Impakan Sturka 9
9
Daiwan nani ra siknis alkan
1Bamna Dawan bui Moses ra win:
—King fero ra was bara wis: ‘Dawan Hibru nani Gâdka ba, naku wisa: Upliki nani ba swis taki wabia, bara yang nini mayunbia. 2Man bui witin nani ba swirka taki waras ban alki takaski brisma kaka, 3Dawan ai karnika ba siknis nani wal daiwan nani purara klala blîkbia. Siknis saura pali kum blîkbia ba ra, araskam, birikukam, kiamilkam, bîpkam bara sîp sin sut prui tiwbia. 4Sakuna Israel luhpia nani daiwra ba, Idsip uplika nani daiwra ba wina Dawan mita aihka dakbi sâkbia. Bara Israel luhpia nani daiwra lika kumi sin prubia apia.’
5Baha daukaia piua ba Dawan mita pat mangkan sa, bara witin win:
—Yauhka yang baha daukamna.
6Bara yu wala baiwan ra, Dawan mita daukan Idsip uplika nani daiwra sut pali prui tiwan. Sakuna Israel luhpia nani daiwra lika kumi sin pruras kan. 7King fero upla blikan wan Israel luhpia nani daiwra nani kaikaia. Bara kaikan baha nani kumi sin pruras kan. Ban sakuna, witin ban kau ai kupia karna daukan, Israel luhpia nani ba swin taki waras kan.
Yukri nani blikan
8Bara Dawan mita Moses bara Eran wal ra win:
—Man nani kubus wina yamhpus mihtam banhki brih was, bara Moses mita yamhpus ba pâsa ra yakabia, king fero kaiki kaka. 9Bara yamhpus ba tasba puknika taki tasba aiska ra pâlbia; baha wina Idsip uplika nani sut daiwra nani sut taya ra yukri baman takbia.
10Moses bara Eran wal kubus wina yamhpus brin, bara king fero kaikaia wan. Bahara Moses mita king fero kaiki kan yamhpus ba pâsa ra yakaban, bamna upla bara daiwan nani sut taya ra yukri nani taki sukwi kan.#Par M 16.2. 11Nanara sukia nani kata ba sip Moses bara Eran wal mapara buras kan, witin nani sin Idsip uplika wala nani wal baku yukri nani mita ai taya sukwi kan bamna. 12Ban sakuna, Dawan mita king fero kupia ba karna daukan bara witin Moses bara Eran wal bîla walras, Dawan mita Moses bara Eran wal ra win ba baku.
Lî klaswan auhan ba
13Bamna Dawan bui Moses ra win:
—Bus yauhka titan pali bara king fero mawanra was, bara witin ra wis: ‘Dawan Hibru nani Gâdka ba naku wisa: Upliki nani ba swis wabia bara yang nini mayunbia. 14Naha piua ra klala blikaisna man mampara, uplikam tara nani, bara uplikam nani sut mapara sin; bara man kaikma tasba aiska ra yang baku wala âpu ba. 15Yang pali mihti buki, man nani ra siknis nani wal klala maikri kan kata, man nani sut pat naha tasba wina sauhki âpu mai tikan kaia kan. 16Ban sakuna, yang mita mai swiri raya kaia, yang karniki ba kaikaia bara tasba aiska ba sin yang tâinka bribia ba dukiara.#Ro 9.17. 17Baha sut daukisna, sakuna man ban upliki nani ba mapara buisma, alki takaski brisma yaram taki waras. 18¡Bamna, baha aitani! Sakuna yauhka naha piua wina kaikma lî klaswan pura wina kauhi kabia Idsip aiska ra. Naha tawanka sakan ba yua wina, kau yu kumi sin baku lî klaswan kauhaia kan ba, nanara kaikbia. 19Bamna blîks, daiwram nani ba sut bara diara wala nani brisma ba sin sut, watla pain nani ra dingki swibia, kan lî klaswan ba mita upla nani, daiwan bara diara wala nani sut param ra swin ba iki tikbia bamna.’
20King fero uplika tara nani tilara baha walan ba ra, witin nani sibrin takan, Dawan mita baku witin nani ra ai maisa pakan ba dukiara. Bamna witin nani wan ba ra, ai albika nani bara baku sin ai daiwra nani sut ba watla ra dingki yukukan. 21Ban sakuna, tila kum kum lika Dawan bui witin nani ra maisa pakan dauki ba bahki kulkan, bara ai daiwra, diara nani bri kan ba sut, ban latara swin. 22Bara Dawan bui Moses ra win:
—Klamhkla kasbrika tani ra buks, bara Idsip tasbaya aiska purara ais mâ auhbia, upla bara daiwan nani purara, baku sin plun nani mangkan pâwi ba sut purara.
23Moses ai klahkla purara bukan bara Dawan mita imyula bara alwani nani blikan, bara pura wina ais kauhan Idsip tasbaya aiska purara. 24Imyula puli ba bara ais mâ nani yakawi ba sip takaskras kan.#Par M 8.7; 16.21. Idsip tasbaya ra kau naha prais baku diara saura takras kan, naha piua kat. 25Bara Idsip tasbaya aiska ra, diara nani latara swin kan ba sut pali sauhki tikan: upla, daiwan bara plun nani mangkan pâwi nani kan ba sut sin kriki tikan, dus tara nani ba sin krikan. 26Idsip tasbaya aiska ra baku diara saura pali taki kan, sakuna Gosen tasbaya ra Israel luhpia nani iwi kan ba tilara lika, ais mâ sirpi kumi sin auhras kan.
27Bara king fero upla blikan Moses bara Eran wal paiwan balan bara win:
—Nanara kaikisna, yang saura yâri ba. Pâtkira ba yang, bara upliki nani aikuki sna, kuna Dawan lika pâtkas sa. 28Alwani, imyula, ais nani yakawi ba, yang nani aitani briri sa, bamna yang kau ban mai alki takaski kamna apia. Sakuna man nani mita yang nani tâiwan Dawan ra makas, bara mai swirka wama.
29Bara Moses pana aisi, win:
—Yang naha wina nan taki wamna ba wal, mihti nani purara buki man nani tâmwan Dawan ra makabaisna. Bara ais auhi ba takaskbia, alwani puli ba sin, bara man kaikma tasba aiska ba Dawan dukia ba. 30Ban sakuna, yang kasak daira walisna, man bara uplikam tara nani sin kau Dawan sibrinka briras sma.
31Linin, barli mâ nani mangkan kan ba sut sauhkan. Barli mâ ba pat pihwan bara krikaia piua kan. Linin ba sin pat ai tangnika bri kan. 32Ban sakuna, plawar mâ nani lika sauhki tikras kata, kan baha nani ba naika ra pihwaia piua kan bamna.
33Moses king fero watla ra aisi si, mahka tawan ba wina taki wan ba ra, ai mihta nani purara buki Dawan ra ai pura sunan. Baha minitka ra ais mâ nani auhi kan ba, alwani bara imyula nani puli kan ba sut takaskan. 34Ban sakuna, ais mâ nani kauhi kan ba, alwani, imyula wal puli kan ba sut takaskan, bara king fero baha kaiki, kli saura daukan. Witin baman apia, sakuna ai uplika tara nani ba sin, kli ai kupia nani karna daukan. 35King fero ai kupia karna brih bara Israel luhpia nani ba swin taki waras, Dawan mita Moses ra pat win kan ba baku, king ba Israel luhpia nani ba swika taki wabia apia.
Currently Selected:
Impakan Sturka 9: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
