Impakan Sturka 8

1 #Naha borska nani 8.1-32 na bors. wala 7.26—8.28 ra kli baku ulban sa, baku Hibru nani ulbanka baku sa. Dawan bui Moses ra win:

—Man king fero ba wih kaiks bara witin ra wis: ‘Dawan ba naku wisa: Swis yang upliki nani ba taki wabia bara yang nini mayunbia. 2Man bui witin nani ba swirka taki waras kabia kaka, pikpik nani ni klala maikamni.#Par M 16.13. 3Nilo awala laya ba lukwi, baha wina pikpik baman banhki takbia. Pikpik nani ba baha wina taki, king watla ra bal dimbia, rumkam nani ra sin dimbia, krikrikam nani ra ulbia, uplikam tara nani watla nani ra sin dimbia, upla wala nani watla ra, baku sin britkam angkaika nani ra dimbia. 4Bara pikpik nani puramra uli srutwi kabia. Uplikam tara nani purara sin, uplikam wala nani sut purara sin pâli uli srutwi tauki kabia.’

5Bamna Dawan bui Moses ra win:

—Eran ra wis ai dusa ba awala nani purara sakbi bribia, tingni bara lakun nani sut purara sin. Bara baha wina, pikpik nani bal taki, Idsip tasbaya aiska ba banhkaia.

6Eran ai dusa ba awala nani purara sakban bara baha wina pikpik nani bal taki, Idsip tasbaya aiska ba banhkan. 7Ban sakuna, Idsip sukika nani mita sin Eran daukata baku daukan, witin nani diara aihka daukaia sinska bri ba wal. Bara witin nani mita sin pikpik nani Idsip tasbaya purara bri balan. 8Bara king fero bui upla saki blikan wan Moses bara Eran wal ra paiwaia. Bara king ba witin nani ra win:

—Dawan ra puram suni makas, pikpik nani ba yang wina sâkbia bara upliki nani wina sin. Baku lika yang bui man uplikam nani ba swirka wabia, bara witin nani Dawan ra sakripais dauki yabia.

9Moses pana king fero ra win:

—Ai wis aihka piua yang bui man tâmwan puram sunamna brin mai dauki ba, uplikam tara nani ba dukiara sin. Baku pikpik nani ba sut man wina bara wamtla bîla wina sin taki awala ra baman wih takaskbia.

10King fero aisi, win:

—Yauhka pali puri suns.

Bara Moses bila pana win:

—Yang baku daukamna, bara man kaikma Dawan wala âpu sa, yang nani Dawanki Gâd ba baku. 11Pikpik nani sut king iwaika watla wina, uplikam tara nani bara wala nani sut watla ba wina taki wabia, bara awala ra baman kabia. Bara kli man ra sin nais takbia apia, uplikam tara bara upla wala nani ra sin nais munbia apia.

12Moses bara Eran wal king watla wina taki wan, bara Dawan ra ai pura sunan pikpik nani ba sut brih sâkbia, king fero watla wina bara upla wala nani watla ba wina sin. 13Bara Moses dîa makaban ba kat Dawan daukan. Pikpik nani ailal utla bilara, lata tani ra bara insla nani ra kan ba, sut prui tiwan. 14Bara upla nani mita pikpik pruan nani ba, wahbi il baku paskan, Idsip tasbaya aiska ba bisbaya pali takan. 15Bara king fero kaikan pikpik nani ba sut prui tiwan, witin trabil wina pri takan kan, bara kli ai kupia karna daukan, Dawan mita Moses ra win ba baku, king ba Moses bara Eran wal bîla walras kan.

Tairi nani blikan

16Dawan bui Moses ra win:

—Eran ra wis ai kînka ba wal tasba ra prukbia, bara Idsip tasbaya aiska ra tasba puknika nani ba wina tairi nani baman takbia.

17Bamna Eran ai kînka ba ni tasba ra prukan, bara tasba puknika nani ba wina tairi nani baman bal takan Idsip tasbaya aiska ra, bamna upla ra bara daiwan nani sut ra sami kan. 18Nanara sukia nani ba sim sât dauki, tairi nani sakaia trai munan, sakuna sip diara bal takras kan. Sakuna tairi nani ba upla daiwan nani ra sami iki lap tiki kan. 19Bara sukia nani wih king ra win:

—¡Naha diara na, Gâd mita daukisa!

Sakuna king ba ban ai kupia karna bri kan, Dawan mita win ba baku, Moses bara Eran wal ra bîla walbia apia.

Walmu nani blikan

20Dawan bui Moses ra win:

—Yauhka titan king ba awala ra auya, bahamna man sin titan pali bûi awala ra was, bara witin ra wis: ‘Dawan wisa: Upliki nani ba swis wabia, witin nani ba yang ra ai pura suni maiyunbia. 21Yang maisam pakisna, yang mai wisna ba baku daukras kama kaka, yang walmu nani blikamna man puramra, uplikam tara nani, uplikam wala nani sut purara sin, bara man wamtla bilara sin. Idsip uplika nani sut watla bilara bara tasba mawan ba sut, walmu baman banhwan kabia. 22Ban sakuna, Gosen tasbaya ra, yang upliki nani iwi banhwi ba ra lika walmu nani blikamna apia; bahara walmu âpu kabia. Baku daukamna ba wina, man kaikma yang sika Dawan, naha tasbaya ra warkki daukisna ba. 23Yang upliki nani ba, man uplikam nani ba wina sât aihka sakamna. Bara yauhka pali yang baku daukamna.’

24Bara Dawan aisin ba baku daukan, walmu nani ba mita diara sut ba sauhki swin.

25Bamna king fero bui Moses bara Eran ra paiwi, win:

—Man nani was bara Gâdkam ra sakripais dauki yas, sakuna naha tasbaya wina taki waia apia.

26Bara Moses pana win:

—Yamni apia kabia yang baku daukaia, kan Idsip uplika nani ba daiwan ba tara pali kulki bahara ai pura sunisa. Bamna yang nani mita baha daiwan nani ba iki, Dawan Gâd ra sakripais dauki yabamna witin nani ai kaikbia kaka, yang nani kasak daira walisna, witin nani walpa ni ai sabi ai ikbia. 27Bamna yang nani yu yumhpa upla iwras tasbaya ra wapaia sna, bahara Dawanki Gâd ra sakripais dauki yabaia, witin mita yang nani ra ai win ba baku.

28Bara king fero bila:

—Yang mai swirka wama, upla iwras tasbaya ra, Dawankam Gâd ra sakripais dauki yabaia, sakuna pramis ai munma kaka, man nani uya laihura waia apia, bara yang dukira sin puram sunaia.

29Bara Moses pana win:

—Yang naha wina taki wamna wal baku, Dawan ra makabaisna yauhka pali walmu nani ba sut man wina, uplikam tara nani wina bara tawankam uplika nani sut wina sin laihura sâkbia. Sakuna man sin yang nani ra ban kunin ai muni kaia apia sma, Israel luhpia nani Dawan ra sakripais dauki yabaia waia ba wina ai takaski kaia apia sma.

30Bara Moses king fero watla wina taki wan wal baku, Dawan ra ai pura sunan, 31bara dîa Moses makaban ba Dawan daukan: walmu nani sut king fero watla wina laihura sakan, ai uplika tara nani, ai uplika wala nani sut watla wina sin. 32Ban sakuna, king fero kli ai kupia karna daukan, bara Israel luhpia nani ba swin taki waras kan.

Currently Selected:

Impakan Sturka 8: MSKTU

Highlight

Copy