ROMANIK 5
5
Kit ne biitune kayanet
1Kitinye kalyet ak Jehovah eng’ Kiptaiyandennyo Jesu Kristo amu kigiityech imanda eng’ kayanet; 2ak kigenyoru eng’ inendet agine kemong’ji eng’ kayanet mieinoto kitonone; ak ongeboiboitu eng’ kamang’unetab torornatetab Jehovah. 3Ak ma u noto kityo, ago ongeboiboitu eng’ nyalilwogikyok: kingen kele ibu nyalilda muitaet; 4ak ibu muitaet tiemisiet; ak ibu tiemisiet kamang’unet: 5magonu kamang’unet kililan; amu kigerong’ji chamnyetab Jehovah mugulelwekyok eng’ Tamirmiriet ne Tilil ne kigegonech.
Kiboru chamnyetab Jehovah eng’ meetab Kristo
6Amu ye kita ko ki nyalulyotin, kome Kristo agobo che yaachen eng’ betut ne kiga kelewen. 7Amu bichii kome chi agobo chi ne bo imanda: ago abere kanyei chito age kome agobo chi ne mie. 8Ago iboruech achek Jehovah chamnyennyi, amu ye kita ko ki kiptengeginik, kome Kristo agobo achek. 9Ak ne siirei mising’ anyun, ko kagiityech imanda eng’ korotikyik, kesoruech eng’ neregekab Jehovah eng’ inendet. 10Amu ye kita ko ki bunik, ko kigituiyech ak Jehovah eng’ meetab Werinnyi, ne siirei mising’ anyun, koga kituiyech, kesoruech eng’ sobondanyi. 11Ak ma u noto kityo, ago kiboiboi agachek eng’ Jehovah eng’ Kiptaiyandennyo Jesu Kristo, amu kigenyoru eng’ inendet katuiyet.
Begu bik eng’ Adam, soptos bik eng’ Kristo
12Noto anyun, ko u ye kimong’ji ng’ony tengek eng’ chito agenge, ak meet amu tengek; koityi anyun meet bik tugul, amu kiyai tugul tengek - 13amu kimi ng’ony tengek agoi koit Ng’atutik: ago magiiti tengek ye mami ng’atutik. 14Ago kiboi meet koboch Adam agoi Musa, agot eng’ ichek che kima yai tengekto ne kergei ak bistoetab Adam, ne ki itondab inendet ne ki tun konyo. 15Ago ma u bistoet, konunetab chamnyet. Amu ngo kibek che chang’ eng’ bistoetab agenge, ko kitesak mising’ kosiir eng’ che chang’, mieindab Jehovah, ak konunet eng’ mieindab chito agenge, Jesu Kristo. 16Ak ma kergei kit ne biitune konunet ak kit ne biitune tengektab chito agenge: amu kinyo kiruoget eng’ agenge agoi kagikyinet, ago kinyo konunetab chamnyet eng’ bistautik che chang’ agoi kaiityinetab imanda. 17Amu ngo kiboi meet eng’ bistoetab agenge; ne siirei mising’ anyun, kobou eng’ sobondo ichek che taachei chang’indab mieindo ak konunet ne bo imanda eng’ agenge, noto Jesu Kristo.
18Noto anyun, ko u ye kinyonji bik tugul kiruoget agoi kagikyinet eng’ bistoetab agenge; ko u noto kinyonji bik tugul konunet ne kigoitoi buch, agoi kaiityinetab imanda ne bo sobondo eng’ bistoet agenge ne bo imanda. 19Amu ko u ye kiek che chang’ kiptengeginik eng’ bistoetab chito agenge, ko u noto kiyaei che chang’ kobunji imanda eng’ kasetab it ne bo agenge.
20Ak kinyo Ng’atutiet, si kobiit kotesak bistoet; ago ye kitesak tengekto, ko kitesak mieindo mising’ kosiir: 21si, ko u ye kiboi tengekto eng’ meet, ko u noto bou mieindo eng’ imanda agoi sobondab koigeny eng’ Jesu Kristo Kiptaiyandennyo.
Currently Selected:
ROMANIK 5: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
