2 Batesalonika 2

Zyamuntu uunyina mulawo

1Lino, bakwesu, kwaamba makani aakuboola kwa Mwami wesu Jesu Kilisito akuyoboloka kwesu kuyoomucingauzya, tuyanda kumukumbila cimwi cintu. 2Mizeezo yanu itanyonganyizigwi, alimwi mutakongwi amajwi aakuti, “Buzuba bwa Mwami bwasika,” nikuba kuti baambe kuti majwi aaya azwa kubusinsimi, naa kuti ndiswe twaaamba, nikuba kuti twaalemba mulugwalo. 3Kutabi muntu uumuunina munzila niiba buti. Nkaambo buzuba oobo kabutanasika, kuyooba buzangi eelyo ndendilyo nayooboneka Sibubi uuyoonyonyoonwa. 4Ngonguwe uukazya Leza uulibikka atala azyoonse zyaambwa kuti mbaleza naa zikombwa. Uyoolibikka muŋanda ya Leza, kalyaamba kuti ngu Leza.

5Sena tamuyeeyi kuti ndakamwaambila makani aaya nindakali aandinywe? 6Mulizi cintu cimukasya kuti atayubunuki kacitanasika ciindi cakwe ceelede. 7Noliba lino bubi nkobuli, pele cakusisikizya. Sibubi ooyo takonzyi kuyubununwa mane akazwe ooyo uumukasya-kasya. 8Kuzwa waawo nayooyubununwa ooyo uunyina mulawo. Nkabela Mwami wesu Jesu uyoomunyonyoona amuuya uuzwa mumulomo wakwe akumulobya aakulibonya mukuboola kwakwe. 9Lino uunyina mulawo ooyo uyooboola anguzu zya Saatani. Uyoocita zitondezyo amaleele aakubeja. 10Munzila zyoonse uyoocenga citaambiki aabo bayoonyonyoonwa nkaambo tiibakayanda kutambula akutobela zyabwini zyali kunga ziyoobafutula. 11Nkankakaako Leza ncayoolekela kuti zibaboolele zyabucengi zipati akuti basyome zyabubeji. 12Nkaako bayoosubulwa boonse batasyomi zyabwini, aabo bakkomanina zitaluleme.

Leza wakamusala kuti mukafutuke

13Swebo tweelede kulumba Leza lyoonse akaambo kandinywe, nobakwesu, bayandwa a Mwami. Nkaambo Leza wakamusala kuzwa kumatalikilo kuti mufutulwe. Mwakafutulwa nkaambo Muuya Uusalala wakamusalazya eelyo mwakasyoma zyabwini. 14Leza wakamwiitila zeezi mu Makani Mabotu ngotwakamukambaukila, kuti mwaabane bulemu bwa Mwami wesu Jesu Kilisito. 15Aboobo, nobakwesu, amuzyandamane mujatisye ziyanza nzimwakaiisigwa andiswe nitwakamwaambila naa kumulembela.

16Lino Mwami wesu Jesu Kilisito a Leza Taata wakatuyanda, kutuumbulizya, kutupa lulangilo lutamani muluse lwakwe 17ayumye-yumye myoyo yanu kuti lyoonse kamwaamba akucita ziluleme.

Currently Selected:

2 Batesalonika 2: Tonga96

Highlight

Copy