Jemusi 1

1Ndime Jemusi mubelesi wa Leza awa Mwami Jesu Kilisito. Ndamujuzya nomisyobo iili kkumi aibili iimwaikide koonse-koonse.

Zyalusyomo abusongo

2Nobakwesu, kamukkomana nomusikilwa makatazyo manji-manji. 3Mulizi kuti lusyomo lwanu lwazwidilila mumasukusyo aaya mulaiya kukakatila. 4Nkabela kukakatila ooku kubeleka canguzu kuti mulondoke kamunyina kampenda naa kubula cintu cibisya cimwi. 5Kuti naa mpali umwi akati kanu uubula busongo, akumbile kuli Leza, uupa kuli boonse kakunyina akubajanina butongo, nkabela uyoopegwa. 6Pele akumbile cakusyoma katadonaiki, nkaambo ooyo uudonaika uli mbuli mayuwe aalwizi aavwandauka akutonkaikwa aluuwo. 7Muntu uuli boobo atayeeyi kuti ulapegwa cintu kuzwa ku Mwami pe, 8nkaambo ulijisi myoyo yobilo, takkazikene munzila zyakwe zyoonse.

Zyabucete alubono

9Mukwesu mmucete akondwe ciindi Leza namusumpula, 10awalo muvubi akondwe ciindi Leza namucesya, nkaambo awalo uyoomana mbubonya mbuli maluba aabwizu. 11Nkaambo zuba lilazwa akutenta, aboobo lilayumya bwizu, maluba aabo alaloka, abweebesi bwawo bulamana. Mbubonya oobo awalo muvubi ulakonzya kumana kacicita zyakwe.

Zyakusunkwa akutepaulwa

12Ulilelekedwe muntu uuyumina masunko, nkaambo azunda uyoopegwa musini wabuumi, ooyo Leza ngwaakasyomezya kuli baabo bamuyanda. 13Kuti naa muntu wasunkwa ataambi kuti, “Ndasunkwa a Leza.” Nkaambo Leza takonzyi kusunkwa kuti abisye pe, alimwi lwakwe mwini tasunki muntu. 14Pele muntu amuntu ulasunkwa ciindi naongelezegwa akucegwa azisusi zyakwe mwini. 15Lino zisusi zyasima zilazyala zibi, azyalo zibi zyakomena zilazyala lufu.

16Mutacengwi nobakwesu bayandwa. 17Zipego zyoonse zibotu, zilondokede zilazwa kujulu kuli Taata wakalenga mimuni, walo uutasanduki alimwi kubala kwakwe takuzimaani aasyoonto mbuli cimvule. 18Mubukanze bwakwe mwini wakatupa buumi kwiindila mumajwi aaamba zyabwini kutegwa kukabe butaanzi akati kazilenge zyakwe zyoonse.

Kuswiilila akucita

19Nobakwesu bayandwa, amuzibe eeci, muntu woonse kafwambaana kuswiilila, pele atafwambaani kwaamba, nikuba kunyema. 20Nkaambo muntu uunyemede takonzyi kucita ziluleme kuli Leza pe. 21Nkaako amusiye busofwaazi boonse akugwisya bubi buzwide mulindinywe. Amwaatambule cakulibombya majwi Leza ngaakasyanga mumyoyo yanu aakonzya kumufutula.

22Mutanoolicengi mukwiide kumvwa majwi buyo, pele kamucita zyaambwa mumajwi aayo. 23Nkaambo kuti naa muntu kaswiilila buyo majwi akutacita nzyaamvwa, ulikozyenye amuntu uulilanga mucimboni-mboni, 24amana kulibona ulazwa, eelyo cakufwambaana waluba mbuli mbwaabede. 25Mulawo wa Leza ulilondokede alimwi ulapa lwaangunuko. Muntu uulanga mu Mulawo ooyo akukakatila mulinguwo, taswiilili majwi buyo akwaaluba, pele ulaatobela. Aboobo Leza uyoomuleleka muli zyoonse nzyacita.

26Kuti naa kuli muntu uuliyeeya kuti ukomba Leza amana talijati mukwaamba kwakwe, bukombi bwakwe mbwabuyo, alimwi wiide kulicenga. 27Bukombi bwini-bwini bulondokede kuli Leza Taata mboobu: muntu abambe bamusyaala abamukabafu mumapenzi aabo, akulibamba cakubula kampenda kuti ambweni bubi bwaansi ano bulamusofwaazya.

Currently Selected:

Jemusi 1: Tonga96

Highlight

Copy