Impakan Sturka 7
7
1Bamna Dawan bui Moses ra win:
—Kaiks, man ba yang waitlika ra, yang baku mai mangkaisna king fero mawanra diara dauki kaia, bara muihkam Eran lika, man bîlam prapit baku aisi kabia. 2Yang aisisna ba sut man mita Eran ra aisi kama, bara witin mita tawi king fero ra aisi kabia, Israel luhpia nani ba swika ai tasbaya wina taki waia dukiara. 3Ban sakuna, yang mita king fero ba lal karna, upla bîla walras daukamna. Bara witin bui man bîlam walbia apia. Yang lika Idsip ra sain nani ailal daukamna, wark aihkakira nani sin ailal daukamna. Bamna#Ap St 7.36. 4king fero man nani bîlam walbia apia, sakuna yang karniki ba wal Idsip purara mihti sakbamni, lâ nani wapni kasak lâka dauki, yang upliki Israel luhpia nani aiklaklabra daknika ba bri sal sakamni. 5Yang bui Idsip tasbaya purara karniki ba marikamna ba ra, Israel luhpia nani ba baha wina sakamna bara witin nani ai dara walbia, yang sika Dawan sna ba.
6Moses bara Eran wal Dawan mita diara nani daukaia adar yaban ba kat daukan. 7Moses mani 80 bri kan, Eran sin mani 83 bri kan, witin nani king fero wal aisi kan ba piua ra.
Eran kînka ba
8Dawan mita Moses bara Eran ra win:
9—King fero bui man nani ra makabia kaka, diara aihkakira kum daukrika kaikaia, Eran ra wis ai kînka ba brih, king fero mawanra tasba ra batakbia, bara dusa ba wina piuta kum takbia.
10Moses bara Eran wal king fero mawanra wan ba ra, Dawan mita dîa daukbia win ba daukan. Eran ai kînka ba tasba ra lulkan, king fero bara ai uplika tara nani ba sut mawanra, bara wapaika dusa kata ba piuta takan. 11Bara king fero ai uplika sinskira tara bara sukia nani ba sut paiwi bri balan, bara baha nani sin Eran daukan ba baku daukata. 12Witin nani kumi bani ai kînka ba tasba ra lulkan, bara kînka nani ba piuta takan. Sakuna Eran kînka ba mita, sinskira nani, king fero sukika banhwi ba kînka nani ba ra sut langki pin. 13Baha sut kaikan sakuna, king fero lika kau ai lal karna daukan. Witin Moses bara Eran wal bîla walras, Dawan bui Moses ra wisata ba baku.
Lî ba tala daukan
14Baha ningkara, Dawan bui Moses ra win:
—King fero ba ban ai kupia karna daukisa, witin bui Israel luhpia nani ba swika taki want apia lukisa. 15Sakuna yauhka titan, man awala un ra iwi was, witin iwi auya ba wal prawaia. Nilo awala un ra bîla kaiki bas, bara kînkam piuta takata ba sin brih was. 16Bahara man bui witin ra wima: ‘Dawan Hibru nani Gâdka ba ai blikan mai wiaia: Upliki nani ba swis taki wabia, upla iwras tasbaya ra yang ra mayunra aikaia. Ban sakuna, nanara kat man kau ban kupiam karna, sip sturi walras sma. 17Bahamna, Dawan bila naku wisa: Nanara man kaikma yang sika Dawan sna ba. Naha dusa mihti ra brisna na liura prukamna ba ra, awala laya ba tala baman takbia.#Par M 8.8; 16.4. 18Inska nani prubia bara awala ba bisbaya pali takbia, bara Idsip uplika nani sip baha wina lî dibia apia.’
19Baha purkara sin, Dawan bui Moses ra win:
—Eran ra wis ai kînka ba alki bara ai klahkla sakbi bribia awala nani sut purara, tingni nani, lakun, lî mâ dakura nani bara lî panhki swin watlika nani sut purara sin; bara baha sut ba tala baman takbia.
20Bamna Moses bara Eran wal Dawan mita dîa daukaia win ba, witin nani baha daukan. Eran ai kînka ba king fero bara ai uplika tara nani mawanra bukan, bara awala laya ra prukan, bara lî kata ba sut tala baman takan. 21Inska nani sut pruan, bara awala ba bisbaya pali takan, Idsip uplika nani sut baha wina lî diaia sip apia takan. ¡Idsip tasbaya aiska ra tala baman ailal kan!
22Ban sakuna, Idsip sukika nani sin baku daukan, witin nani diara aihka daukaia sinska bri ba wal. Bahamna, king fero ai kupia ban kau karna dauki kan: Moses bara Eran wal aisi ba bahki pali kulki kan, Dawan mita witin nani ra win ba baku. 23King fero kli ai watla ra tawi wan, diara nani taki ba dukiara diara lukras pali aihwa. 24Idsip uplika nani sut, liwanhta nani salhkan awala un nani ra lî klin briaia dukiara, kan awala nani laya ba sip diras kan bamna.
Pikpik nani blikan
25Dawan mita awala laya ba sut tala daukan ba wina, wik kum luan ba ningkara,
Currently Selected:
Impakan Sturka 7: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
