MARIKO 13
13
Sib komwaei Jesu agobo ng’emisietab hekalut, ak agobo kagesunetab kenyisiek
1Ak ye kimandoi eng’ hekalut, kolenji age eng’ alamalyennyi, Konetindoni, keero, kie u koichu ak kie u teeksoni! 2Ak kilenji Jesu, Tos igeere teeksosiechu eechen? Matun ng’etu koita agenge eng’ baragutab age, ne magiwirjin ng’ony.
3Ak kingotebyei ng’ony eng’ tulwetab Emitik ye tokyindos ak hekalut, koteebe inendet Petero ak Jakobo ak Johana ak Andrea komi ichegei, kole, 4Mwawech, yaoksei tuguchuto auiyo? Ak nee kaborunet ne tun iboru kole karik kosulda tuguchuto tugul?
5Ak kitoi Jesu kolenji, Oripge si maibeetok chi. 6Bwanei tun che chang’ eng’ kainennyu, kolen, A inendet; ak kobeet che chang’. 7Ak ye tun ogas agobo lugosiek ak ng’alek agobo baretab ge, ko moarogense: kanyol koek ko u noto; ago tom koit kagesunet. 8Amu setyin bororiet age bororiet age, ak setyin bounatet age bounatet age: ak kobiit botanetab ng’ony eng’ oldinwek che terotin; ak kobiit rubosiek: tuguchuto ko taunetab ng’woninwek.
9Ago oripge okwek: amu tun kimutyinok kapkiruok; ak kebirok eng’ sunagogisiek; ak oteleli eng’ taitab bounik ak laitorinik agobo ane, si koek baornat eng’ ichek. 10Ak kanyol keamji korok logoiywek che miach bororiosiek tugul. 11Ak ye tun kimutak kapkiruok, ak kindeak eunekab bik, ko mat ogerer met agobo kit ne tun omwae: ago kit age tugul ne kigonok eng’ sainato, ko noto ne omwae: amu ma okwek che ong’alali, ago Tamirmiriet ne Tilil. 12Ak kong’wekta chi ng’etab kamet kebar, ak kong’wekta kwanda lakwennyi; ak kong’eetyi lagok sigikwak, ak kogoito kebar. 13Ak kowechok bik tugul amu kainennyu: ago ne muitoi agoi let, kesoru noto.
14Ago ye tun ogeer kit ne kiwechei ne bo ng’emisiet kotonone ole ma nyoljin kotonone (ingoguiyo ne somani), ingomwechi anyun che mi Judea tolonok: 15ama chortagei chi ne mi got barak anan kwo go, si kobiit konem kiy eng’ gonnyi: 16amat koweek chi ne mi mbar kwo koib ngoriennyi. 17Bwa eng’ ichek che chio ak che reritos eng’ betusiechoto! 18Ak osa si matun yaak choto eng’ betusiek che bo kaititindo. 19Amu egu nyalilda eng’ betusiechoto, ne kitom koegu ko u noto koboch taunetab yaetab ng’ony ne kiyai Jehovah, agoi nguno, ama kobiitu ko u noto kogeny agoi. 20Ak nda kima til Kiptaiyat betusiek konwagitu, ta ma kisoru chi: ago kitil betusiek amu che lewenotin che kilewen.
21Ak ngo lenjok chi eng’ betusiechoto, Ogeero, mi Kristo oli; anan, Ogeero, mitei olo; ko mat oyan: 22amu ng’eetos Kristoisiek che bo lembech, ak maotik che bo lembech, ak kobortoi kaborunoik ak kwong’utik, si kobeet, agot che kigelewen nda imugaksei. 23Ago oripge: ogeero, kasib amwawok tuguk tugul.
24Ago eng’ betusiechoto, ko kagobata nyalilata, koimenit asista, kama koluu arawet, 25ak kororok kecheik eng’ kipsengwet, ak kotumdumgei kimnatosiek che mi kipsengwetisiek. 26Eng’ sainoto kogeer anyun Weritab chi konyonei eng’ bolik koboto kimnatet ne o ak lilindo ne o. 27Yeityo koyokto malaikaisiek, ak koyum lewenikyik, kobun usonaik ang’wan, kobunu tabandab ng’ony agoi tabandab kipsengwet.
Kanyol keripge
28Onetge kalewenetab mogoiywet: ye kang’arng’aritu temenikyik, ak kong’atyo sogek, onai ole karik kesisiet; 29u noto ak okwek ye ogeer kosuldoi tuguchu, onai ole kagorik inendet, mi kurgotik. 30Amwawok iman ale, Masiirtoi ibini, ama isulda tuguchuto tugul. 31Siirtoi kipsengwet ak ng’ony, ago masiirtoi ng’alekyuk.
32Ago mami chi ne naei agobo betunoto anan sainato, agot malaikaisiek che mi kipsengwet, agot Werit, kobate Kwanda inegei. 33Oripse anyun, ogenisie ak kosae: amu mongen ye egune. 34U chi, ne kibagach gonnyi, ak koruto emet age, ak kogochi otwogikyik kimnatet, chi age tugul ak boisiennyi, ak kong’at ribindet koripso. 35Oripse anyun: amu mongen ye itu chitab kobo got, ngo lagat, anan kemoi kwen, anan ye iteei kipsoiywet, anan karon; 36si macheak ak konyoruok oruitosi. 37Ak ng’olyot ne amwawok okwek amwachini tugul, ale, Oripse.
Currently Selected:
MARIKO 13: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
