Malëkë 13

Yeesu wazabikini luvongumunu lu n'zo-Nzaambi

(Mat 24.1-3; Lik 21.5-7)

1Yeesu abu kubasikë mu n'zo-Nzaambi, wumweekë mu bilaanzi byaandi wusë n'kaambë : « A N'loonji, monoobo a mpilë mëmanyi kun'yeefee, a mpilë sintungulu sin'tolee! » 2Yeesu wusë kun'cikuninë : « Nje wulë mu kumonë kutolë si sintungulu asi? Kusë n'syaalë ko faafë limanyi limweekë lin'tetëmë fë yilu lin'ka. Makë mooso mëbulumukë. »

Yeesu wazabikini simpasi i sinkwamusu silë mu kwiisë ku ntwaalë

(Mat 24.4-8; Lik 21.5-7)

3Yeesu wabë wukalë fë yilu moongo miti Oliivë, fë ntwaalë n'zo-Nzaambi, ku mpeengë, Pyeelë, Zaakë, Za yimunë Andëlee bisë n'yufulë : 4« Tukaambyoobo, ntaangu mbici mamoomë mëvanganinë, ciliimbu mbici cin'leesi ntaangu yinë makë mooso mën'vangininë? »

5Tee Yeesu wusë ba mu kubëkaambë : « Lwe baanu yi mëlyeelë, keelaanu mu kumaangë muutu kulupuutë. 6Mpaapë baatu bën'kwisë mu lizinë lyaami, bën'tubë : “Awu miinu Kliistu!” Bëm'puutë mpaapë baatu. 7Bunë lun'kuwaanu ncyeembi yi mëvitë mëbelëmë i mëlolombi yi mëvitë më cinaanu, lwe bacyaanu boomë ko. Fwenikini mamoomë kuvangënë, vandi kasi kusë mba situkulu buloongo be buubu ko. 8Mboongu baatu mba yin'nwanisi mboongu baatu yin'ka i lwaangu lun'zudikini lwaangu lun'ka. Bum'ba lututumuku lu n'toto mu mpaapë mëbweeti a yimunë cibuyi. Lim'ba buka misoongu yin'tetë yikubutilë. 9Kasi mu beeno, lwe kebyaanu mu benuveekë i benuveekë. Kasi baatu bëluvyoosi fë ntwaalë binzonzi. Bëlubulë mu kati ku cizutununu, lun'tubë cinzonzi fë ntwaalë mitinu i fë ntwaalë sifumu si lwaangu, mu cibilë cyaami, mu kuba cimbaanji cyaami fë ntwalaawu baawu. 10Mu bwaawu, fwenikini ntetë Mpolu Mboti kutendukë kuke mboongu baatu yooso. 11Ningë ti balubwiilë mu kulunatë fë ntwaalë cinzonzi, keelë lulëbaanu ntetë lusweenu mu manë lufwenikini kutubë, vandi kasi lwe tubyaanu mëbuungu manë bëluvaanë mu ntaangu be yiina, cibilë mëbuungu misë n'fuminë kuve ke beeno, kasi ke Ciluunzi ci Saantu. 12Baanë bë nguli bën'vakulë baanë yaawu bë nguli mu kubëvangisi kufwa i mëtaatë bën'vangilë bo bumweekë mu baanë baawu. Baanë bëm'balukilë mëtaatë maawu i bëbëvangisi lusifu lu lufwa#13.12 Mis 7.6.. 13Bakë booso bëluleendë mu cibilë cyaami miinu. Kasi wunë wun'ciimbë moonyi, tee fanë siitu, wun'vuukë. »

Civadë-mbi

(Mat 24.15-28; Lik 21.20-24)

14« Bunë lum'monë wo bën'telë “Civadë-mbi” : wum'budulaangë, wuke kali fanë naandi wusye fwanëkënë ko. – Wunë wun'taangë, kwe zaabi lyaawu buboti! – Bwaawu, banë bëm'ba ku libweeti li Zudee, bëfwenikini kutiinë ku lweeku lu myoongo#13.14 Dan 9.27; 11.31; 12.11.. 15Wunë wum'ba fë beedi n'zwaandi, keelë naandi kutuukë mu ke boongë cyosuku ciimë ku kati#13.15 Mat 24.17.. 16Wunë wum'ba mu sisolë, keelë naandi kuvutukë ku bwaalë bwaandi mu ke boongë ciyuungë cyaandi. 17A mënyonyee, mu bilumbu be binë binanaani, mu bëcyeetu bëm'ba mu bweembë i bo bëm'ba mu kwemikë! 18Lwe sambilyaanu Nzaambi mu kumaangë mamoomë kwisilë mu sintaangu simbi! 19Cibilë, mu bilumbu be binë binanaani, mënyoni mëm'ba miinji kuvyokilë i mo baatu bëmonë fë ntonunu buloongo n'viipë, bunë Nzaambi kwavaanji makë mooso, tee fë bubwaafa, cin'velë ve civangënooso ci mpilë oyo#13.19 Dan 12.1.. 20Ningë ti Fumu sye vaangë ko ntaangu be yooyi yiba yi n'kufi, muutu ve wulëpodi kuziingë. Kasi naandi wuvangisi yaawu bukufi mu cibilë ci bo naandi kusoolë. 21Ningë ti muutu wulukaambë : “Talaanu Kliistu wukeeli afa!” Kaambofo “Naandyaawu afaafa!” Lun'vitikaanu ko. 22Cibilë bitamaanë bi lupuutu i mibici yi ngaangu bëm'monikë, baawu bën'vaangë biliimbu i bimaaku mu kupuutë baatu, tee yi kupodi kupuutë banë Nzaambi kwasoolë. 23Mu bwaawu, beeno lukebaanu! Miinu yalulubulilaanu mu makë mooso mën'kwisë kun'twaalë. »

Lwisulu lu Mwaanë muutu

(Mat 24.29-31; Lik 21.25-28)

24« Kasi mu bilumbu be binë binaani, fë mbusë ntaangu mënyoni, muunyi wum'ba pipitii i ngoondi yisë be lesikë ko, 25simbotë simbwa lu yilu i tuleendo tuke ku mëyilu tun'tutumukë#13.25 v. 24-25; Ezy 13.10; 34.4; Ezk 32.7; Zow 2.10; 3.4.. 26Mu bwaawu, bëm'monë Mwaanë muutu wun'kwisilë fë meeyi mëduungë yimunë mpaapë luleendo i bumpumu#13.26 Dan 7.13.. 27Tee naandi wun'filë siyaanzi mu tweeku tooso tu na tu buloongo, mu kukucikë baatu booso bo Nzaambi kusoolë#13.27 Det 30.4; Zak 2.10; Nem 1.9.. »

Liloonji mu linë lin'talë n'ngengë

(Mat 24.32-35; Lik 21.29-33)

28« Lwe bakulyaanu suundu liloonji li n'ngengë : Ntaangu yo bitafi byaandi bin'funsulilaangë i mëkayi mëmoonë mabasikë, beeno lun'zaabaangë ti ntaangu sinvulë yabelëmë. 29Mpilë mweekë, ntaangu lum'mweenë biimë be byoobi kuvangënë, zaabaanu ti lwisulu lu Mwaanë muutu lwabelëmë. Naandi weekë fë livitu. 30Miinu licyelikë yilukaambë : baatu bëlë mu kuziingë sintaangu asi bë kusë yifwiilë ko yin'tetë mamoomë kuvangënë. 31Liyilu i n'toto bin'vyookë, kasi mëbuungu maami mësë n'vyookë ko. »

Nzaambi vwiili wuzabisi ntaangu yi siitu

(Mat 24.36-44)

32« Boobo muutu ve wunë wuzabisi cilumbu i zoolë keti siyaanzi ku mëyilu, yi keti naveekë Mwaanë, wo Taatë vwiili wulizabisi. 33Kebaanu! Zungululaanu, cibilë lusye zaabë ko cilumbu cyo mamoomë mëvanganinë. 34Bum'beelë dedë mweekë, muutu wun'kwendë mu mweendo. Naandi kubiikë n'zwaandi i kutumë bisasi byaandi mu kuyikeelë buboti, naandi kuvaanë cisalu cifwenikini ke kadë cisasi i kutumi n'luungë livitu mu kuzungululë. 35Lyabwiilë obo, zungululaanu, cibilë beeno lusye zaabë ko ntaangu yo Fumu n'zo wun'kwisilë. Nkanë lim'podi kuba yi mësikë, kaambofo fë katyaasi ku bwiilu, kaambofo mu bicyecyelu bi bwiisi, kaambofo yimenë. 36Ningë naandi be kwiisë cimpulumuci, sye fwaanë ko naandi kuluzakënë luyidofaangë tolo. 37Mo miinu yilë mu kulukaambë ama, yilë mu kukaambë beenë booso : Lwe zungululaanu! »

Currently Selected:

Malëkë 13: NTVIL

Highlight

Copy