DUKU 6
6
Chisɔsi an mu suin tee ma mansa a
(Matiu 12:1-8; Maki 2:23-28)
1Chu mɔɛ n 'na suin tee dɔndɔ ma, Chisɔsi ni ben tena wan chia a sɛnɛ dɔndɔ tɛtɛ ma, an bɛ a fɛ denɛ n na. Mbɛ a fɛ denɛ n bun‑da sɛnɛ chɛ ɔ chin fenɛ tɛ‑a an boo a, an mbe a yoyɛ‑a, an mbe ta‑a a daun‑da.#6:1 Mɔɛ ni kun fan, ni a ma‑a ben‑da mɔ dɔ mende 'a sɛnɛ ɔ, a ni chin fen chɛ tɛ a boo a, yɔ Chu n 'na sawa na‑a a fɔ buɛ min dɔ. Chɛɛ an nii dɔn a ni a tɛ mɛ a. 2Mbɛ Chu mɔɛ dɔ nu nɔ, miin ni Fayisii n na, an dɔ, “Wo e ka ko bonda min ma tena suin tee ma, a ma nyin ɛnden bɛɛ a. Mmɔ 'a sawa ma dɔn ni, mɔ ni wai chɛ suin tee ma.”
3Mbɛ Chisɔsi ɔ, “Mansa Defidi na‑a koe ma wan tima dɔndɔ a. Chɛɛ n ma dan ni a a, mbɛ wo‑a a kan fan bɛ Yataa 'a gboo ɔ. Mbɛ kɔnkɔɛ na‑a a bia tima min na, an bɛ a fɛ mɔɛ n na, 4a don‑da wan Yataa 'a chenɛ a, mbɛ biidi chɛ min been ni Yataa ma, a‑a a ya, mbɛ a‑a a daun. A yɛ‑a wan to, mbɛ a‑a a tɔɛ be a fɛ mɔɛ n ma. A na‑a mmɔ 'a sawa an yɔn ka, a mu min na, mmɔ 'a sawa na‑a a fɔ wan, mbɛ mɔ ɔ mɔ ee an biidi chɛ daun, mɔɔ dechee mɔɛ chɛ nu, miin mbe mmɔ tɛ ɔ Yataa a.”
5Mbɛ a‑a a fɔ an ye, a ɔ, “N fan, Mɔ Gbu 'a Denɛ, n fan mu mansa a suin tee ko a.”
Chisɔsi‑a kaminɛ baun, min boo faenɛ ni a ma
(Matiu 12:9-14; Maki 3:1-6)
6Suin tee dɔ mende ma, Chisɔsi don‑da wan Chu n 'na samun chɛ chen dɔndɔ a, mbɛ a‑a mɔɛ n kan nɔ. Kamin dɔndɔ ni wan nɔ, min boo nyima faen ni a ma. 7Chu n 'na sawa kan mɔɛ dɔ nu, a basan Chu mɔɛ dɔ n na, miin ni Fayisii n na, an toen ni an ni chia an yan koɛ be koe a Chisɔsi ma. An‑na a a tɛ wan chɛndɛ chɛ, min mbe a ma, an ni a ɔ yen, ni ɛ mɔɛ chɛ baun‑da wan suin tee ma. 8Chɛɛ Chisɔsi na‑a an yii ma koe sɔn fan, mbɛ a‑a a fɔ kamin chɛ ye, min boo chɛ faen ni ka a ma, a ɔ, “I kɔɔ sɔ, i ni na nɛ ya ɔ.” Kamin chɛ na‑a wan, mbɛ a sɔ‑a an ya kɔɔ. 9Mbɛ Chisɔsi ɔ, “A nyin fan, mmɔ ni a ɔ sɔn, mmɔ 'a sawa dɔnden mu fen ma suin tee ma. Mmɔ 'a sawa dɔnden fan mu mɔ ni mɔɛ baun, a ben a fa koe ma. Mmɔ 'a sawa dɔnden fan mu to mɔ ni ko chɛndɛ ma, a ben ko yama ma koe ma.” 10Mbɛ Chisɔsi‑a an gbɛɛ ya kɔɔɛ ma fɛn dɔndɔ dɔndɔɛ a a 'a tindanɛ, mbɛ a‑a a fɔ kamin chɛ ye, a ɔ, “I boo ɔ sawan.” Mbɛ a‑a a boo ɔ sawan, mbɛ a boo baun‑da, yɔ a dɔndɔɛ ni buɛ min dɔ.
11Mbɛ sawa kan mɔɛ chɛ n faa tɛ‑a a ɔ benden ba a, an bɛ Fayisii chɛ n na. Mbɛ an bun‑da a tɛnsɛ‑a an nyɔn tɛ ɔ, ni an mbe fen ma Chisɔsi a.
Chisɔsi‑a a boo sɔ a 'a sɔ mɔɛ n ma, an mɔ tan kun ma fea
(Matiu 10:1-4; Maki 3:13-19)
12Tima dɔndɔ a, Chisɔsi sɛ‑a wan kɔnkɔ dɔndɔ kun tɛ samun chɛ koe a. A chi‑a nɔ wan kudu ɛ samun chɛ‑a Yataa tena. 13Banda ɔ ka‑a kɛn, a‑a a fɛ denɛ n gbɛɛ chee wan, mbɛ a‑a a boo sɔ mɔ tan kun ma fea n ma an tɛ. Mbɛ a‑a an ma a 'a sɔ mɔɛ n na. 14-16A na‑a a boo sɔ chɛ n fan ma: Saimɔn, ni a dɔɛ Anduu, Chimisi ni Chɔn, Fiipi, Batɔɔmiu, Matiu, Tɔmɔsi, Chimisi dɔndɔɛ, Saimɔn, Chudasi ni Chudasi Isikayɔti. Saimɔn saa saa, a‑a min ya, a‑a tɔ dɔ gbɛɛ be wan a ma a ɔ Pita. Chimisi fean bɔɛ fa tɔ ni Afiɔsi. Saimɔn dɔndɔɛ wɛɛ ni mɔɛ an na, min ni a 'a chɛnyɛ ma chɛɛ chɛ tena. Chudasi saa fa tɔ ni Chimisi. Chudasi Isikayɔti ni mɔɛ an na min danka‑a Chisɔsi ma tachɛ‑a.
Chisɔsi‑a mɔ sɛsɛ kan, mbɛ a‑a an baun
(Matiu 4:23-25)
17Mbɛ Chisɔsi‑a kɔnkɔɛ chɛ yii, an bɛ a 'a sɔ mɔɛ tan kun ma fea chɛ n na. Mbɛ a sɔ‑a nɛngbunɛ ɔ. A fɛ denɛ sɛsɛ dɔ mende n ni wan nɔ, a basan mɔ fanka fanka a. Mɔɛ chɛ n tɛ ɔ, dɔ n ka‑a wan Chuusaɛn duu ɔ ni Chudia chɛnyɛ tɔɛ n gbɛɛ ɔ. A yɛ to, dɔ n ka‑a wan Taya ni Sidon duu ɔ, miin ni kɔ yii a sanɛ. 18An na‑a na, min mbe a ma, an ni Chisɔsi da a kuiɛ a min. An toen ni to, a ni an baun an 'na gbandi n dɔ. Nyina yama ni miin fɛ, an bɛɛ na‑a na wan, mbɛ Chisɔsi‑a an baun. 19Mɔɛ n gbɛɛ‑a butuin chɛ wan, min mbe a ma, an ni tu Chisɔsi a, koe min na mu, bauncha gbasaya ni wan ka tena a tena, ɛ ta‑a mɔɛ n gbɛɛ baun‑da.
Chisɔsi‑a bai sa, a si dua ma, a basan ko yawaenɛ a
(Matiu 5:1-12)
20Mbɛ Chisɔsi‑a a ya a mun a fɛ denɛ n ma, a ɔ,
“Wo duaen mu, wo wɛn yɔnden mu.
A mu min na, Yataa ma‑a wo 'a mansa a.
21Wo duaen mu, kɔnkɔɛ ɛ wo wɛn na sanche.
Yataa ɛ wo bu fa‑a wan.
Wo duaen mu, wo wɛn mbe di chɛ‑a sanche.
Wo e yɛn‑da wan.
22“Ni mɔ gbu n too‑a wo a a si n ma, n fan, Mɔ Gbu 'a Denɛ, dua mu a a wo ma. Ni an‑na an kan kɔ sɔ wo a, mbɛ an‑na wo main, mbɛ an yɛ‑a, an‑na bai yama sa wo ma. 23Ni koe chɛ n si‑a wo a, wo bu ɔ ni dia. Wo buɔdia tɔmbɔɛ don, koe min na mu, Yataa ɛ tɔnɔnɛ chenama sa tena ɔ bɛn‑da wan wo ko a banda bu ɔ. Wo bu ɔ ni dia, a mu min na, an‑na ko ma gbaaen dɔndɔ gbe chɛ nyɔn sima sa wo ma, yɔ an bemba n ta bemba n‑na min sa suun Yataa 'a gbonka chɛ mɔɛ n ma.
24“Chɛɛ koe chɛ n mbe yaua‑a gba, miin mbe wo tan‑da, wo wɛn nyanden mu sanche.
A mu min na, wo ban‑da wo ta buɔdia bɔ‑a dunya chɛ ɔ.
25Koe chɛ n mbe yaua‑a gba, miin mbe wo tan‑da, wo wɛn bu faen mu gban sanche.
Kɔnkɔɛ ɛ wo bia‑a wan.
Koe chɛ n mbe yaua‑a gba, miin mbe wo tan‑da, wo wɛn mbe yɛn tena sanche.
Wo e chinchin di chɛ‑a wan.
26“Ni mɔɛ n gbɛɛ‑a wo tɔ a diama fɔ, koe miin mbe wo tan‑da, ɛ yaua‑a gba. Koe min na mu, an bemba n ta bemba n‑na tɔ a dia dɔndɔ gbe chɛ an chɛ suun chɛ n na, miin ni fania fɔ, mbɛ Yataa 'a gbonka chɛ mɔɛ mu an na.”
Chisɔsi ɔ te, mɔ ni to i ko don ma nyɔɛ a
(Matiu 5:38-48; 7:12a)
27Chisɔsi ɔ, “Chɛɛ n ni a fɔ wo ye, wo wɛn mbe n kuiɛ a min tena sanche. Wo ko don ma nyɔɛ mu miin na, wo to an na. Mɔɛ miin tooen mu wo a, wo ko chɛndɛ ma an na. 28Mɔɛ miin mbe wo danka tena, wo an dua. Miin mbe ko yama ma tena wo a, mbɛ wo‑a samunɛ chɛ an ko a. 29Ni mɔ ɔ mɔ‑a wo gban fɛ dɔndɔɛ gbasi, wo dɔndɔɛ wɛɛ a mun, a ni a wɛɛ gbasi. Ni mɔ ɔ mɔ‑a wo 'a doma kun ma doma ya, wo a kɔɔ nɛnɛ wɛɛ be a ma. 30Ni mɔ ɔ mɔ‑a wo ɔ tisa a deman koe a, wo a deman. Ni mɔ ɔ mɔ‑a wo boo fenɛ ya, wo ma a ɔ tisa to a a yɛ koe a wo ma. 31Wo toen mu mɔɛ n ni koe min nyɔn sima a tachɛ wo tena, min na di wo ye, wo a nyɔn sima an na tachɛ an bɛɛ tena.
32“Mɔɛ miin toen mu wo a, ni wo to‑a nɔ, wo ni to dechee an fan na, Yataa ee wo dua‑a. A mu min na, ko yama ma mɔɛ n bɛɛ toen fan mu mɔɛ n na, miin toen mu an na. 33Mɔɛ miin mbe ko chɛndɛ ma wo a, ni wo e ko chɛndɛ ma dechee an fan na, Yataa ee wo dua‑a. Ko yama ma mɔɛ n bɛɛ mbe chɛ an ma. 34Mɔɛ miin mbe che wo 'a kuiɛ n bɔ‑a, ni wo e kuiɛ be dechee an fan ma, Yataa ee wo dua‑a. Ko yama ma mɔɛ n bɛɛ mbe kuiɛ be wan an bɔɛ ko yama ma mɔɛ n ma, koe min na mu, an‑na a ɔ sɔn fan, mbɛ an mbe a ma sɔn‑da wan. 35Chɛɛ wo e min ma, wo to wo ko don ma nyɔɛ n na, mbɛ wo‑a ko chɛndɛ ma an na. Kuiɛ a dɛ, a sin wo ma wo yii na chii a a yɛ koe a wo ma. Ni wo‑a koe chɛ n ma, Yataa ɛ tɔnɔnɛ chenama be‑a wan wo ma, mbɛ wo sɔnɛ bɔ‑a Yataa Wa sɔnɛ a. A mu min na, ɛ ko chɛndɛ ma wan wai nyima sɔn bai n na, a basan chɛ n na, miin yau kaka. 36Chinchimaya ni ma wo ɔ, yɔ Fa Yataa wɛɛ chinchimayaen mu buɛ min dɔ.”
Chisɔsi‑a bai sa, a si nyɔn ma bɔɛ ma
(Matiu 7:1-5)
37Chisɔsi ɔ, “Wo ma wo bɔɛ n ma bɔ. Ni wo ma chɛ ma ni, Yataa wɛɛ ee kaa a tɛ‑a wo wakoe ma. Wo ma kaa yama a tɛ. Ni wo ma chɛ ma ni, Yataa wɛɛ ee wo yɛi‑a. Wo wo boo bɔ wo bɔɛ n 'na ko yama maenɛ n dɔ wo a. Ni wo‑a chɛ ma, Yataa wɛɛ‑a a boo bɔ‑a wan wo ta ko yama maenɛ n dɔ. 38Wo wai nyima chɛ wo bɔɛ n na. Ni wo‑a chɛ ma, Yataa wɛɛ ɛ wai nyima chɛ‑a wan wo a. Ɛ fenɛ miin be‑a wo ma, ɛ kɔkoa‑a wan aan, a sin mbe ma‑a wan, yɔ ni an‑na pani a fa gban, mbɛ an‑na a ma din, mbɛ an‑na a a fa to, ɛ bɔn fan a ma. Wo‑a a be‑a buɛ min dɔ wo bɔɛ n ma, Yataa wɛɛ‑a a be‑a ka wan wo wɛɛ ma.”
39Mbɛ Chisɔsi‑a tai chɛ tɛ an tena, a ɔ, “Ya te tɔɛ ee che chia yian‑da a bɔɛ ya te tɔɛ a. Ni a‑a chɛ ma, an fea gbɛɛ ɛ bea‑a wan sonɛ ɔ. 40A yɛ to, kan den kan kɔ kan ma ben ni a kan mɔɛ ma. Chɛɛ kan den kan kɔ kan, ni a‑a kanɛ a ban, ɛ ma wan yɔ a kan mɔɛ.
41“Ni kɔn gbondo ma‑a wo ta ya a, wo ma wo faa gbaa bubuu ko a wo bɔ n ya a. 42Wo ee kun wo ni a fɔ wo bɔɛ ye, wo ɔ, a ni ka wɛ, wo ni bubuu ɛnden chɛ bɔ a ya a, min mu ka, kɔn gbondo chɛ ɛ sa ɔ wo ta ya a. Wo wan nɛnɛn fea ti chɛ nu, wo kɔn gbondo chɛ bɔ pɛn wo ta ya a, mbɛ wo kun‑da gbɛ kaina yen koe a gbadan, a bubuu chɛ bɔ koe a wo bɔɛ ya a.”
Chisɔsi‑a tai tɛ, a si kɔnɛ gbɔɛ ma
(Matiu 7:16-20; 12:33-35)
43Chisɔsi ɔ, “Kɔn chɛndɛ ee gbɔ yama be, n mbe ee baa kɔn yama ni gbɔ chɛndɛ be. 44Kɔn kan kɔ kan mbe sɔn a gbɔɛ an ma, ɛ min be. Mɔ ee che kɔn gbɔ chɛndɛ kai‑a kɔn yama ɔ. 45A chia dɔndɔ gbe chɛ a, mɔ chɛndɛ ɛ ko chɛndɛ an ma, a mu min na, a faa ɔ gbɛen fan mu. Mbɛ mɔ yama sin mbe ko yama an ma, a mu min na, a faa ɔ finden fan mu. Koe min mbe mɔ gbu faa ɔ, an mbe bɔ a da ɔ.”
Chisɔsi‑a tai tɛ, a si chen sɔ mɔ fea ma
(Matiu 7:24-27)
46Chisɔsi ɔ, “Ni wo ee na‑a n da a kuiɛ a min‑da, wo ma n chee, ‘Mansa, Mansa.’ 47Mɔ ɔ mɔ kan kɔ kan, min mbe na‑a n tena, a ni a too ma sɔ n 'na bai ma, mbɛ a‑a a ma, yɔ n toen mu buɛ min dɔ a ma koe a. N mbe a ɔ yian‑da wan wo a, an mɔɛ chɛ ɛ buɛ min dɔ. 48Ɛ ka wan yɔ kamin chɛ min ni chen sɔɛ a. A‑a son dɔ yiienɛ sin pɛn, mbɛ a‑a a 'a chenɛ kuu si gban son chɛ ɔ. A ban‑da kɛn an chenɛ sɔ‑a, yii fa‑a wan, mbɛ a sɛ‑a a kuu ma. Chɛɛ a ma che ni a ni a a bɔn, koe min na mu, a sɔen fan ni chɛndɛ chɛ. 49Chɛɛ mɔɛ min mbe n 'na bai a min‑da, mbɛ a ma a ma ni, yɔ n toen mu buɛ min dɔ a ma koe a, ɛ wan yɔ kaminɛ min‑na chenɛ sɔ, chɛɛ a ma a kuu si ni chɛndɛ. Yii fa chɛ sɛ‑a kɛn chen chɛ kuu ma, a bea‑a wan dɔndɔ gbe. A yɔn‑da wan a yama boo a.”
Currently Selected:
DUKU 6: KONONT
Highlight
Share
Copy
Want to have your highlights saved across all your devices? Sign up or sign in
New Testament in Kono © The Bible Society of Sierra Leone, 2006.
