2 Batesalonika 3

Amutukombele

1Kumamanino, bakwesu, amutukombele kuti majwi aa Mwami amwaisigwe kufwambaana alimwi bantu baatambule cabulemu mbuli mbomwakacita nywebo. 2Alimwi mukombe kuti Leza atuvune kuzwa kubantu bataluleme babi, nkaambo takuli kuti boonse balasyoma pe.

3Pele Mwami ulasyomeka, ulamuyumya-yumya akumukwabilila kumubi. 4Mwami ulatupa lusyomo lwakuti mulacita zyoonse nzyotumulailila akuti muyoozicita ncobeni. 5Lino Mwami aendelezye myoyo yanu kuti muzibe luyando lwa Leza abusicamba bupa Kilisito.

Ubacenjezya zyakubeleka

6Lino bakwesu, twamwaambila muzina lya Mwami Jesu Kilisito kuti mubazanduke boonse bambungano batolo batayandi kutobela malailile ngotwakamupa. 7Nkaambo nywebo lwanu mulizi mbomweelede kututobela. Tiitwakali batolo nitwakali aandinywe. 8Tiitwakali ba “samba tulye” pe, pele twakoonda milimo masiku asikati lyoonse, kutegwa tutamulemezyi mukuli. 9Takuli kwaamba kuti tiitwakali kukonzya kumulailila kuti mutulele, pele twakacita eezi kuti tube citondezyo cakuti mutobele. 10Nkaambo ciindi nitwakali akati kanu twakamupa mulawo ooyo wakuti, “Naa kuli uukaka kubeleka atabi nalya pe.”

11Lino twakamvwa kuti akati kanu kuli bamwi batolo beenda cakupilingana, batamani mulimo. 12Muzina lya Mwami Jesu Kilisito tulabalailila akubacenjezya bantu bali boobo kuti babeleke milimo yabo muluumuno, balijanine cakulya lwabo beni.

13Bakwesu, mutakatali kucita zibotu. 14Kuti naa umwi ukaka kuswiilila makani ngotwaamba mulugwalo oolu, amumutantamuke muntu ooyo, mutasangani aawe kutegwa afwe nsoni. 15Mutamulangi mbuli sinkondonyoko pe, pele amumucenjezye mbuli mweenzinyoko.

Majwi aamamanino

16Lino Mwami Siluumuno amupe luumuno lyoonse amunzila zyoonse. Mwami abe aanywebo lyoonse.

17Mebo, nde Paulu, ndalemba lujuzyo oolu ajanza lyangu ndemwini. Eeci ncecitondezyo mumagwalo aangu oonse nkaambo mbwelemba oobu. 18Mwami wesu Jesu Kilisito amubede aaluse nyoonse.

Currently Selected:

2 Batesalonika 3: Tonga96

Highlight

Copy