Malëkë 15

Yeesu fë ntwaalë Pilaatë

(Mat 27.1-2,11-14; Lik 23.1-5; Za 18.28-38)

1Mu mbingu menë-ngwaali, bëkuluutu bë singangë-Nzaambi bisë kudukënë mu lukoongu yimunë mëkakëtë i miloonji n'kaakë, dedë ti cinzonzi cyakë cyooso cinenë. Baawu bisë kaangë Yeesu bikonyi, bisë ke n'nataangë i ke n'vakulë ke Pilaatë. 2Pilaatë wusë n'yufulë : « Njeeyi wuli n'tinu wu Sizwiifë? » Yeesu wusë n'vutulilë : « Njeeyi, walitubë#15.2 Mat 27.11.. » 3Bëkuluutu bë singangë-Nzaambi bisë kwiikë mpaapë mëbooti mu Yeesu. 4Tee Pilaatë wusë bën'yufulë vyaasi yin'ka: « Wusë n'vutulë cyosuku cikumë kwee? Nje wulë mu kuwu lutaangu lu mëbooti, lunë baawu bëlë mu kukukwiikee? » 5Akasi Yeesu sye vutulë cyosuku cikumë ko. Bwaawu, Pilaatë wusë kutulumukë.

Yeesu ban'tabë lufwa

(Mat 27.15-26; Lik 23.13-25; Za 18.39—19.16)

6Mu kadë n'saangu wu Paakë, Pilaatë wulë baasyaangë wumweekë mu peleeso, wunë wo nkoongë baatu kun'loombë. 7Kosuku, wun'viipë bëlëteelaangë Balabaasë wabë mu peleeso a yimunë bivadë-mbi, wunë wuvoondë muutu mu ntaangu buungë-ntwaali. 8Nkoongë yisë kweendooso ku n'zo Pilaatë i bakë booso bisë kun'loombë linë mu kadë vyaasi kulë bëcikuninaangë. 9Pilaatë wusë bëcikuninë : « Beeno lun'toombë yilubasilaanu n'tinu Sizwiifë? » 10Licyelikë, naandi wulëzaabë kwaandi buboti, bëkuluutu bë singangë-Nzaambi bëyen'vakulilë Yeesu mu n'soci. 11Akasi bëkuluutu bë singangë-Nzaambi, bisë sindikilë nkoongë baatu mu kuloombë ke Pilaatë mëyoolë kubëbasilë Balabaasë. 12Pilaatë wusë be kufulë vyaasi yin'ka nkoongë baatu: « A buni lutombilë beeno mo yivaangë mu awu lun'telaangë n'tinu Sizwiifë? » 13Baawu bisë kun'cikuninë mu kulosukë : « M'baandyaanu! » 14Pilaatë wusë be bëyufulë : « Libi mbici naandi kuvangisi? » Akasi baawu bisë losukooso beenë : « M'baandyaanu! » 15Abu Pilaatë wuzolë kutoonzi n'timë nkoongë baatu, wusë bëbasilë Balabaasë i bisë kubulë Yeesu siswaali si nzibulë-mbumë i kun'vakulë bwiinji bëm'baandë fë kuluusu.

Mësodaadi bakë n'dyeengë Yeesu

(Mat 27.27-31; Za 19.2-3)

16Mësodaadi bisë natë Yeesu ku katyaasi ku luumbu lu n'tinu, i baawu bisë kutelë nkoongë yooso yi mësodaadi. 17Baawu kun'vwiikë ciyuungë ci kalënaadë, i baawu bisë folikë m'pu mu bitafi bi siseendë i bisë kun'vwiikë yaawu fë mbatë n'tu. 18Tee baawu bisë siimbë like m'bilaangë : « Mëleembyo ma, a n'tinu Sizwiifë! » 19Baawu ke n'komëtaangë liveeso fë mbatë n'tu, kun'taminë matë, ke fukumaangë i ke bongëmaangë fë ntwaalaandi. 20Abu bamani kun'dyeengë buboti, baawu bisë kun'vulë ciyuungë ci kalënaadë, bisë kun'vutulilë n'vwaatwaandi, i bisë ke n'nataangë ku ngaandë mu kum'baandë.

Bakë m'baandë Yeesu fë kuluusu

(Mat 27.32-44; Lik 23.26-43; Za 19.17-27)

21Baawu bëmonë muutu mweekë mu lizinë li Simu, wufuminë ku solë. Naandi wuba musë bwaalë bën'telë Sileenë i wuba tatë Alekëzandëlë i Lufusë#15.21 Lom 16.13.. Mësodaadi bisë n'kacikë mu kunatë kuluusu yi Yeesu. 22Baawu bisë natë Yeesu ku moongo bën'teelë Ngolëgotë, dedë ti : « Faamë fëke Lidokusu li N'tu ». 23Baawu bëzolë kun'wiikë viinyi bëbuundë mu yaafë yivangininë mu mëkayë më n'ti bën'teelë miilë, akasi Yeesu wusë maangë kunwa. 24Abu bamani, baawu bisë m'baandë fë kuluusu i bisë kabënë n'vwaatwaandi, i kutabë cimpya mu kuzaabë kadë muutu cinë kufwenikini kubakë#15.24 Twi 22.19.. 25Yiba vwa li zoolë yimenë-ngwaali, bunë bam'baandi fë kuluusu. 26Libayi lin'sulikilë ntoondo yinë bum'bandilë, bësonikë ti : « N'tinu Sizwiifë ». 27Bëbaandë yivaandi bilyaani byooli fë sikuluusu fanë fabë Yeesu, wumweekë ku mëbakëlë maandi i wumesë ku mëcyeetu maandi. 28Boobo bwa, bën'sulikilë Libuuku li Nzaambi bën'sonikë: « Naandi bën'tuulë mu lutaangu lu bilyaani#15.28 Lik 22.37; Ezy 53.12. »

29Bo bëlë vyookë, ke n'fiingaangë i ke n'niinjyaangë n'tu i bisë ke n'kaambaangë : « Ngete mati! Njeeyi wuzolë kutyamunë n'zo-Nzaambi i kube tulikë yin'ka fë bilumbu bi tatu#15.29 14.58; Twi 22.8; Za 2.19. , 30yivuuci njeveekë, kulukë fë kuluusu! » 31Bo bumweekë, bëkuluutu bë singangë-Nzaambi i miloonji n'kaakë ke dyeengaangë Yeesu i bisë ke tubënaangë baveekë yi baveekë : « Naandi wuvuuci baatu bën'ka, vandi naandi podi ve kuyivuuci naveekë! 32Kliistu n'tinu Islayeelë, kwakulukë buyifanwabu fë kuluusu! Ningë tube monë lyalyooli, mweeni, tun'ta lyaanë mu naandi. » Bo bëbaandu fë kuluusu yimunë Yeesu, bëlën'fiingaangë yivaandi.

Lufwa lu Yeesu

(Mat 27.45-56; Lik 23.44-49; Za 19.28-30)

33Fë ntaangu-mbatë, citoombi cisë ba mu si yakë yooso i cisë ziingë tee fë zoolë kuumi yin'taanu mu m'bukulu-bwiisi. 34Fë zoolë kuumi yin'taanu be yooyi, Yeesu wusë losukë yi n'viingu wooso: « Eloyii, Eloyii, lama sabataani? » – Dedë mweekë ti : « A Nzaambyaami, a Nzaambyaami, mbici wakum'buminë#15.34 Twi 22.2.? » – 35Mwa mpooko mu banë buyabë foofë bisë n'kuwu, i bisë losukë: « Yuwaanwee, naandi watelë Eli! » 36Wumweekë mu baawu wusë kumbelëlë wusë bonjikë likaanvu mu viinyi yi nkakutu#15.36 Twi 69.22. i kulikwiikë fë sosu liveeso, i wusë litambikë ke Yeesu mo kunwa, i wusë tubë ti : « Vinganoobo, beeso syatumonë ningë Eli wun'kwisë mu kun'kululë fë kuluusu! » 37Kasi Yeesu wusë losukë mu mbeembu nkamë i wusë manë moonyi. 38N'lelë wulëbangaangë munë kati ku n'zo-Nzaambi#15.38 Lub 26.31-33. wusë bën'zukë fë meeyi mu bibeenzë byooli kutoninë ku yilu tee yi fanë si. 39Ntaangu yo n'kuluutu wu nkamë li mësodaadi më Loomë#15.39 buni kufwiilë: bisonë bimesi bi ntamë bin'tubë kulëlosukë., wulëbangaangë fë ntwaalë Yeesu, kwamoni buni Yeesu kufwiilë, naandi wusë kutubë : « Muutu awu wuba nguliku Mwaanë Nzaambi! » 40Mwa mpooko bëcyeetu bëyabë faanë yivaandi, bëtelëminë cinaanu i bëlëmonaangë. Mu bëcyeetu beenë, yabë Maali li bwaalë bu Magëdaalë, Maali, mamë Zaakë bën'telaangë n'teendë i Zoose, yimunë n'cyeetu bën'teelë Salomee. 41Baawu obo, ba bëyelaandaangë Yeesu i ke n'salilaangë, bunë baawu bëba ku Ngalilee. Wuba yivaandi foofë mpaapë bëcyeetu bëyisë yaandi ku livulë li Yelusaleemë.

Luzyamunu lu Yeesu

(Mat 27.57-61; Lik 23.50-56; Za 19.38-42)

42Mësikë matuuci, yabë lubelukulu lun'twaminë cilumbu ci saba. 43Wun'viipë bën'telaangë Zozeefë, musë livulë li Alimaatë#15.43 Mat 27.57., wuyendë kuunë. Naandi wuba likundaalë bëlëcinzikaangë mu lukoongu lu cinzonzi cinenë ci Sizwiifë. Naandi yivaandi wulëciingaangë Lwaangu lu Nzaambi. Bwaawu, Zozeefë kwayendi yi nkasu yooso ke Pilaatë mu ke loombë nyitu yi Yeesu. 44Kasi Pilaatë wusë tulumukë mu kuzaabë ti naandi wumanë fwa. Naandi wusë telë n'kuluutu wu nkamë li mësodaadi i wusë n'yufulë mooti Yeesu wufwiili yi cinaanu. 45Bunë kwabaci n'vutu wu n'kuluutu wu nkamë li mësodaadi, wusë vaanë n'swa ke Zozeefë mu kuboongë vuumbi Yeesu. 46Zozeefë wusë suumbë lilasolë limoonë, i wusë kululë vuumbi fë kuluusu, i kuyiziingë mu lilasolë i wusë yituulë mu ndwaasi bësikë mu limanyi li ngooto. Tee i wusë kundubulë limanyi linenë mu kuzibikë nkotulu libuumbë. 47Maali li Magëdaalë i Maali mamë Zoose bëlëtalaangë kuni bën'tuulë vuumbi yi Yeesu.

Currently Selected:

Malëkë 15: NTVIL

Highlight

Copy