Jemusi 2

Ubacenjezya kuti batanoosalululani

1Nobakwesu, mukuti mulasyoma mu Mwami wesu Jesu Kilisito wabulemu, mutasalululani. 2Atwaambe, muntu umwi wanjila momubungene kasamide nweenwe yangolida azisani zyeebeka, kwamana kwanjila muntu mucete uusamide muzazawu. 3Lino mwalemeka yooyo uusamide kabotu akuti, “Amukkalile waawa aabotu!” pele kumucete mwaamba kuti, “Yebo, ima aalya,” naa, “Kkala aawa mpentandabalide.” 4Tee mwacita boobo mwasalululana akutalika kubeteka amizeezo mibi?

5Amuswiilile, nobakwesu bayandwa. Sena Leza taakasala aabo bacete munyika kuti bakabe bavubi mulusyomo akuba basikukona bwami mbwaakasyomezya kuli baabo bamuyanda? 6Pele nywebo mwamusampaula muntu mucete. Tee kayi bavubide mbabamudyaminina akumutola munkuta? 7Tee mbambabonya basampaula zina lilemekwa lya Kilisito eelyo ndemwiitwa?

8Kuti naa ncobeni mwatobela mulawo wa Mwami uulembedwe mu Malembe kuti, “Yanda mweenzinyoko mbuli mboliyanda omwini,” mulacita kabotu. 9Pele kuti kamusalululana mwabisya nkaambo mwazulwa amulawo. 10Kufumbwa uubamba milawo yoonse, amana watyola omwe buyo, ulijisi mulandu wakutyola yoonse. 11Nkaambo Leza waamba kuti, “Utaciti bumambi,” ngonguwenya uuti, “Utajayi.” Kuti naa tociti bumambi, pele kojaya, waba sikutyola mulawo. 12Amwaambe akucita lyoonse mbuli mbubeelede bantu bayoobetekwa amulawo walwaangunuko. 13Nkaambo ooyo uubeteka kanyina lweengelelo, awalo Leza uyoomubeteka cakutamweengelela. Pele ooyo weengelela teelede kuyoowa lubeta lwa Leza.

Zyalusyomo amilimo yalo

14Ino cigwasya nzi kuti muntu kati ulijisi lusyomo, pele kakunyina ancacita andulo? Sena lusyomo lwakwe lulakonzya kumufutula? 15Atwaambe, mukwesu naa mucizi uusyoma wabula zyakusama azilyo, 16kwamana umwi wanu wati, “Koya muluumuno, ujane zyakulivumba azilyo,” kali taamupa zintu zyeelede zyamubili, ino cigwasya nzi? 17Mbubonya oobo alwalo lusyomo lutajisi milimo lulifwide.

18Ambweni inga umwi ulati, “Yebo ulijisi lusyomo, mebo ndijisi milimo mibotu.” Ime inga ndati, “Nditondezye lusyomo lwako lutajisi milimo mibotu, ambebo amilimo yangu ndilakutondezya lusyomo ndwejisi.” 19Nywebo mulazumina kuti Leza ngumwi buyo, ncibotu. Ayalo myuuya mibi ilazumina oobo akukankama.

20Sena yebo omuntu mufuba-fuba ulayanda kutondezegwa kuti lusyomo lutajisi milimo ndwabuyo? 21Tee kayi Abulahamu taata wakalulamikwa akaambo kamilimo ciindi naakatuuzya mwanaakwe Izaka acipaililo? 22Mwabona kuti lusyomo amilimo zyakacitikila antoomwe. Kwiindila mumilimo lusyomo lwakwe lwakazuzikizika. 23Nkabela zyakacitika zyakaamba Malembe kuti, “Abulahamu wakasyoma Leza, nkabela wakaambwa kuti mululami.” Nkaako Leza wakamwiita kuti mweenzinyina. 24Mwabona kuti zicita muntu nzezimululamika kutali buyo lusyomo lulikke.

25Aboobo munzila njiyonya buyo awalo Lahabu mwaamu wakalulamikwa nkaambo kamilimo ciindi naakatambula basikutwela akubainzya nzila iimbi. 26Nkaambo mbubonya mbuli mubili uunyina muuya mbuufwide, alwalo lusyomo lunyina milimo lulifwide.

Currently Selected:

Jemusi 2: Tonga96

Highlight

Copy