Malëkë 12

Sasafë yi bivasi bi bubaalu yi miti-viinyi

(Mat 21.33-46; Lik 20.9-19)

1Yeesu wusë toonë mu kubëkambilë mu sisasafë: « Libakëlë lin'viipë livatë solë miti viinyi#12.1 Ezy 5.1-2.. Naandi kuyizukë mpakë. Naandi kusikë libulu li kukaminë mëkuundi më viinyi. Naandi kutulikë cibaangë ci ciluungë n'zo. Fë mbusë naandi kubiikë solë be yooyi mu myooko bivasi. Tee wusë ke yendaangë mu mweendo. 2Ntaangu yikuvelilë yafwaani, wusë filë ciseelu cimweekë kuke bivasi mu kubakë cyaandi cikuuku cim'butë yi solë miti viinyi. 3Abu bazudikini ciseelu, baawu kun'tuutë-nkubë i bisë n'vutulë myooko mpafëlë. 4Fumu solë wusë be filooso ciseelu cin'ka i bëm'bulë ku n'tu i bisë m'budulë. 5Naandi kube filooso ciseelu cin'ka i bivasi solë bisë n'voondë. Fumu solë wusë kufilooso mpaapë biseelu bin'ka, kasi bivasi solë kubulë bëmesë i kuvoondë bën'ka. 6Naandi wusyaalë tokë yi mwanaandi wu mëdilë. Naandi wusë n'filë fë siitu, cibilë wulëbalaangë: “Baawu bën'cinzikë mwanaami.” 7Kasi bivasi obyo bisë bokëtë baveekë i baveekë: “Wum'byalilë lifwa naandyaawu. Yisaanu tun'voondaanu, bwiinji lifwa li solë ayi liba liitu!” 8Mu lyaawu baawu bën'zudikini i bisë n'voondë i kulakë vuumbyaandi ku ngaandë yi solë miti viinyi. »

9« Fa foofë, fumu solë miti viinyi mbici kufwenikini kuvaangë? Naandi wun'kwisë i wun'vangisi kuvoondë bivasi solë i wun'vaanë solë ke bivasi bin'ka. 10Lusye taangë kwe Libuuku li Nzaambi bunë bësonikinë:

“Limanyi lyo bituunji bëbaayi,

lyaawu lyacitukë limanyi linkumë.

11Lyaawu lifuminë ke Fumu,

mu beeso, mati liboti#12.11 Twi 118.22-23.!” »

12Bëkuluutu bë Sizwiifë, bëlëtoombaangë kubwiilë Yeesu, kasi bëlëtiinaangë boomë nkoongë baatu yabë faanë. Licyelikë, bisë zaabë ti, mu cibilë cyaawu, kutubilë sasafë ayi. Baawu kum'biikë i bisë ke yendaangë.

Mpaku bën'futilë ke n'tinu Sezaalë

(Mat 22.15-22; Lik 20.20-26)

13Baawu kufilë mpooko Sifalisyaanu i bo bëke mu cinguuku ci Eloodë#12.13 cinguuku ci Eloodë: 3.6. ke Yeesu mu kun'sokë libuungu. 14Baawu kwiisë, kun'yufulë : « A N'loonji, beeso tuzabisi ti njeeyi cyelikë wukeeli i njeeyi boomë ve mu wosuku muutu. Njeeyi wusë m'monaangë cinaangë ci muutu ko, kasi wun'loongaangë mu bucyelikë bu Nzaambi bunë beeso tufwenikini kuzingilë. Tukaambyoobo, beeso tuke yi n'swa wukufutë mpaku ke n'tinu Sezaalë? Vo buni, beeso kufutë, voo kufutë mpa? » 15Kasi Yeesu, abu kuzaabë bumpilë-mpiipi bwaawu, naandi kubëvutulilë : « Mu mbici lwakun'sokilë libuungwe? N'twalilaanu cinkongulu cimweekë ci mboongo bwiinji yicimonë. » 16Baawu kun'twalilë cinkongulu beenë. Yeesu kubëkufulooso : « Ciinyi aci i bisonë abi, bi nanye? » — Baawu bisë n'vutulilë: « Bi n'tinu Sezaalë. » 17Oboobo, Yeesu kubëkaambë : « Vutulaanu ke Sezaalë, binë bi Sezaalë i ke Nzaambi binë bi Nzaambi. » Baawu kusiminë, kubookë.

Cyuufu mu luvulumuku lu baatu bëfwa

(Mat 22.23-33; Lik 20.27-40)

18Sisadusyaanu kwiisë kutakënë Yeesu. – Baawu baati, baatu bëfwa bë kusë n'vulumukaangë ko#12.18 Mëv 23.8.. – Baawu kun'yufulë : 19« A N'loonji, Moyiizë wutuvaanë n'kaakë awu: “Libakëlë limwe fwa, kubiikë n'fwiili, yi mwaanë ve, mwanaandi nguli wufwenikini kukweelë n'fwiili bwiinji kuvaanë ndaandu mu mwanaandi nguli wufwa#12.19 Det 25.5-6..” 20Vandi, fabë saambwali li banë bë nguli. N'kuluutu kukweelë n'kasi i kufwa, mwaanë kubiikë mpa. 21Wumwaali, kukweelë n'fwiili, navaandi kufwa i mwaanë kubiikë ve. Wun'tatu kuvangilë bo bumweekë. 22Lisaambwali lyooso li baanë bë nguli kufwa i mwaanë kubiikë ve. Fë siitu, n'cyeetu wusë kufwa yivaandi. 23Cilumbu ci luvulumuku, ntaangu yo baatu bëfwa bën'vulumukë, naandi n'cyeetu be woowo wum'ba n'kasi nanye? Cibilë lisaambwali lyooso lin'citulë n'kasyaawu! » 24Yeesu kubëvutulilë : « Beeno lwaziimbu, cibilë lusye zaabë ko Bisonë, keti luleendo lu Nzaambi. 25Cyelikë yilukaambë, fë luvulumuku lu bo bëfwa, bëbakëlë i bëcyeetu kubëkwelënë ve, cibilë baawu mba bën'zingilë buke siyaanzi ku mëyilu. 26Mu lyaambu li luvulumuku lu baatu bëfwa, buni, beeno lusye taangë kwe Libuuku li Moyiizë, n'zisi wu livuundë lilëvya mbaasu, bunë Nzaambi wun'kambilë? Naandi wun'kaambë : “Miinu yilë Nzaambi yi Abalaamë, Nzaambi yi Isaakë, Nzaambi yi Zakoobë#12.26 Lub 3.2,6..” 27Nzaambi, wukeeli ko Nzaambi yi baatu bëfwa, kasi Nzaambi yi baatu lu moonyi. Cibeeni, beeno mu buziimbu bunenë lukeeli. »

Lutumu luvyokilili bunenë

(Mat 22.34-40; Lik 10.25-28)

28Wun'viipë mu nkoongë miloonji n'kaakë, wuyuwu bunë bëlëfindënaangë mpakë, kwamoni bunë Yeesu kuzaabë buni bukucikuninë Sisadusyaanu, wusë m'belëmë i kun'yufulë : « Mu tutumu twakë tooso, lunë luvyokilili bunenë? » 29Yeesu kun'vutulilë : « Lutumu luvyokilili bunenë lwaawu alu : “Yuwo a mboongu Islayeelë, Fumu Nzaambiitu, wumweekë vwiili kukeeli. 30Zolë Fumu Nzaambyaaku yi n'timaaku wooso, yi ciluunzi cyaaku cyooso, yi mbalulwaaku yooso, yi mëngolo makë mooso#12.30 Det 6.4-5..” 31Lutumu lumwaali lwaawu alu : “Zolë mbaasyaaku buke njeveekë#12.31 Lev 19.18..” Tukeeli ko tutumu tun'ka tuvyokilili bunenë yi tutwaali atu. » 32N'loonji n'kaakë kun'vutulilë : « Cibeeni, a N'loonji, lyo watubë, cyelikë likeeli. Nzaambi wukeeli wo naveekë vii, wun'ka ve kanuku wo naandi vwiili#12.32 Det 4.35.. 33Wosuku muutu wufwenikini kun'zolë yi n'timaandi wooso, yi mëlyeelë maandi mooso, yi mëngolo maandi mooso i kuzolë yivaandi mbaasyaandi, buke naveekë. Tutumu atu twiinji n'ciinzë yi mëkabu mooso i bivakuli bi bibulu#12.33 Ose 6.6.. » 34Yeesu kwamoni ti wacikunë yi bungelë bwaandi booso, wusë kun'kaambë : « Njeeyi wusyeeli ko cinaanu yi Lwaangu lu Nzaambi. » Kumanoofo, muutu ve wusë bën'yufulooso lin'viipë.

Kliistu i Daviidë

(Mat 22.41-46; Lik 20.41-44)

35Abu Yeesu kulëbëloongaangë mu n'zo-Nzaambi, wusë bëyufulë : « Buni miloonji n'kaakë bëm'podi kutubilë ti, Kliistu wuli mwaanë Daviidë? 36Naveekë Daviidë, mu Ciluunzi ci Saantu, wutendulë :

“Fumu Nzaambi wukaambë Fumwaami :

Yisë vwaandë ku mëbakëlë maami,

tee yi fanë yin'tuulë simbeenyi syaaku bilyatulu byaaku#12.36 Twi 110.1..”

37Mooti naveekë Daviidë wukun'teelë “Fumu”, buni Kliistu kum'podyooso kube beelë mwanaandye? »

Yeesu wabikini baatu mu nsinunu miloonji n'kaakë

(Mat 23.1-36; Lik 20.45-47)

Nkoongë yinenë yi baatu yilën'kuwulwaangë yimunë liyaanji lyooso. 38Mu nsinunwaandi, Yeesu wusë tubë : « Keelaanu yi miloonji n'kaakë, baawu kuzolë ke zungunaangë mu mëzweeli maawu mëkulë, ke bilwaangë yi luciinzu looso fë ciyalëlë, 39ke toombaangë kukalë mu sibaaku si ntwaalë mu bizutununu i kukalilë mu biikë bi bunaangë mu misaangu. 40Baawu ke vokënaangë lifwa li bëfwiili mu sinzo syaawu i ke vaangaangë mëfukë-nyeembo mu misaambu yikulë-yikulë, bwiinji mo baatu bëbëmonaangë. Baawu bën'fundusu mu mëseembu më kwaatë-yekë. »

Likabu livaanë n'fwiili ciyeembi

(Lik 21.1-4)

41Bunë bamani ofo, Yeesu kukalilë fë ntwaalë sinkonunu si mëkabu mu n'zo-Nzaambi, naandi kutalaangë buni baatu bëlëkulobikaangë mwaawu simboongo. Mpaapë bisinë bilëkulobikaangë bivweetu binenë bi mboongo. 42N'fwiili ciyeembi kutuukë yivaandi, kulobikë mwaawu binkongulu byooli bi m'pataaku. 43Yeesu wusë telooso bilaanzi byaandi i wusë tubë : « Licyelikë yilukaambë, ciyeembi ci n'fwiili ocyo mwiinji kuvaanë likabu yi bakë booso bunë balobikilaangë simboongo mu sinkonunu asi. 44Cibilë, bakë booso bavaanë byo bilutilë fë yilu binë bëbakisi, kasi mu buyeembi bwaandi, naandi wavaanë byakë byooso byabë yaandi kulëvwiilë moonyi. »

Currently Selected:

Malëkë 12: NTVIL

Highlight

Copy