ROMANIK 6
6
Manamegei ak tengek katuiyet ne kigituiyech ak Kristo
1Kimwae nee anyun? Kitebi eng’ tengek, si kobiit kotesak mieindo? 2Achicha, ma u noto. Achek che kigebekyi tengek, ko ta kesoptoi ano eng’ tengek? 3Anan ma onai ole achek tugul che kigibatisanjech Jesu Kristo ko kigibatisanjech meennyi? 4Noto anyun kigetubech koboto inendet eng’ kabatisanet agoi meet: si ko u ye kiging’eet Kristo eng’ che kibek eng’ torornatetab Kwanda, ko u noto, kibendoti agachek eng’ sobondo ne leel.
5Amu ngo kigituiyech ak inendet eng’ kergeindab meennyi, ke u noto agachek eng’ kergeindab ng’eetyennyi; 6kingen ni, kele kigigartat chinnyo ne bo keny koboto inendet, si kong’emak bortab tengek, si mata koratech tengekto kogeny. 7Amu inendet ne kigome kotiagat eng’ tengek. 8Ago ngo kigebegu koboto Kristo, kiyani kora kele kisoptosi koboto inendet; 9kingen kele kiging’eet Kristo komong’ eng’ che kigobek: ma komeei kogeny; ma kotinyei meet bounatet eng’ inendet kogeny. 10Amu meet ne kime, ko kimechi tengek konyil agenge ak koyam; ago sobet ne sobei inendet kosobei eng’ Jehovah. 11Ko u noto oiityige ak okwek ole kiobekyi tengek, ago osoptosi eng’ Jehovah eng’ Kristo Jesu.
12Noto anyun amochamji tengek koboi borwekwok che begu, si ogas it magutikwak: 13anan ogochi tengek kebeberwekab borwekwok koek karik che ma bo iman; ago ogochige Jehovah, ko u che soptos che kamong’une che kibek, ak ogochi Jehovah kebeberwekab borwekwok koek karikab imanda. 14Amu matinyei tengek bounatet eng’ okwek: amu ma omi eng’ Ng’atutik, ago eng’ mieindo.
Kaborunet ne bunu otwoknateb
15Nee anyun, kiyai tengek, amu ma kemi eng’ Ng’atutik, ago eng’ mieindo? Achicha, ma u noto. 16Mongen ole, inendet ne ogochinige oegu otwogik agoi kasetab it, ko o otwogikab inendet ne ogase it; ngo bo tengekto agoi meet, anan ngo bo kasetab it agoi imanda? 17Ago kimwachini Jehovah kongoi, amu, okwek che ki o otwogikab tengekto, ko kiogas it eng’ muguleldo konetisiet ne u ne kigegonok okwek; 18ak ye kingitiachak eng’ tengek, oegu otwogikab imanda. 19Ang’alali ko u biteetab bik amu nyalulet ne bo borwekwok: amu ko u ye kiogoite kebeberwekab borwekwok koek otwogikab muruonindo ak tengek agoi tengek, ko u noto anyun ogoite kebeberwekab borwekwok koek otwogikab imanda agoi tililindo.
20Amu ye kita ko o otwogikab tengekto, ko kiotiagotin eng’ imanda. 21Kiotinye logoek nee eng’ betusiechoto eng’ tuguk che olilane nguno? Amu kagesunetab tuguchoto ko meet. 22Ago nguno ko kagitiachak eng’ tengekto, ak kaoegu otwogikab Jehovah, otinye logoekwok agoi tililindo, ak kagesunet ko sobondab koigeny. 23Amu melektab tengek ko meet; ago konunetab chamnyet ne bo Jehovah ko sobondab koigeny eng’ Kristo Jesu Kiptaiyandennyo.
Currently Selected:
ROMANIK 6: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
