ROMANIK 4
4
Kaborunetab Abraham
1Kimwae nee anyun agobo Abraham, kwandanyo, kinyor nee eng’ atebetab borto? 2Amu nda kiga kiityi Abraham imanda eng’ boisionik, kotinyei inendet ne ilosunegei; ago ma eng’ taitab Jehovah. 3Mwaei nee anyun sirutik? Kiiyan Abraham Jehovah, ak kigiityi inendet imanda. 4Ago inendet ne boisiei, ko magiityin melekto kele bo mieindo, ago bo besendo. 5Ago eng’ inendet ne maboisiei, ago iyani inendet ne iityin imanda chi ne ya, kiiti kayanennyi kele bo imanda. 6Agot ko u ye kimwa Daudi agine agobo kaberuretab chito ne iityin Jehovah imanda ama eng’ boisionik, 7kole,
Boiboen ichek che kigenyochi kaat tengekwogikwak,
Ak che kigetuch tengekwogikwak.
8Baibai chito ne matun iityin kiptaiyat tengekto.
9Tos kimwae kaberuroni agobo che kigimuratan, anan che ma kimuratan agichek? Amu kimwae kele, Kigiityi Abraham kayanennyi kobunji imanda. 10Kigiityindo ano anyun? Ye kiga kimuratan anan ye kitom kimuratan? Ma eng’ kamuratanet, ago ye kitom kimuratan: 11kitaach kaborunetab kamuratanet, ng’okset ne bo imandab kayanet ne kitinyei ye kitom kimuratan: si kobiit koek kwandab ichek tugul che kiyani, agot ye kitom kimuratan, si kobiit kiityi ichek imanda; 12ak koek kwandab che imuratanotin eng’ ichek che ma bo kamuratanet kityo, ago che bendi agichek eng’ tiegutikab kayanonoto bo kwandanyo Abraham ne kitinyei ye kitom kimuratan.
13Amu kima kigochi Abraham ak keswekyik arorutiet eng’ oret ne bo Ng’atutiet kele kobunji ng’ony, ago eng’ imanda ne bo kayanet. 14Amu ngot koek che namei tuguk, ichek che bo Ng’atutiet, ko kagoek buch kayanet, ak kageyai arorutiet koek ne matilei kiy: 15amu ibu Ng’atutiet neregek; ago ole mami ng’atutiet, ko mami bistoet.
16Bunu kayanet amu nito, si kobiit koek ne bo mieindo; si mawalak arorutiet eng’ iyotet tugul; ma choto bo Ng’atutiet kityo, ago choto agichek che bo kayanetab Abraham, ne kwandanyo achek tugul 17(ko u ye sirat kole, Kaayain iegu kwandab bororiosiek che chang’) eng’ taitab ne kigoyan inendet, noto ko Jehovah, ne isoobi che kigobek, ak koguurei tuguk che mami, ko u che mi. 18Kiiyan eng’ kamang’unet ye kima komi kiy ne kimang’u, si kobiit koek kwandab bororiosiek che chang’, kiga kemwa ko u noto kele, Tenitu choto iyoteng’ung’. 19Ak kima nyalul eng’ kayanet ye kiibwati bortanyi ne u ne kigome, (ye kiga kotar olo bo kenyisiek bogol) ak Sara ne kiga kosiirto betusiekab iyotet: 20ee, kima sage kobistoe ye kiibwati arorutietab Jehovah, ago kitesak kogimit eng’ kayanet, kotorori Jehovah, 21ak kiingen komie kole kit ne kiga koaror inendet, komuchi koyai kosulda. 22Eng’ noto anyun, ko kigiityi inendet imanda. 23Ago kima kisir agobo inendet inegei, kele kigiityi inendet; 24ago amu achek agachek, che tun kiityin, che iyani inendet ne kiing’eet Jesu Kiptaiyandennyo komong’ eng’ che kibek, 25ne kigigoito amu bistautikyok, ak kiging’eet si kobiit kiityech imanda.
Currently Selected:
ROMANIK 4: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
