DUKU 7
7
Soya gbakoo dan‑da Chisɔsi a gbeden
(Matiu 8:5-13)
1Chisɔsi ban‑da kɛn koɔ‑a mɔɛ chɛ n tena, mbɛ a ta‑a Kapanaun duu ɔ. 2Soya gbakoo dɔndɔ ni wan nɔ, min ka‑a Domi chɛnyɛ ɔ. Soya chɛmɛ dɔndɔ ni wan a kɔɔ. Bɔi denɛ ni wan a boo ɔ, min bakoe a ni di a ye gbeden. Bɔi den chɛ gbandi‑a wan, min‑na a ma, ɛnden fan na‑a to a ni fa. 3A‑a Chisɔsi ma tɔɛ a min kɛn, a‑a Chu gbakoo dɔ n sɔ wan a tena. A toen ni an ni a disa, min mbe a ma, a ni na, a ni a 'a bɔi denɛ baun. 4An ta‑a, mbɛ an‑na Chisɔsi tan, an dɔ, “Fa, i dimu, mmɔ ta, i ni kai chɛ 'a bɔi den chɛ baun, a mu min na, mɔ chɛndɛ wa mu a a. 5A yɛ to, a toen mu mmɔ 'a mɔɛ n na sai ma. A wandi gbu an‑na nn 'na samun chɛ chen chɛ sɔ nn ye.”
6Mbɛ Chisɔsi ta‑a an bɛ an na. An che‑a kɛn chenɛ baima gbɛdɛn, mbɛ soya mɔɛ chɛ‑a a dia nyɔɛ n sɔ Chisɔsi ya ɔ. A ɔ, an ni a fɔ a ye ka, “Fa, i ma i wandi tɔɔya. A mu min na, mɔ a tenden ma n na i don koe a n 'na chenɛ a. 7N ma buɛ chɛ gbu an fɛ ni, n‑na n yii na chii, mbɛ a gbu ma nyin, n fandi n ni ta i tan. Chɛɛ i da a kuiɛ a ben dechee, n 'na bɔi denɛ ɛ baun‑da wan. 8A mu min na, n fandi gbu wɛɛ, n mbe mɔɛ n fan 'na gbasaya kɔɔ. N bɛɛ, soya n mbe wan n kɔɔ. N mbe a fɔ wan dɔndɔ ye, n dɔ, ‘Ta,’ mbɛ a ta‑a. N mbe a fɔ wan dɔndɔ wɛɛ ma, n dɔ ‘Na,’ mbɛ a na‑a. Mbɛ n‑na a fɔ n 'na bɔi denɛ ma, n dɔ, ‘Chɛ ma,’ mbɛ a‑a a ma.”
9Chisɔsi tɛnɛ‑a wan a a, bai chɛ a min koe a. Mbɛ a‑a a ya a mun fanka wa chɛ ma, min ni a sɔ tena a fɛ, mbɛ a ɔ, “Kɛn gba, n ma mɔ bonda chɛ yen nin bɛ mmɔ Isɔɛɛ mɔɛ n gbɛɛ tɛ ɔ, min danden mu ka n na.” 10Sɔ mɔɛ chɛ n yɛenɛ a chenɛ a, an‑na a tan gbɛ, bɔi den chɛ baundenɛ ɛ.
Chisɔsi‑a kaminɛ su a kunɛ
11Chɛ gbakɔ, a ɔ ma yansan ni, mbɛ Chisɔsi ta‑a duu dɔndɔ ɔ, an ni min chee, an dɔ, Nain. An bɛ an na‑a ta a fɛ denɛ n na, a basan mɔ fanka dɔ mende n na. 12A yen ko, an che‑a kɛn duu sundu kunɛ a, an‑na mɔ sɛsɛ tan fan, an mbe ta‑a kamin dɔndɔ tɔn‑da. An ni ta tena mɔɛ min tɔn‑da, a de ni fuinya musu an na, a sin a dɔndɔ gbe an ni a de boo ɔ den kaienɛ a. Mɔ sɛsɛ‑a a sɔ wan su chɛ fɛ a ka an duu chɛ ɔ. 13Mansa Chisɔsi‑a sunkun chɛ yen kɛn, a ma chinchinɛ‑a a bia wan, mbɛ a‑a a fɔ a ye, a ɔ, “Sɛmbɛ di‑a.” 14Mbɛ a na‑a, a tu‑a su sa kɔn chɛ a, mbɛ miin ni ta tena su chɛ a, an sɔ‑a an gba ɔ. Mbɛ a‑a a fɔ, a ɔ, “Kamin tɔngbɔɛ, n mbe a fɔ tena i ye, i ni i kɔɔ sɔ.” 15Mbɛ kamin chɛ min faenɛ ni ka, a‑a a kɔɔ sɔ, a si‑a, a bun‑da koɔ‑a. Mbɛ Chisɔsi‑a a be a de ma.
16Chiandia‑a an gbɛɛ bia wan, mbɛ an‑na Yataa tando, an dɔ, “Yataa 'a gbonka chɛ mɔ wa na‑a mmɔ tɛ ɔ. A sin Yataa na‑a a 'a mɔɛ n baun koe a.”
17Chisɔsi na‑a koe min ma ka, a‑a a ma wan a ma tɔɛ ta‑a Chudia chɛnyɛ gbɛɛ ɔ, a basan chɛnyɛ chɛ n na a a tindanɛ.
Chɔn‑na mɔɛ n sɔ Chisɔsi tena
(Matiu 11:2-19)
18Mbɛ Chɔn fɛ denɛ n ta‑a pimbi chenɛ a, mbɛ an‑na ko ɔ ko ɔ yian a a. Mbɛ a‑a mɔ fea n chee an tɛ ɔ, 19mbɛ a‑a an sɔ Mansa Chisɔsi tena, a ɔ tisa koe a, ni a wan mu mɔɛ chɛ a, a wan Chɔn ni gbonka chɛ tena min na koe a. A ɔ, kɔ an ni chia a fɛn mɔ dɔ mende ya ɔ.
20Mbɛ an na‑a Chisɔsi tena, an dɔ, “Chɔn, min ni yii chɛ mɔɛ n kunɛ ɔ, Yataa chia a, an‑na nn sɔ i tena. A ɔ, nn ni i ɔ tisa, ni i wan mu mɔɛ chɛ a, a ni gbonka chɛ tena min na koe a. A ɔ, kɔ nn ni chia a fɛn mɔ dɔ mende ya ɔ?”
21A tima dɔndɔ gbe chɛ a, Chisɔsi ni wan mɔ sɛsɛ baun‑da an 'na gbandi n dɔ. A sin na‑a nyina yama n gbain fan mɔɛ dɔ n fɛ. A yɛ to, a‑a ya te tɔ sɛsɛ ya a ka wan. 22Mbɛ a‑a a fɔ Chɔn 'na sɔ mɔɛ chɛ n ye, a ɔ, “Wo yɛ, wo ta yiima ɔ, wo ni a ɔ yian kai Chɔn na, wo‑a koe miin dɔ yen, ni wo‑a miin na min. Wo a fɔ a ye, wo ta yiima ɔ, mbɛ ya te tɔɛ nu, an‑na kaina ɔ yen, wo ɔ, namaa an sɔ‑a. Wo a fɔ a ye to, wo ta yiima ɔ, wo ɔ, gbandi yama ni miin gboo ma, an baun‑da, wo ɔ, too gbee tɔɛ nu, an‑na koe a min, wo ɔ, miin faen ni, an‑na fɔɛ ma sɔn to, wo ɔ, yɔn tɔɛ n bɛɛ, an‑na sakana bai chɛndɛ chɛ a min. 23Wo a fɔ a ye, wo ɔ, mɔ ɔ mɔ, i wɛn gboo ɔ ma fa ni dan koe a n na, e dua ma sɔn‑da wan.”
24Chɔn 'na sɔ mɔɛ n yɛ‑a kɛn, Chisɔsi‑a a kuu sɔ wan bai sa‑a a si Chɔn ma fanka fanka chɛ tena, a ɔ, “Wo ta‑a kɛn Chɔn tena fuinɛ ma, wo yii na chiien ni mɔɛ minan nyɔn sima tan koe a? Wo nii ma ta ni maa yamba ma kaminɛ an yen koe a. 25Wo na‑a ta nyɔn yen koe a? Wo nii ma ta ni mɔɛ an yen koe a, min ma chiien ni koa baa gbandenɛ ɔ. Tea ko a, mɔɛ miin mbe an ma chii ka, a sin, nyan fen kan kɔ kan mbe an boo ɔ, an mbe ma kata n fan dɔ. 26Wo a fɔ wɛ gbu n ye, wo toen ni wo ni nyɔn yen, min ta‑a wo a? Wo toen ni wo ni Yataa 'a gbonka chɛ mɔɛ an yen? Tea tea a, n ni a fɔ wo ye, wo ban‑da Yataa 'a gbonka chɛ mɔɛ yen‑da, min benden mu Yataa 'a gbonka chɛ mɔɛ tɔɛ n ma. 27A mu min na, Chɔn fan mu sɔ mɔɛ chɛ a, Yataa 'a gboo‑a bai sa a si min ma, a ɔ,
‘Yataa ɔ te kunka mansa Chasi ma,
a ɔ, a yen ko, ɛ a 'a dɛya sɔ tena wan a ya ɔ,
min mbe dɔbɛnɛ chɛ‑a a ko a.’
28N ni a ma din wo tena, mbɛ mɔ ɔ mɔ ee wɛ nɔ dunya ɔ, min benden mu Chɔn ma. Chɛɛ mɔɛ den toa wɛɛ mɔɛ n tɛ ɔ, miin don‑da Yataa 'a mansaya kɔɔ, a benden mu a wan Chɔn sin ma.”
29Mɔɛ chɛ n gbɛɛ, a basan pawa kain mɔɛ chɛ n na, an‑na a a min, Chisɔsi‑a bai min fɔ. A sin an gbɛɛ dɔn‑da wan a ma, mbɛ Yataa toen mu koe min na, a mu tea koe an na. A mu min na, Chɔn na‑a yii chɛ wan an kunɛ ɔ tee, Yataa chia a. 30Chɛɛ Chu mɔɛ chɛ nu miin ni Fayisii n na, an bɛ Chu n n 'na sawa kan mɔɛ n na, an ban‑da bɔ koe a chia chɛ a, Yataa toen ni an ni bɔ min na. Koe min na mu, an ban‑da Chɔn ye yii chɛ koe a an kunɛ ɔ, Yataa chia a.
31Mbɛ Chisɔsi ɔ te to, “N mbe mɔɛ chɛ n siman fen ma gbɛ? Mɔɛ minan sima n mbe nɛ? 32An maen fan mu yɔ den mɛsɛ nu tɔmbɔ chɛ baa ma. Chɛ n mbe denka ɔ, chɛ n mbe kandɔɛ. Miin mbe denka ɔ, an‑na yee tɛ wan kandɔ mɔɛ n tena, an dɔ, ‘Mmɔ si a bɔ, mmɔ ni mmɔ don.’ Chɛɛ kandɔ kaka ma dɔn ni. Mbɛ denka ɔ kaka‑a a fɔ to, an dɔ, ‘Mmɔ di chɛ wɛ.’ Chɛɛ an ma dɔn ni chɛ wɛɛ ma. 33Chɛ tɛen mu min ma, Chɔn min ni yii chɛ mɔɛ n kunɛ ɔ, Yataa chia a, a na‑a wan. A yɛ to, a ni sunɛ bia wan, a sin nii gbɛ min. Wo ɔ te, ɛ dama. Wo ɔ, nyina yama an mbe a fɛ. 34Chɛɛ n fan, Mɔ Gbu 'a Denɛ, n na‑a, n mbe daunɛ chɛ, a yɛ to, n mbe gbɛ min fan. Wo‑a a fɔ wan to, wo ɔ, nun namaya tɔɛ mu n na, wo ɔ, kɔn gbasi kai mu to n na. Wo ɔ te to, n fan mu pawa kain mɔɛ n dia nyɔɛ a, a basan mɔɛ tɔɛ n na, miin mbe ee sɔ ɔ Yataa 'a chia ma. 35Chɛɛ mɔɛ n mbe a ɔ yen‑da wan, mbɛ Yataa 'a yiimatɛ an mu tea tea yiimatɛ a. An mbe chɛ ɔ yen‑da koe n fan ma, mɔɛ chɛ n mbe miin ma‑a, mɔɛ chɛ nu, Yataa‑a a 'a yiimatɛ chɛ be miin ma.”
Chisɔsi‑a a boo bɔ musu dɔndɔ 'a ko yama gbɛɛ ɔ
36Mɔ dɔndɔ ni wan nɔ, min ni Fayisii a, a tɔ ni Saimɔn. A na‑a Chisɔsi chee wan, kɔ a ni ta an ni daunɛ chɛ. Chisɔsi dɔn‑da wan, mbɛ a ta‑a Saimɔn 'na chenɛ a. A che‑a kɛn, mbɛ a si‑a daun chɛ tena. 37Yatina, a tima chɛ a, duu dia dɔndɔ ni wan nɔ an duu chɛ ɔ. A na‑a Chisɔsi ma tɔɛ a min fan, mbɛ ɛ daun chɛ‑a Fayisii chɛ 'a chenɛ a. A ta‑a wan tu kunyɛ a diama wa a an chen chɛ a. Tu chɛ ni baa an dɔ min nyanden ni senɛ ɔ. An sen baa chɛ baa ni gbɛ kaka. 38Musu chɛ don‑da kɛn Fayisii chɛ 'a chenɛ a, a‑a a ma bun fan Chisɔsi gbaa chia a, a chenɛ ɔ fuinden ni kaina, mbɛ a bun‑da di chɛ‑a fiko fiko. A ya yii min ni ka bɔ tena, a‑a Chisɔsi chenɛ n ma chima wan. A‑a a kundi an ya, a‑a Chisɔsi chenɛ n ma fian a a. A yɛ‑a wan to, a‑a a da tu Chisɔsi chenɛ n na, a ɔ yian koe a, mbɛ basɔmaya ɛ wan a boo ɔ Chisɔsi ko a. A‑a tu kunyɛ a diama chɛ ya, mbɛ a‑a Chisɔsi chenɛ ma mun a gbɛɛ a. 39Fayisii chɛ, min‑na Chisɔsi chee ka a 'a chenɛ a daun chɛ koe a, a‑a koe chɛ ɔ yen kɛn, a‑a a fɔ wan a yiima ɔ, a ɔ, “Ni kamin chɛ ni Yataa 'a gbonka chɛ mɔɛ an na tea a, a ni a ɔ sɔn‑da wan musu min nyɔn sima ɛ ka tu tena a a. A ni a ɔ sɔn‑da wan, mbɛ mɔɛ an nɛ, min mbe ee sɔ ɔ Yataa 'a chia ma.”
40Mbɛ Chisɔsi koɔ‑a, a ɔ, “Saimɔn, bai an mbe n da a i ko a.”
Mbɛ Saimɔn dɔ, “Ticha, fen bai mu?”
41Mbɛ Chisɔsi ɔ, “Kamin dɔndɔ ni wan nɔ, min 'na kuiɛ ni kamin fea n ma. Kuiɛ ni wan kaminɛ dɔndɔɛ ma, min taen ni kain gbɛnsɛn#7:41 A tima chɛ a, kain gbɛnsɛn chɛ nɛnɛ, a dɔndɔɛ ni debea pawa ya wan tee dɔndɔ ko a. chɛmɛ duu a, mbɛ dɔndɔɛ sin kain gbɛnsɛn bi duu. 42An fea dɔndɔ wɛɛ ma kun ni an ni kamin chɛ 'a kuiɛ bɔ, min‑na a ma, a‑a a boo bɔ an fea gbɛɛ 'a kuiɛ chɛ ɔ. Mɔ fea chɛ n tɛ ɔ, minan mbe to kuiɛ ti chɛ a, a ni ben a bɔɛ ma?”
43Mbɛ Saimɔn dɔ, “N tana, n 'na yiinachii ɔ, kuiɛ chenama chɛ ni ka min ma.”
Mbɛ Chisɔsi ɔ, “I‑a tea fɔ.” 44A‑a a tindan musu chɛ tena, mbɛ a ɔ Saimɔn ma, “I‑a a ɔ yen fan, musu chɛ‑a koe min ma n tena, ae? N don‑da kɛn bi i 'a chen chɛ a, i ma yii be ni n ma, n chenɛ wɛɛ ma ko koe a. Chɛɛ musu chɛ to‑a wan di chɛ‑a aan, a ya yii‑a n chenɛ ma chima, a sin‑na a kundi an ya to, a‑a n chenɛ n ma fian a a. 45N don‑da kɛn i 'a chen chɛ a, i ma n kɔndɔn ni koadia ɔ,#7:45 Chu mɔɛ nu, miin ni ma dia nyɔncha ɔ, an ni kɔndɔnɛ chɛ ka wan. An ni an da an tu mɔɛ gbɔngbɔɛ a. chɛɛ aan n na‑a bi tima min na, musu chɛ ɛ tun a da tu tu‑a n chenɛ n fan na koadia ɔ. 46I ma n kɔ ni tu ɔ, a sin koe a n kunɛ a, chɛɛ musu chɛ‑a tu kunyɛ a diama sin fan n chenɛ ma. 47Chɛ an‑na a fɔ, n ni a ma din i tena, mbɛ musu chɛ‑a koadia chenama min dɔ yian ka n na, a‑a a ɔ yian fan, mbɛ Yataa‑a a boo bɔ a 'a ko yama chɛ n gbɛɛ ɔ. Chɛɛ Yataa ɛ a boo bɔ‑a mɔɛ min 'na ko yama sima sima ɔ dechee, a mɔɛ chɛ ee koadia chenama ɔ yian.”
48Mbɛ Chisɔsi‑a a fɔ musu chɛ ye, a ɔ, “N‑na n boo bɔ i 'a ko yama ɔ.”
49Mbɛ mɔɛ tɔɛ chɛ nu, miin ni ka si ɔ daun chɛ tena chɛ, an‑na a kuu sɔ a fɔ‑a an nyɔn ye, an dɔ, “Kamin chɛ e na ma nyɔn na, a boo bɔ koe a mɔɛ n 'na ko yama n bɛɛ ɔ?”
50Chɛɛ Chisɔsi‑a a fɔ wan musu chɛ ye, a ɔ, “Ta i faa chimaenɛ a don, i 'a danaya‑a i baun.”
Currently Selected:
DUKU 7: KONONT
Highlight
Share
Copy
Want to have your highlights saved across all your devices? Sign up or sign in
New Testament in Kono © The Bible Society of Sierra Leone, 2006.
