1 Batesalonika 5
5
Zyakulibambila kuboola kwa Mwami
1Pele, nobakwesu, kumakani aakuziba ziindi noziyoocitika eezi, taciyandiki kuti ndimulembele. 2Nywebo nobeni mulizi kabotu-kabotu kuti buzuba bwa Mwami buyoosika mbuli mubbi masiku. 3Bantu nobati, “Tulaaluumuno, twaliiba.” Ndendilyo eelyo ndilyonya nobayoonyonyoonwa cakufwambaana mbuli kumyongwa kwamukaintu uuminsi nayanda kuzyala. Eelyo tabakakonzyi kutija pe. 4Pele nywebo, nobakwesu, tamuli mumudima kuti buzuba oobo bumusikile mbuli mubbi. 5Nkaambo nyoonse muli bantu bamumuni asikati. Tamuli bamasiku naa bamudima. 6Aboobo tutooni mbuli mbobacita bamwi. Katulanga akubatama. 7Nkaambo aabo boona boona masiku, abaabo bakolwi bakolwa masiku. 8Pele swebo mbotuli basikati atubatame tusame lusyomo aluyando mbuli kalikwabilizyo kalubulo kaacamba. Ayalo ngowani yesu ibe lulangilo lwakuti tuyoofutulwa. 9Nkaambo Leza taakatusala kuti atusubule, pele kuti Mwami Jesu atufutule. 10Walo wakatufwida kuti tube aabuumi antoomwe anguwe, nikuba kuti tukajanike katuli baumi naa katufwide nayooboola. 11Nkaako kamuyumizyanya akuyakana mbubonya mbuli mbomucita kale.
Malailile aamamanino akujuzya
12Lino nobakwesu tulamukumbila kuti mulemeke aabo babeleka akati kanu alimwi abasololi banu mu Mwami Jesu Kilisito, abaabo bamucenjezya. 13Muluyando amubalemeke kapati akaambo kamulimo wabo. Amukkale muluumuno.
14Nobakwesu, tulamukumbila kuti mubacenjezye batolo, mubayumye-yumye batyompedwe, mubagwasye bateteete, mube aacamba cilemu kubantu boonse. 15Amubone kuti mutali kubweedezezyanyi bubi, pele lyoonse amusoleke kucita cibotu kubeenzinyoko alimwi akuli boonse.
16Amukondwe lyoonse. 17Amukombe lyoonse. 18Amulumbe lyoonse, ncenciceeco Leza ncayanda kuti mucite muli Jesu Kilisito.
19Mutalesyi mulimo wa Muuya Uusalala. 20Mutasampauli Majwi aa Leza aakambaukwa. 21Pele mulingule zintu zyoonse. Mubambe ziluleme. 22Mulilesye kuzwa kuzibi zyoonse.
23Leza lwakwe, Leza wa luumuno, amusalazye buzude. Amubambe mubwini muuya, moyo amubili wanu woonse kutegwa mulondoke akubula kampenda ciindi aakuboola Mwami Jesu Kilisito. 24Ooyo wakamwiita ulasyomeka, alimwi walo uyoomucitila eezi.
25Nobakwesu, kamutukombela.
26Amubajuzye bakwesu muluyando lwini-lwini.
27Muzina lya Mwami ndamulailila kuti lugwalo oolu mulubalile bakwesu boonse.
28Luse lwa Mwami Jesu Kilisito lube kulindinywe.
Currently Selected:
1 Batesalonika 5: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
