Aiseya 54
54
Dawan latwanka lâka ban kaia ra ba
1Liliam bas,
biarapara mairka nani,
luhpa baikras sma ba;
lawana aiwans bara lilia tara binka dauks,
luhpa baikaia latwanka briras katma ba,
kan Dawan naku aisisa:
“Lulki swin mairka ba kau luhpa bri kabia,
ai maya bri mairka nani ba wal.”#Gal 4.27.
2Man tintkam watla ba kau tara dauks,
wamtla bilara pamaia kwalka nani ba sin
kau bîla tara dauks;
diara aitani briras sma lukpara;
kiwka nani yari dauks,
wamtla playka dusa nani ba pain bapi wilks,
3kan man pliskam ba kau drabaisma,
aihkikam ra bara smihkam tani ra;
man kiamkam nani ba
nisan ailal pura lubia,
tawan nani bîla man swin,
upla iwras tawanka nani ba ra iwbia.
4Si bripara, bara swiram sin bripara;
kan bahki mai kulkan kabia apia bamna,
swiram sin briaia apia sma.
Man tiara kapram swirka ba âmya tiks,
piarka takram swirka ba sin,
kli lukankam ra bripara,
5kan mai papaskra ba,
ai maya mairin mai bribia;
ai nina ba Dawan karnika bri ba;
man sasakrikam ba,
Gâd Holikira, Israel wina ba,
tasba aiska Gâdka ba.
6Man maya mairin tiara kum baku sma,
lulki mai swin bara sarikira sma,#Isi 16; Os 1-3.
sakuna man Gâdkam kli mai winan,
bara mai wisa:
7“Piua wiria lupia baman
yang mai lulki mai swiri;
sakuna umpira kaikan lâka tara ba wal,
laimara kli asla mai daukamni.#Law 30.5; Ais 60.10; Ina 3.31-33.
8Kupi baiwanka wiria lupia ba wal
yang maiwan ba man wina piu prahni yukukri kan;
sakuna umpira mai kaikan lâka ban kaia ba wal
man dukiamra kupi swapnika lâka brimni.”
Dawan mai swaki sasakra ba, baku wisa.
9“Noa ra aisari baku,
lisamra dukiara aisi ba ra,
kli tasba purara lisamra pura lubia apia.#Bla St 9.8-17.
Baku pramis takan nanara
kli man mampara kupi baikram ra apia,
kli sin mai ikaia mai wimna apia.
10Ban kra il nani ba, ai pliska wala ra tawbia kra
bara kiuhsi nani ba tasba ra kauhbia kra,
yang latwanki ba lika man dukiamra aihka lakamna apia,
baku sin tasba ra kauhbia apia sa,
yang lâ daukri kupia kumi lâka ba.”#Jir 31.35-36; 32.40; Mk 13.31.
Dawan umpira mai kaiki ba baku wisa.
Jerusalem raya ba
11¡Sari takan tawanka,
pâsa karnikira mita sauhki tikan,
upla kumi sin âpu maisa nihkaia!
Yang walpayam nani ba walpa wala manakira nani purara karna daukamna,
playkam nani ba sapair playka purara bapamna.#Par M 21.18-21.
12Tawerkam nani ba,
walpa manakira nani ni mâkamni,
getkam nani ba sin walpa manakira ni paskamni,
bara tawankam kutbanka ba sin sut
walpa manakira ni paskamni.
13Bara luhpiam nani sut ba,
Dawan mita ai bîla ba smalkbia;#Jn 6.45.
bara witin nani sut pâwanka tara pali bribia.
14Kasakka lâka, wapni lâka ni karna mai daukan kabia.
Taiban lâka wina laihura kama;
sibrin mai daukbia apia, si briras kama,
kan sibrin mai dingki ba,
lamamra âpu kabia.
15Upla kum man mampara bubia kaka,
witin yakan daukbia,
yang lika witin tilara âpu sna;
ya man mampara bubia ba,
witin ba man mamwanra kauhbia.
16“Kaiks, yang mita daukri sika
ayan wina diara papaskra ba,
pauta klauhan ra maskuka nani ba puhbaia,
bara ai tulska nani ba baha wina paski sakaia
ai warkka nani daukaia dukiara;
bara yang mita sin daukri sasauhkra nani ba,
sauhki tiki kaia ba;
17sakuna upla kumi sin kau bin daukras sa,
baha mai sauhkaia sip ba;
damhra kwahki nani ba sut bîla praki swima.
Yang warkki dadaukra nani ra yabisna ba sika naha:
pura luaia.”
Dawan witin baha kasak aisisa.
Currently Selected:
Aiseya 54: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
