Bahibulu 13

Mbwabotezegwa Leza

1Kamuyandana mbuli babunyina. 2Mutalubi kusamausya beenzu, nkaambo mukucita boobo bamwi bakasamausya bangelo kabatazi pe. 3Amuyeeye bali muntolongo, mbubuli kuti mwaangidwe limwi ambabo. Amubayeeye bapenga, mbubuli kuti mupenga limwi ambabo.

4Lukwato kamululemeka nyoonse, baalumi abakaintu babo kabasyomana, nkaambo Leza uyoosubula baamu abasimamambe.

5Mutabi buyo basikuyanda mali. Eezyo nzyomujisi nzenzizyo. Nkaambo Leza wakati, “Nsikwe nentikamusiye, alimwi nsikwe nentikamulekelezye pe.” 6Aboobo atube aacamba cakwaamba kuti,

“Leza ngomugwasyi wangu,

taakwe ancenjoowa pe.

Ino muntu inga wandicita buti?”

7Kamubayeeya basololi banu, aabo bakamukambaukila Majwi aa Leza. Amuyeeye cakacitika akaambo kabukkale bwabo alimwi amutobele lusyomo lwabo. 8Jesu Kilisito ngumwi jilo, sunu, abuya myaka. 9Mutaleki kuti njiisyo ziindene-indene zyeenzu zimuleesye. Ceelede kutukkazika myoyo nduse lwa Leza, kuleka tunsiya-nsiya twaamba zyazyakulya. Kayi ootu tiitwakabagwasya aabo bakatutobela.

10Lino bapaizi ba Bajuda tabakonzyi kulya zituulwa acipaililo cesu. 11Mupaizi Mupati nguuleta bulowa bwabanyama mubusena busalalisya kuti abutuula bube cipaizyo cazinyonyoono, pele mitunta yabanyama aabo yakali kutentelwa kunze lyazivuka. 12Aboobo Jesu wakafwida kunze lyamunzi kutegwa asalazye bantu kuzwa kuzinyonyoono zyabo abulowa bwakwe. 13Nkaambo kaako atuye kulinguwe kunze lyazivuka, aswebo tumvwe masampu aakwe. 14Kayi ansi aano tatujisi munzi wakukkalilila pe, tulangila munzi uumbi uuciboola. 15Nkaako lyoonse muli Jesu atulumbe Leza, cibe cipaizyo cesu. Kulumba kwesu kube mbuli micelo yabantu bazumina zina lyakwe. 16Mutalubi kucita zibotu akugwasyanya, nkaambo eezi nzezipaizyo zibotezya Leza.

17Lino amuswiilile basololi banu akulitesya kuli mbabo. Kayi mbabalanga zyamyuuya yanu kakunyina akulyookezya, nkaambo baleelede kwaamba zyamilimo yabo kuli Leza. Naa mwabaswiilila, banoobeleka cakukkomana milimo yabo. Mwatacita oobo banoobeleka cakuusa, aboobo eeci tacikamugwasyi pe.

18Kamutukombela. Tuli masimpe kuti amuzeezo mubotu twakali kuyanda kucita ziluzi. 19Kapati ndamulombesya kuti mukombe mukuti Leza andilete kulindinywe kufwambaana.

Kukomba

20Leza uupa luumuno, wakabusya Mwami Jesu kuzwa kubafu, walo uuli Mweembezi mupati wambelele nkaambo kalufu lwakwe, luli ncitondezyo cisimya cizuminano citamani, 21Leza ooyo amupe zyoonse zibotu nzyomubula kutegwa mucite nzyayanda. Eelyo kwiindila muli Jesu Kilisito acite muli ndinywe eeco cimubotezya. Kilisito alemekwe lyoonse alyoonse! Akube boobo.

Majwi aamamanino

22Ndamukumbila nobakwesu, muuswiililisye mulumbe ooyu wakuyumya-yumya, nkaambo ndalemba buyo cakufwiimpya-fwiimpya. 23Njanda buyo kuti muzibe kuti mukwesu Timoti wakazwa muntolongo sunu. Kuti afwambaane kusika, ndamuletelela ndaboola ooko.

24Amubajuzye basololi banu abantu ba Leza boonse. Bantu boonse baku Itali balamujuzya.

25Leza amubede aaluse nyoonse.

Currently Selected:

Bahibulu 13: Tonga96

Highlight

Copy