Jemusi 3

Zyamulaka

1Nobakwesu, bunji bwanu batabi bamayi pe, nkaambo mulizi kuti swebo notwiisya, Leza uyootubeteka cakulangisisya kwiinda bamwi. 2Nkaambo toonse tulalubya muzintu zinji-zinji. Kuti muntu talubyi mukwaamba kwakwe, nkokuti ulilondokede ncobeni, alimwi ulakonzya kulijata lwakwe mwini. 3Tulabikka nsimbi mukanwa lyabbiza kutegwa lituswiilile mukuti katunyonoona mubili walyo woonse. 4Alimwi amubone mato mapati kapati, nikuba kuti mapati boobo alimwi atonkwa aguwo kkali, pele nkasi niini ilabunyona kufumbwa ooko sikweenzya nkwayanda kuti buye. 5Mbubonya oobo awalo mulaka ncizo ciniini buyo, pele ulalilumbaizya amakani mapati.

Amubone kalilo kaniini mbokakonzya kutenta gundu. 6Awalo mulaka uli mbuli mulilo. Muzizo zyesu uli mbuli bubi boonse kububikka antoomwe. Ulabisya bukkale boonse bwamuntu. Mulilo wawo uzwa kubusena bwamulilo uutamani, alimwi ulaumpa buumi boonse kuzwa kukuzyalwa mane do lufu. 7Muntu ulakonzya kuvuba misyobo yabanyama yoonse, ayabayuni boonse, azikalaba, azyamumaanzi 8pele taakwe muntu uukonzya kubombya mulaka pe. Mmubi tuujatiki, uzwide ncefu. 9Amulaka tulalemeka Mwami Taata, alimwi anguwenya tulasinganya bantu, aabo bakalengwa mucikozyanyo ca Leza. 10Kuzwa mumulomo omwe mulazwa kuleleka akusinganya. Nobakwesu, embo oobo mbokweelede kuba pe. 11Sena mukasensa komwe mulakonzya kuzwa maanzi mabotu amaanzi aalula? 12Nobakwesu, sena mukuyu ulakonzya kuzyala micelo yamaoliva naa musaansa kuzyala nkuyu? Mbubonya oobo kasensa kabyuuka takakonzyi kupa maanzi mabotu pe.

Zyabusongo buzwa kujulu

13Ino nguni musongo uuli aaluzibo akati kanu? Atondezye kuti uli boobo abukkale bwakwe bubotu amuli nzyacita camaanu akulicesya. 14Pele kuti naa kamuli aabbivwe akuliyanda mumyoyo yanu, mutanoolikankaizyi akukazyanya azyabwini mukubeja. 15Oobo tabuli busongo buzwa kujulu pe, mbwaansi, mbwabuntunsi buzwa kumyuuya mibi. 16Nkaambo kufumbwa ooko kuli bbivwe antoomwe akuliyanda, nkokuli lupyopyongano amilimo yoonse mibi. 17Pele busongo busaanguna buzwa kujulu bulilondokede, alimwi mbwaluumuno, bulibombede, tabukazyanyi, mbwalweetelelo lunji, amicelo yabo mibotu minji. Tabuli bwalusalululo naa kuupaupa aameso pe. 18Nkabela kutebula kwabululami nkukooko kusyangwa muluumuno abaabo basiluumuno.

Currently Selected:

Jemusi 3: Tonga96

Highlight

Copy