Aiseya 55
55
Umpira kaikan lâka mana luha upla sut dukia
1‘‘Diran dauki nani sut,
man nani bal lî nâra sa dis;#Jn 7.37; Par M 21.6; 22.17.
lalah âpu nani, man nani sin bal,
mana luha plawar pis;
wain laya, tialka laya sin,
mana luha bris.
2¿Plun apia ba dukiara dîa muni lalah yabaia?
¿Dîa kan wark taki lalahkam sakisma ba
âmyapah mai daukras ba mana yabaia?
Man nani, yang ra aman wals,
bara plun pain nani ba pima,
plun auhni nani ba pima.
3Man nani kiamam pri tniki wals
bara yang ra bal;
man nani wals,
bara sulkam ba raya kabia;
man nani wal lâ kaia lâka ba daukamni,
umpira kaikan lâka, ban kaia pramiska,
Debit wal daukri ba baku.#2 Sa 7.4-16; Ap St 13.34.
4Kaiks yang bui witin ra yâri upla nani sut ra witnis aisaia,
tâ uplika kaia, bara nisan nani smasmalkrika kaia.
5Man kakaira apia sma uplika nani ba man paiwma;
upla nani mai kakaira apia kan ba man ra plapbia,
yang Dawan, man Gâdkam,
Israel ra Holikira ba,
yamni mai kulkan ba mita.
6“Dawan ba pliks, man nani,
witin ba kau pliki sakaia sip sma ba ra,
witin ra wins kau lamamra ba ra.
7Saurakira ai yabalka ba yarka swibia,
bara upla watawikira ba sin
ai kupia lukra nani ba swibia;
bara man nani lika Dawan ra kli tawi bal,
witin nani umpira kaikan lâka bribia;
yawan wan Gâdka ra,
witinka wan saurka swi tikaia lâka tara bri ba.#Ina 3.40-42; Sak 1.3; Mal 3.7.
8-9Kan yang kupi lukanka nani ba,
man nani kupiam lukra nani ba baku apia sa;
bara yang wark daukisna ba
sin man nani warkkam baku apia sa.
Baku sin kasbrika purara nani ba,
kau purara sa tasba ra ba wal,
baku sin yang lukanki bara daukanki sin,
man nani puramra sa.”
Dawan baku win.
10“Kan kasbrika pura nani wina ais ba auhisa,
bara lî kamhka pali nani sin bal iwi ba baku,
bara kli bahara tawi waras,
sakuna tasba ra buskisa bara yan urhwi pâwisa,
baku sin saumuk mamangkra ra
saumuk nani yabisa,
bara pi bara sin plun yabisa,#2 Ko 9.10.
11baku kabia yang bîli wina taki ba, bîli nani ba,
mâ sakras kli yang ra tawi balbia apia,
sakuna dîa daukaia brin ai dauki ba baha daukbia,
blikri ba kat takbia.
12“Man nani lilia pali baha wina taki wama,
bara kupia kumi lâka wal,
man nani tasbayam ra kli tawi balma.
Il nani bara kiuhsi nani sin,
man nani mamwanra lawana aiwanbia,
bara twi ra dus nani ba sin sut
ai mihta pruki lilia daukbia.
13Kiaya nani tasbaya ra awas nani pâwbia,
tangni kiaikira watlika ra
tangni kîa painkira pâwbia;
bara nina kum kabia Dawan ra,
ban kaia sainka kum dukiara,
ban kaia ra klaki sakan kabia apia.”
Currently Selected:
Aiseya 55: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
