2 Batesalonika 1

1Ndiswe ba Paulu, Siluvano, a Timoti, tulamujuzya nombungano yaku Tesalonika iili njiya Leza Taata a Mwami Jesu Kilisito. 2Leza Taata a Mwami Jesu Kilisito, bamubede aaluse akumupa luumuno.

Zyalubeta Kilisito aakuboola

3Tuleelede kulumba Leza lyoonse akaambo kandinywe, nobakwesu. Tuleelede kucita oobo nkaambo lusyomo lwanu luyabukomena kapati, nkabela aluyando ndomuyandana luyabuvula. 4Nkankakaako ncotulisumpula nkaambo kanu kumbungano zya Leza. Tulacita oobo nkaambo kakukakatila alusyomo lwanu mumakatazyo amumapenzi oonse ngomupenga. 5Zyoonse eezi zilatondezya kuti Leza ubeteka cabululami. Ncayanda ncakuti mweelede kunjila mubwami bwa Leza mbomupengela. 6Leza uyoobonya bululami bwakwe nayoobasubula amapenzi aabo bamupenzya. 7Pele nywebo nomupenga lino uyoomupa kulyookezya antoomwe andiswe. Uyoocita oobo ciindi Mwami Jesu aakuboola kuzwa kujulu antoomwe abangelo bakwe basinguzu. 8Uyooboola amulilo uuvwilima akuzoosubula aabo batazi Leza abaabo bataswiilili Makani Mabotu aaamba zya Mwami wesu Jesu. 9Cisubulo cabo ncakuti bayoonyonyoonwa akutamani. Bayootandwa kuzwa ku Mwami akubulemu bwakwe bwanguzu. 10Ziyooba boobo buzuba mbwayooboola kuti basalali bakwe bamulemeke, iiyi, basyomi bakwe bamulemekezye. Anywebo muyooba ambabo nkaambo mwakasyoma bumboni bwesu.

11Tulamukombela ciindi coonse kuti Leza amucitye kuti mweelele kwiitwa kwanu. Alimwi tulalomba kuti munguzu zyakwe amuyumye-yumye kuti mucite zibotu zyoonse nzyomuyanda kucita amilimo iitondezya lusyomo lwanu. 12Ndendilyo Mwami wesu Jesu nayoolemekwa mulindinywe, eelyo anywebo muyoolemekwa nkaambo muli bakwe. Zyoonse eezi ziyooba ankaambo kaluse lwa Leza wesu alimwi alwa Mwami Jesu Kilisito.

Currently Selected:

2 Batesalonika 1: Tonga96

Highlight

Copy