulë mu kuvuundë? Lya manë! Zoolë yafwaani yi luvakululu lu Mwaanë muutu mu myooko bisumuci. 42Lwe telëmyaanu, twe yendyaanu! Monaanu, muutu wo wukun'sumbisi ke baawu wabelëmë! »

Lubwilulu lu Yeesu

(Mat 26.47-56; Lik 22.47-53; Za 18.3-12)

43Bunë Yeesu kulëtubaangooso, kuzimbukulabu, Zuda wumweekë mu likuumi bëbwaali li bilaanzi, wusë kutuukë. Naandi wabë yimunë nkoongë baatu yabë yi bisabë i biboondo bi miti. Baawu babë bëfilu ke bëkuluutu bë singangë-Nzaambi, sifumu si miloonji n'kaakë i mëkakëtë. 44Zuda, wo wulësumbisi Yeesu, wusulikilë nkoongë ciliimbu cinë naandi kun'vaangë, cyaawu aci : « Muutu wo yin'fifë, na woowo. Lwe m'bwiilyaanu i lwe n'natyaanu buboti. » 45Bunë Zuda wuyituukë, na kubelëmë Yeesu i wusë n'kaambë : « A N'loonji! » I naandyooso wusë n'fifë. 46Bëmesë bisë bwiilë Yeesu i bisë n'kaangë. 47Kasi wumweekë mu bo babë faawu, wusë volë cisabë cyaandi mu nkutu i wusë vaba ciseelu ci n'kuluutu singangë-Nzaambi i kun'cyelë kutu#14.47 Za 18.26.. 48Yeesu wusë bëkaambë : « Lufwenikinyaanu kwiisë yi bisabë, biboondo bi miti kukum'boongë buke ti cilyaani yikeeli? 49Bilumbu byakë byooso yilëbangaangë yiinu i yilëloongaangë mu kati ku n'zo-Nzaambi i lusye kum'bwiilë ko, kasi maama mavangininë bwiinji bisonë bike mu Libuuku li Nzaambi bidedëkënë. » 50Boobo, bilaanzi byakë byooso bisë n'vubikë i kutiinë#14.50 14.27.. 51N'teendë cilesi bakëlë wuyelaandaangë Yeesu, wuyiziingë lilasolë. Bëyelikë mu kun'siimbë, 52kasi naandi wusë bëlekulilë lilasolë i kutiinë mpenë-kwa.

Yeesu fë cinzonzi cinenë ci Sizwiifë

(Mat 26.57-68; Lik 22.54-55,63-71; Za 18.13-14,19-24)

53Bo bëbwiilë Yeesu bisë ke n'nataangë ku n'zo n'kuluutu singangë-Nzaambi, fo fëdukininë bëkuluutu booso bë singangë-Nzaambi, mëkakëtë i miloonji n'kaakë. 54Pyeelë wusë laandë Yeesu ku mëswaamë i wusë kotë ku kati ku luumbu lu n'kuluutu singangë-Nzaambi. Faawu, naandi wusë kalë yimunë miluungë-bwaalë i wulëkotaangë mbaasu.

55Bëkuluutu bë singangë-Nzaambi i cinzonzi cyooso cinenë bëlëtoombaangë libooti mu Yeesu mu kun'tabë lufwa, kasi baawu bësye libakë ko. 56Tiilyoko, mpaapë baatu bëfutikilë Yeesu#14.56 Twi 27.12; 35.11. mëbooti më ngaangu, kasi bëlëfindënaangë mpakë baveekë i baveekë. 57Fë siitu, bën'ka bisë manë n'telë i kun'futikilë libooti li ngaangu lin'tubë : 58« Beeso tun'yuwu kutubë : “Miinu yin'tyamunë n'zo-Nzaambi yitungulu ke baatu i fë bilumbu bi tatu yin'tulikë yin'ka yo yin'kaambu kutungulu mu myooko baatu#14.58 Za 2.19..” » 59Kasi lembuko mu cikumë be cyoocyo, baawu bëlëfindënaangë mpakë. 60N'kuluutu ngangë-Nzaambi kutelëmë fë meeyi lukoongu lu baatu i wusë kufulë Yeesu : « Njeeyi wusë n'vutulë cikumë ko mu makë mooso baatu aba bëlë mu kukufutikile? » 61Kasi Yeesu wusye vutulë cikumë ko, naandi wusë kalë swii. N'kuluutu singangë-Nzaambi wusë bën'kufulooso : « Njeeyi, nje Kliistu, Mwaanë Nzaambi wo tun'dumisyaangë? » 62Yeesu wusë cikunë : « Ngete, mi wuuwu i beeno lum'monaanu beeno booso Mwaanë muutu wun'vwaandë ku mëbakëlë më Nzaambi Nkwa-Muundë. Beeno lukum'monë yivaandi kwisilë mu mëvweeti më yilu#14.62 Twi 110.1; Dan 7.13.. » 63Bwaawu, n'kuluutu singangë-Nzaambi wusë beenzë n'vwaatwaandi i wusë tubë : « Beeso tusyeeli ko n'ciinzë bimbaanji bin'ka! 64Beeno lwakuwu cifiingu cinë naandi wafiingë Nzaambi. Mu beeno buni lum'balilaanwee? » Bakë booso bisë tubë ti libe fwaanë kun'tabulilë lufwa#14.64 Lev 24.16.. 65Bën'ka mu nkoongaawu bisë kutamë matë ke Yeesu, baawu bisë kun'fukë ciinyi, kun'tuutë mënkomi i bisë n'kaambë : « Tesyoobo, nani wakuvaangë mamoomo! » I fë siitu miluungë bisë boongë Yeesu i kum'bulë bifusi#14.65 Ezy 50.6..

Pyeelë watunë Yeesu

(Mat 26.69-75; Lik 22.56-62; Za 18.15-18; Za 18.25-27)

66Bunë Pyeelë wabë fësi ku kati ku luumbu, ciseelu cimweekë ci n'cyeetu ci n'kuluutu singangë-Nzaambi kwiisë kuunë. 67Naandi kwamoni Pyeelë wulëkotë mbaasu, na kun'talë buboti i wusë n'kaambë : « Njevaaku, wuba yimunë Yeesu, musë livulë li Nazaleetë. » 68Kasi naandi wusë kutunë i kutubë : « Miinu wuuwee, yisye n'zaabë ko, yisë n'kuwu ko mo njeeyi wulë mu kutubë. » Tee naandyooso wusë basikë ku ngaandë luumbu. Susu kusundilooso kokilë. 69Kasi ciseelu beenë ci n'cyeetu wum'monë i wusë sisiminë fë meeso më bo bëyabë foofë : « Muutu owo yivaandi wabë yaawu! » 70Pyeelë wusë be tunooso. Mwa cinaanu, bo bëyabë foofë bisë be kaambooso Pyeelë : « Cibeeni, njeeyi wuke wun'viipë mu baawu, cibilë, nje yivaaku musë libweeti li Ngalilee. » 71Tiilyoko, Pyeelë wusë losukë : « Nzaambi wukun'sifë ningë ti yilë mu kutunë! Miinu yalefë mpesë, yisye zaabë ko muutu be woowo. » 72Mo mu ntaangu beenë, susu kokilë fë vyaasi yimwaali i Pyeelë wusë tebukë moonyi manë Yeesu wun'kaambë : « Ntetë susu kukokilë mu vyaasi wali, njeeyi wukun'tunë vyaasi tatu ti, njeeyi sye kun'zaabë ko. » Tee, naandi wusë yivoondë mu kulilë.

Currently Selected:

Malëkë 14: NTVIL

Highlight

Copy