Malëkë 16

Luvulumuku lu Yeesu

(Mat 28.1-8; Lik 24.1-12; Za 20.1-10)

1Bunë cilumbu ci saba cyavyooci, Maali li Magëdaalë, Maali li mamë Zaakë i n'cyeetu bën'teelë Salomee bisë suumbë yaafë yi nfiimbu mu kwe mwamuni mu vuumbi yi Yeesu. 2Mu mbingu menë-ngwaali yi cilumbu ci lumiingu, fë mëselukulu më ntaangu, baawu bisë kweendë ku libuumbë. 3Baawu bisë ke tubënaangë baveekë i baveekë : « Nani wum'podi kutukundubulilë limanyi lizibikë nkotulu libuumbee? » 4Vandi kasi baawu bunë bamoni, bisë monë limanyi lyo lyabë linenë, bunë livengëminë fë ntokoongo. 5Tee baawu bisë kotooso ku libuumbë i bisë monooso foofë, n'teendë cilesi bakëlë, wukalë ku mëbakëlë, wuvwaatë lizweeli li mpeembi i baawu bisë ba yi boomë. 6Kasi naandi wusë bëkaambë : « Lwe baanu yi boomë ko. Beeno lun'toombë Yeesu li Nazaleetë, wo bëbaandë fë kuluusu. Naandi wavulumukë! Naandi wukeeli faafë ko. Monaanu fo bën'tuulë. 7Lwe yendyaanu buyifanwabu mu ke kaambë lyaliili ke bilaanzi byaandi, yivaandi ke Pyeelë : “Naandi watwaamë ku Ngalilee. Kwa kunë kunanaani kwaawu lukum'mweenë, bunë naandi kulukambilë#16.7 14.28..” » 8Bunë babasikë i bisë tiinë cinaanu yi libuumbë i bisë ba mu lutekutu yi boomë. Bisye tubë ko lyosuku lin'viipë ke wosuku muutu, cibilë baawu bëyabë yi boomë.

Yeesu wumonikënë Maali li Magëdaalë

(Mat 28.9-10; Za 20.11-18)

[9Bunë Yeesu wusë vulumukë, mu mbingu menë-ngwaali yi cilumbu ci lumiingu, naandi wusë kumonikinë cin'tetë ke Maali li Magëdaalë, wunë kukulilë saambwali li biluunzi bibi. 10Naandi wusë kweendë mu ke leelë mpolu kuke bilaanzi byaandi. Baawu bëba mu cyuundë i bisë ke yivoondaangë kulilë. 11Vandi kasi baawu bayuwu, mo kulëtubë : « Yeesu wuke moonyi, miinu yam'monë! » Kasi baawu bësye n'vitikilë ko.

Yeesu wuyimonikë ke bilaanzi byooli

(Lik 24.13-35)

12Kumanoofo, Yeesu kubëmonikinë nteku yin'ka kuke bilaanzi byooli babë mu nzilë yikwendilë ku bwaalë. 13Baawu bisë vutukë mu ke leelë mpolu ke bayaawu bën'ka, kasi baawu yivaawu bisye bëvitikilë ko.

Yeesu wuyimonikë ke likuumi cilaanzi cimweekë

(Mat 28.16-20; Lik 24.36-49; Za 20.19-23; Mëv 1.6-8)

14Kumanoofo, Yeesu wusë monikë kuke likuumi cilaanzi cimweekë mu ntaangu bëlëkwambulilaangë. Naandyooso wusë bëseembë mu lukaambu lwaawu lu ciminu i mu mitimaawu yikafëkënë ke baatu bo bëm'monë yi moonyi fë mbusë luvulumuku lwaandi. 15Naandi wusë bëkaambë : « Yendaanu bwendi buloongo n'viipë mu ke tenduli Mpolu Mboti ke baatu bakë booso#16.15 Mëv 1.8.. 16Wunë wuke ciminu wum'batizyaalu, wun'vuukë, akasi wunë wun'kaambu kuta lyaanë, wun'tabu lusifu. 17Banë bata maanë, bën'zabukunu mu biliimbu abi : baawu, bën'kumbisi biluunzi bibi mu lizinë lyaami. Baawu bën'tubë simbeembu simoonë. 18Ningë baawu bësiimbë sinyokë, kaambofo bën'wa cibi mu kufwa, lisë bëvaangë simpasi ko. Baawu bën'tendikë bibeedo myooko i baawu bëm'belukë. »

Yeesu wanangukë ku mëyilu

(Lik 24.50-53; Mëv 1.9-11)

19Bunë kwamani mu kubëkambilë katyoobo, Fumu Yeesu wusë kweendë ku mëyilu i wusë vwaandë ku mëbakëlë më Nzaambi#16.19 Mëv 1.9-11.. 20Bilaanzi bisë ke yendaangë mu ke tendulaangë fosuku faamë Mpolu Mboti. Fumu wulë ke bëzudyaangë mu cisalu be cyoocyi i ke visyaangë cyelikë mu ndoongulwaawu mu biliimbu bi kwaatë-yekë binë bike bëvekisyaangë.]

Currently Selected:

Malëkë 16: NTVIL

Highlight

Copy