DUKU 8
8
Musu dɔ n ta‑a Chisɔsi ma sɔ‑a
1Tima ɛnden gbakɔ, Chisɔsi ben ben‑da wan duu n dɔ, ɛ ta‑a sakana bai chɛndɛ chɛ ɔ yian‑da mɔɛ n na, a si Yataa 'a mansaya ma. A fɛ den tan kun ma fea n bɛɛ ni wan a fɛ. 2Musu dɔ n bɛɛ ni wan a fɛ. An ni musu n fan na, Chisɔsi na‑a miin baun an 'na gbandi ɔ. An dɔ n sin, a na‑a nyina yama n fan gbain an fɛ. Musu chɛ n gbu sin tɛ ɔ, musu dɔndɔ ni wan nɔ, min tɔ ni Mɛi, min ka‑a Makadaa duu ɔ. Chisɔsi na‑a nyina yama wɔnfea gbain an fɛ. 3Chowana wɛɛ ni to an musu chɛ n dɔndɔ an na, min chɛɛ ni wai chɛ tena Mansa Ɛdɔdi ko a. Susana wɛɛ ni wan nɔ, a basan musu sɛsɛ dɔ gbɛɛ n na. Musu chɛ n ni an fandi ta boo fenɛ n be wan Chisɔsi ma, an bɛ a fɛ denɛ n na, an ta basamaya a.
Chisɔsi‑a tai tɛ, a si chin fen nyan duu gboo ma
(Matiu 13:1-9; Maki 4:1-9)
4Mɔɛ n ni wan tun na‑a Chisɔsi tena, a ka duu sɛsɛ n dɔ, mbɛ fanka wa a kan‑da kɛn, Chisɔsi‑a tai chɛ an tɛ an tena.
5-8A ɔ, “Tee dɔndɔ a, kamin dɔndɔ ta‑a wan a 'a sɛnɛ ɔ, chin fen fasi tena. Ɛ a fasi chɛ an na, mbɛ dɔ bea‑a chia kuu a. Mbɛ dɔ n bɛɛ bea‑a faa gban duu gboo ma, dɔ n yɛ‑a an bea‑a wai duu gboo ma, mbɛ dɔ n sin bea‑a duu gboo chɛndɛ ma. Chin fen kuu miin bea‑a ka chia kuu a, mɔɛ n tɛn tɛn‑da wan a ɔ, mbɛ konde n bɛɛ‑a an sogban sogban fan. Miin sin bea‑a ka faa gban duu gboo chɛ ma, an fɛn‑da wan, chɛɛ an fa‑a wan. Koe min na mu, yii kan kɔ kan nii an duu gboo chɛ ɔ. Miin sin bea‑a ka wai duu gboo chɛ ma, an bɛɛ fɛn‑da wan, a basan wai chɛ a dɔndɔ a, chɛɛ wai chɛ n koa‑a wan a ben chin fen chɛ n ma. Chɛ‑a chin fen fɛn chɛ n na kɔnya wan, mbɛ an gbaa‑a. Miin bea‑a ka duu gboo chɛndɛ chɛ ma, an fɛn‑da wan, a danka a, an gbɔ‑a wan wɔsɔkɔɔ. An yii‑a wan gbaa chɛmɛ dɔndɔ ko a.”
Chisɔsi ɔ te gbɛ, “Wo wɛn too ɛ koe a min, wo chɛ a min.”
Chisɔsi 'a tai chɛ tɛen mu koe min ma
(Matiu 13:10-17; Maki 4:10-12)
9Chisɔsi fɛ denɛ n‑na a ɔ tisa wan, ni a‑a tai min tɛ ka a fasaien mu fen na. 10Mbɛ a ɔ, “Mɔɛ gbɛɛ nii ma min dɔ sɔn tee, a si Yataa 'a mansaya ma, a‑a an dɔ yian wo a. Chɛɛ mɔɛ tɔɛ chɛ nu, n mbe koɔ an tena tai an dɔ. Min mbe a ma, an ya a kaenɛ ɛ ma‑a wan, an ni kaina fɛn, chɛɛ an mbe ee ko ɔ ko ɔ yen‑da. Mbɛ an mbe an too ma sɔ‑a wan, chɛɛ an mbe ee ko ɔ ko ɔ gbɛ‑a.”
Chisɔsi‑a tai chɛ fasai an tena
(Matiu 13:18-23; Maki 4:13-20)
11Chisɔsi ɔ, “Tai chɛ tɔmɔsi an nɛ. Chin fen kuu chɛ mu Yataa 'a bai an na. 12Mɔɛ dɔ n mbe wan yɔ chia a duu gboo chɛ, chin fen kuu n bea‑a min ma. Ni an‑na Yataa 'a sakana bai a min, Sitana ɛ na wan a ya kɔɔɛ a, mbɛ a‑a bai chɛ bɔ an yiima ɔ, min mbe a ma, an ma na dan sakana bai chɛndɛ chɛ a, mbɛ an‑na bauncha ma sɔn. 13Mɔɛ dɔ n sin mbe wan yɔ faa gban duu gboo chɛ, chin fen kuu n bea‑a min ma. Ni an‑na sakana bai chɛndɛ chɛ a min, an mbe an boo si wan a kɔɔ, buɔdia wandi gbu a. Chɛɛ Yataa 'a bai chɛ ee sa an yiima ɔ chɛndɛ chɛ, a ni tima ɔ yansama ya nɔ. An mbe dan dechee a a tima ɛnden fan ko a, chɛɛ ni koe ɔ gbɛa‑a an ma, mbɛ an‑na an boo bɔ a kɔɔ. 14Mɔɛ dɔ n sin mbe wan nɔ yɔ wai duu gboo chɛ, chin fen kuu chɛ n bea‑a ka min ma. An mbe sakana bai chɛndɛ chɛ a min fan, chɛɛ faagbaa ɛ wan an mɔɛ chɛ n ma, dunya chɛ ɔ nyanɛ ko a, a basan a ɔ buɔdia a. Ni chɛ ma‑a an yii ma, an mbe ee che an gbɔsɔ‑a Yataa 'a wai chɛ koe a. 15Mɔɛ dɔ n sin mbe wan yɔ duu gboo chɛndɛ chɛ, chin fen kuu n bea‑a ka min ma. Ni an‑na sakana bai chɛndɛ chɛ a min, an mbe a sa wan an yii ma chɛndɛ chɛ, mbɛ an‑na a ma, yɔ sakana bai chɛ‑a min fɔ an ye a ma koe a. A sin to, yakɔɔtawa kan kɔ kan ni an tan bɛɛ, an mbe ee sɛmbɛ dan koe a Yataa a.”
Chisɔsi‑a tai tɛ, a si dambo manɛ ma
(Maki 4:21-25)
16Chisɔsi ɔ, “Ni mɔ ɔ mɔ‑a dambo a man, a ee samba bun a kun ma, chɛ ma, a ni a a don sofa kɔɔ. Chɛɛ ni mɔ‑a dambo a man, e a si kaina wan, min mbe a ma, ni mɔɛ n don‑da dechee i 'a chenɛ a, an mbe kun fan an ni kaina ɔ yen gbadan.
17“Koe min na mu, ko ɔ ko min dɔ nunden mu, ɛ bɔ‑a wan ya a ma. Koe min bɛɛ ma bunden mu, a wɛɛ ɛ bɔ‑a wan ya a ma tee dɔndɔ a.
18“Chɛ an‑na a fɔ, wo wo kun ma fɛn wo e wo too ma sɔ‑a buɛ min dɔ. A mu min na, miin mbe an too ma sɔ‑a chɛndɛ chɛ, Yataa ɛ an 'na yiimatɛ ma munda‑a wan. Chɛɛ mɔɛ miin mbe ee dɔn‑da an too ma sɔ‑a, yiimatɛ ɛnden chɛ wɛɛ min mbe ma‑a an dɔ, Yataa ɛ a ma‑a wan an ni fo a.”
Chisɔsi de na‑a a tena, an bɛ a dɔ kaima n na
(Matiu 12:46-50; Maki 3:31-35)
19Mbɛ Chisɔsi de na‑a a tena, an bɛ a dɔ kaima n na. Chɛɛ an ma kun ni, an ni gbɛn a ma, a mu min na, fanka da a ni koo kaka a 'a tindanɛ. 20Mbɛ mɔ dɔndɔ‑a a fɔ Chisɔsi ye, a ɔ, “I de yen ko sɔ ɔ baa ma, an bɛ i dɔ kaima n na. An toen mu an ni i yen.”
21Mbɛ Chisɔsi‑a a fɔ an gbɛɛ ye, a ɔ, “Mɔɛ miin mbe Yataa 'a bai a min‑da, mbɛ an‑na an boo si a kɔɔ, n de mu an fan na. N dɔ kaima n bɛɛ mu an mɔ dɔndɔ gbe chɛ n fan na.”
Chisɔsi‑a fia wa a gban yii wa a
(Matiu 8:23-27; Maki 4:35-41)
22Tee dɔndɔ a, Chisɔsi sɛ‑a dɛndɛ dɔndɔ ɔ, an bɛ a fɛ denɛ n na. Mbɛ a ɔ, an ni yii wa chɛ tɛ tindi dɔndɔɛ ma. Mbɛ an bun‑da ta‑a dɛndɛ chɛ ɔ. 23An to‑a ta an na yii chɛ a, mbɛ Chisɔsi chinɔ‑a a ye. Mbɛ fia wa‑a a kuu sɔ bɔ‑a, min‑na a ma, yii bun‑da chɛ‑a dɛndɛ gbu ɔ. A na‑a to ɛnden fan na, dɛndɛ gbu ni tunɛ an na yii ɔ. 24Mbɛ a fɛ denɛ n bun‑da a a kunɛ‑a. An dɔ, “Kan mɔ, kan mɔ, mmɔ yen ko to‑a yii ɔ.”
Mbɛ Chisɔsi‑a a kɔɔ sɔ, a‑a yii chɛ, min kɔnkɔɛ ni sɔ ka dengben, a ɔ ɛ gbasi, a fea fia min bɛɛ ni bɔ tena, a‑a an na gban. Mbɛ fia ɔ maun‑da don, mbɛ yii wɛɛ si‑a chidi. 25Mbɛ a ɔ an ma, “Fen ko a mu, wo ma dan ni n na?”
Chɛɛ an da ɔ gbaa‑a wan, a sin, an chian‑da wan, mbɛ an dɔ an nyɔn ma, “Fen kamin nyɔn sima mu chɛ a? Ɛ koe min fɔ fia wɛɛ yɛ, a basan yii a, an mbe ma.”
Chisɔsi‑a nyina yama n gbain kamin dɔndɔ fɛ
(Matiu 8:28-34; Maki 5:1-20)
26Chɛ gbakɔ, Chisɔsi n‑na a fo wan gbɛ yii wa chɛ tindi ma Kɛyasa chɛnyɛ ɔ, an bɛ a fɛ denɛ n na. Kɛyasa chɛnyɛ chɛ ni Kadidi chɛnyɛ ya teen ma wan. 27An che‑a kɛn nɔ, Chisɔsi ɛ bɔ‑a dechee dɛndɛ chɛ ɔ a sɛ tindi ma, kamin dɔndɔ min bɔ‑a Kɛyasa duu ɔ, a na‑a wan, a‑a Chisɔsi tan. Kamin chɛ nyina yama n fan ni a fɛ. A na‑a tima ɔ yansama ya wan a ma senɛ ɛ, a sin nii ta chenɛ a. A ni chi fanɛ#8:27 Kɛyasa mɔɛ n ni an 'na mɔɛ n tɔn fanɛ a wan kɔnkɔɛ kaa ma. Kamin chɛ ni chi an fan chɛ dɔndɔ an na. a wan bɛnkuɛ ɔ. 28-29Tima sɛsɛ ko a, nyina yama chɛ n ni a ma wan, kamin chɛ ni bui, a ni ta kaina mɔ ɔ mɔ ee kaina min. Mɔɛ n ni a chenɛ ɔ chii wɛɛ yɔɔɛ a, a basan a boo a, a ni yɔɔɛ chɛ ɔ tɛ tɛ wan, mbɛ nyina yama chɛ n‑na a ma, a ben‑da bui‑a. A‑a Chisɔsi yen kɛn dechee, a‑a yee tɛ wan gbankon, mbɛ a bea‑a a chen na. Mbɛ a‑a a fɔ a kuiɛ ma sɛenɛ a, a ɔ, “Chisɔsi, Yataa Wa 'a denɛ, i toen mu i ni fen ma n na? I dimu, i ma n mɔnɛ.” A‑a chɛ fɔ, a mu min na, Chisɔsi‑a a fɔ wan nyina yama chɛ n ye, a ɔ, an ni ka a fɛ.
30Mbɛ Chisɔsi ɔ, “I tɔɛ?”
Mbɛ a ɔ, “N tɔ mu Fanka Wa.” A‑a chɛ fɔ, a mu min na, nyina yama sɛsɛ ni wan a fɛ. 31Nyina yama chɛ n yɛ‑a wan, an‑na Chisɔsi disa, min mbe a ma, a ma na an na ta ta ɔ tɔɔya koe a.
32A tima chɛ a, kɔɛnya man sɛsɛ ni wan daun chɛ‑a an baima kɔnkɔɛ kaa fɛ. Nyina yama chɛ n‑na Chisɔsi disa wan, min mbe a ma, a ni dɔn an ye an ni bea kɔɛnya chɛ n fɛ. A dɔn‑da wan an da a kuiɛ ma. 33Nyina yama chɛ n ka‑a wan kamin chɛ fɛ, mbɛ an bea‑a kɔɛnya chɛ n fɛ. Kɔɛnya man chɛ n ben‑da wan bui‑a, a ka kɔnkɔɛ chɛ kaa fɛ. An yii‑a wan an dɛ‑a yii ɔ, mbɛ an to‑a an yii gbu ɔ.
34Mɔɛ chɛ nu, miin ni ka kɔɛnya chɛ n kun ma fɛn tena, an‑na a ɔ yen kɛn koe min ma‑a, an ben‑da wan bui chɛ‑a. Mbɛ an ta‑a, an‑na a ɔ yian mɔɛ n na duu ɔ, a basan konko mɛsɛ chɛ n dɔ a. 35Mɔ sɛsɛ n na‑a wan, min mbe a ma, an ni a ɔ yen min ma‑a. An che‑a kɛn, nyina yama chɛ n ni ka kaminɛ min fɛ, an‑na a tan fan, ɛ si ɔ Chisɔsi chen kɔɔ. A ma chiienɛ ɛ, a sin a yiima tɛenɛ ɛ. Chɛ‑a a ma wan, an gbɛɛ chian‑da. 36Mɔɛ miin ni ka nɔ ko ɔ ko ma‑a, an fan‑na a ɔ yian gbɛ an bɔ n na, Chisɔsi‑a nyina yama chɛ n gbain buɛ min dɔ kamin chɛ fɛ. 37Mbɛ mɔɛ chɛ n gbɛɛ miin ka‑a ka Kɛyasa chɛnyɛ ɔ, an‑na Chisɔsi disa, an dɔ, a ni bɔ an 'na tanda ɔ. Koe min na mu, an chian‑da wan kaka. Mbɛ Chisɔsi sɛ‑a dɛndɛ ɔ yɛ koe a. 38A tima chɛ a, kamin chɛ, Chisɔsi na‑a nyina yama chɛ n gbain ka min fɛ, a‑a disa chɛ wan, a ɔ, Chisɔsi ni a ma an bɛ ni ta.
Chɛɛ Chisɔsi ɔ, 39“Ta i 'a mɔɛ n tena. I ni a ɔ yian an na, Yataa‑a koe min chɛ i ye.” Kamin chɛ wɛɛ ta‑a wan, mbɛ a ben ben‑da duu chɛ ɔ gbɛɛ, ɛ a ɔ yian‑da, Chisɔsi‑a koe min chɛ a ye.
Chisɔsi 'a baun chɛ, a basan a 'a fɔɛ be a
(Matiu 9:18-26; Maki 5:21-43)
40Mbɛ Chisɔsi yɛ‑a yii wa chɛ kaka dɔndɔɛ, a ka‑a kaina, an bɛ a fɛ denɛ n na. An‑na mɔ fanka tan a ma kɔn‑da, a sin mɔɛ chɛ n bu ɔ dia‑a wan an yen koe a. 41Mɔ chenama dɔndɔ Chu n 'na samun chɛ chenɛ a, min tɔ ni Chayɔsi, a na‑a wan, mbɛ a bea‑a Chisɔsi chen na. Mbɛ a‑a a disa, a ɔ, an ni ta a 'a chenɛ a. 42Koe min na mu, a 'a den musuen dɔndɔ gbe, min sanɛ ni gbɛ san tan kun ma fea, a ni gbɛ a ni ma tanka an na dechee.
Chisɔsi‑a a kuu sɔ kɛn ta‑a dechee, mɔɛ n findi findi‑a wan a ma, a ka kaka kan kɔ kan ma. 43Musu dɔndɔ ni wan fanka chɛ tɛ ɔ, musu n 'na kau ma gbandi ni min ma, san tan kun ma fea ko a. A na‑a a boo fenɛ gbɛɛ ma tachɛ wan buii ti n ma, chɛɛ mɔ ɔ mɔ ma kun ni, a ni a 'a gbandi chɛ danda a ma. 44A na‑a na wan fanka fanka chɛ ɔ Chisɔsi gbaa chia a, mbɛ a tu‑a Chisɔsi 'a doma kai chɛ da a. Mbɛ a 'a wii chɛ ɔ tɛ‑a a ma a ya kɔɔɛ a. 45Mbɛ Chisɔsi ɔ, “Nyɔn tu‑a n na?”
Mɔ ɔ mɔ‑a kɔɔsa bia chɛ wan tu koe a a a. Mbɛ Pita ɔ, “Kan mɔ, mɔɛ n mbe i a tindanɛ, an mbe tindi tindi‑a i ma, mbɛ i ni tisa chɛ to mɔɛ tu koe a i a?”
46Chɛɛ Chisɔsi‑a a fɔ wan tun, a ɔ, “Mɔɛ an tu‑a n na, a mu min na, n‑na a ɔ sɔn fan, mbɛ gbasaya dɔ bɔ‑a n dɔ, danda chɛ koe a.” 47Mbɛ musu chɛ‑a a ɔ yen fan, mbɛ a‑a min ma, a bɔ‑a ya a ma. Chɛ ko a, a na‑a wan, a ma samba sambaenɛ ɛ, mbɛ a bea‑a Chisɔsi chen na. A tima a, mɔɛ gbɛɛ ya kɔɔ, a‑a a ɔ yian Chisɔsi a, fen na‑a a ma a tu‑a a a. A sin to, a baun‑da buɛ min dɔ a ya kɔɔɛ a. 48Mbɛ Chisɔsi ɔ, “Bɔɔɛ, ta i faa chimaenɛ a don. I 'a danaya‑a i baun.”
49Chisɔsi to‑a koɔ tena wan musu chɛ tena, mbɛ sɔ mɔɛ na‑a a ka Chayɔsi 'a chenɛ a. Mbɛ a ɔ, a 'a den musuenɛ gbu fa‑a, a ma na sɔ to ticha tɔɔya‑a ta koe a nɔ.
50Chɛɛ Chisɔsi na‑a bai chɛ a min fan, mbɛ a‑a a fɔ Chayɔsi ye, a ɔ, “I ma chian, dan dechee a a, mbɛ ɛ baun‑da wan.”
51A che‑a kɛn Chayɔsi 'a chenɛ a, a nii ma dɔn ni, mɔ dɔ mende kan kɔ kan ni don a san‑da, mɔɔ dechee Pita, Chɔn, Chimisi, den chɛ fa, a basan den chɛ de a. 52Mɔɛ n gbɛɛ ni wan yee tɛ‑a, an mbe ta‑a di chɛ‑a den chɛ kun ma. Chisɔsi ɔ, “Wo sɛmbɛ di chɛ‑a, den chɛ ma fa ni, ɛ sa ɔ chinɔɛ ɔ wan dechee.”
53A‑a bai chɛ fɔ kɛn, mɔɛ chɛ n gbɛɛ‑a a yɛn fan, a mu min na, an na‑a a ɔ sɔn fan, mbɛ den chɛ faen fan ni tea tea a. 54Chɛɛ Chisɔsi‑a den chɛ ya wan a boo ma, mbɛ a‑a a chee banda a, a ɔ, “N 'na den, i kɔɔ sɔ.” 55Mbɛ den chɛ ni yɛ‑a a ɔ, mbɛ a‑a a kɔɔ sɔ bui a. Mbɛ Chisɔsi‑a an sɔ, a ɔ, an ni daun fen den be a ma, a ni a daun. 56A woo mɔɛ n da a fa‑a wan koe chɛ a. Chɛɛ Chisɔsi‑a an na si wan gbau gbau, mbɛ an ma a ɔ yian mɔ ɔ mɔ a, min ma‑a ka.
Currently Selected:
DUKU 8: KONONT
Highlight
Share
Copy
Want to have your highlights saved across all your devices? Sign up or sign in
New Testament in Kono © The Bible Society of Sierra Leone, 2006.
