MARIKO 12
12
Kalewenet agobo mbaret ne bo sabibuk
1Ak kitoi kong’alalji ichek eng’ kalewenaik kole, Kiminji chito age sabibuk mbaret, ak kong’ot, ak kobal keringet ole kirurung’e sabibuk, ak koteech got ne koi, ak komanakyi meek, ak kwo emet age. 2Ak kingoit betusiekab kesisiet, koyokto otwogindet kwo ole mi meek, si kobiit konyorune meechoto logoek che bo mbaretab sabibuk. 3Ak kinam inendet, ak kobir, ak koon kwo buch. 4Ak kiiyokyi kogeny otwogindet age; ak kibir metinnyi, ak kotewer. 5Ak kiiyokto age; ak kobar inendet: ak kiiyokto alak che chang’; kobir alak, kobar alak. 6Kita kotinyei anyun agenge, noto werinnyi ne chamat: kiiyokto inendet eng’ let kwo ole mi ichek, kole, Teechei werinnyu. 7Ago king’alalso meechoto ichegei, kolen, Nito ne namei tuguk; obwa, kebar inendet, si kindii tuguk. 8Ak kinam inendet, ak kobar, ak kowirta komanda eng’ mbaret ne bo sabibuk.
9Yaei nee anyun chitab kobo mbaret ne bo sabibuk? Nyonei anyun kobarei meechoto, ak komanakyi meek alak mbaranato bo sabibuk. 10Tom osoman sirutichu;
Koita ne kiesio teegik,
Kigiyai noto koek metitab luita:
11Kibunu ng’olyondoni Kiptaiyat, ak ko kwong’ut eng’ konyekyok?
12Ak kicheng’ei ole namdoi inendet; ago kiiywei tuiyet; amu kinai kole kamwa kalewenoni agobo ichek: ak kibagakta inendet, ak koba.
Ng’olyot ne kigiteeb agobo tuguk che kigochin Kaisari
13Ak kiiyokyi Parisaik alak ak che bo Herodik, si korate ng’alekyik. 14Ak kingobwa, kolenji inendet, Konetindoni, kingen kele i bo iman, ameiti chi age tugul: amu megeere itondab chi, ago ineti iman oretab Jehovah: Tos chamdoi ng’atutik kigochi kodi Kaisari, anan machamdoi? 15Kigoite anan acha? Ago kinai inendet chombilenywa, ak kolenji ichek, Kalya si otiema? Oibwa denarit ageer. 16Ak kiipchi. Ak kilenji ichek, Bo ng’o itoni ak sironi? Ak kolenji, Bo Kaisari. 17Ak kilenji Jesu, Ogochi Kaisari tuguk che bo Kaisari, ak ogochi Jehovah tuguk che bo Jehovah. Ak kikwong’io mising’ agobo inendet.
Ng’olyot ne kigiteeb agobo ng’eetyet
18Ak kibwanji inendet Sadukaik, che mwaei kole, mami ng’eetyet, ak koteebe inendet, kole, 19Konetindoni, kisirwech Musa kole, Ngo me ng’etab kametab chi, ak kobagakta osotiondennyi, ama sich lakwa, kondii ng’etab kamet osotiondonoto, si kobiit kolalji mat ng’etab kamet. 20Kimi werik tisabu che kitupcho: ak kiitunis werit ne o, kome ama sich lakwa; 21ak kiindi agine ne bo aeng’, kome ama sich lakwa; ak kiigei noto agine ne bo somok: 22ak ma biitune tugul tisab lakwa. Let kome agine kobogoriondonoto. 23Tun eng’ ng’eetyet kobunjin ng’o eng’ ichek osotiondonoto? Amu kiga kobunji choto tisab. 24Ak kilenji Jesu ichek, Ma noto ne kigonok olel, amu mongen sirutik, anan kimnatetab Jehovah? 25Amu ye tun ng’eetyo ichek komong’ eng’ che kibek, ko maitunisiei, ama kituni; ago tebyei ko u malaikaisiek eng’ kipsengwet. 26Ago agobo bik che kigobek, kele tun ng’eetos, ko tom osoman eng’ bukuitab Musa, eng’ ole kimi Ketit, ko u ye kimwachi Jehovah inendet, kolenji, A Jehovah ne bo Abraham, ak a Jehovah ne bo Isak, ak a Jehovah ne bo Jakobo? 27Inendet ko ma Jehovah ne bo che kigobek, ago bo che soptos: olele mising’.
Ng’olyot ne kigiteeb agobo ng’atutiet ne o eng’ tugul
28Ak kinyo age eng’ sirik, ak kogas koteebegei, ak kingonai kole kawolji ichek komie, koteebe inendet, kole, Nee ng’atutiet ne bo tai eng’ tugul? 29Kowolji Jesu kolenji, Ne bo tai ni, Ogaso, ee, Israel; Kiptaiyat Jehovah nenyo, ko Kiptaiyat agenge: 30ak icham Kiptaiyat Jehovah neng’ung’ eng’ muguleldang’ung’ komugul, ak eng’ sobondang’ung’ komugul, ak eng’ ng’omnateng’ung’ komugul, ak eng’ kimnateng’ung’ komugul. 31Ne bo aeng’ ko ni, Cham chitab kokweng’ung’ ko u ole ichamdoige. Mamitei ng’atutiet age ne o kosiir chu.
32Ak kilenji sirindet, Iman, Konetindoni, kaimwa komie, ile, inendet ko agenge; ama mi age kobate inendet: 33ak ngocham inendet eng’ muguleldo komugul, ak eng’ kaguiyet komugul, ak eng’ kimnatet komugul, ak ngo cham chitab kokwet ko u ole chamdogei, kosiirei noto kagochinoik tugul che kibeelei ak tiseiywek. 34Ak kingogeer Jesu kole kawol eng’ ng’omnatet, kolenji, Ma i loo eng’ bounatetab Jehovah. Ak mata kogany chi koteebe ng’olyo age tugul.
Kristo Weritab Daudi
35Ak ye kiinetisiei Jesu eng’ hekalut, komwa kole, Lyon si komwaei sirik kole, Kristo ko weritab Daudi? 36Kimwa Daudi inendet eng’ Tamirmiriet ne Tilil, kole,
Kimwachi Kiptaiyat Kiptaiyandennyu, kole,
Tebe eunnyu ne bo tai,
Agoi ande buniguk keldebesaikab kelyeguk.
37Kuure Daudi inendet Kiptaiyat; koegundoi ano anyun werinnyi? Ak kiepchin it tuiyet ne o inendet eng’ boiboindo.
Kanyol keribege sirik
38Ak eng’ konetisiennyi, kolenji, Oribege sirik, che chamei kobendat kolaachi ngoroik che koen, ak kagatosiek eng’ oldinwekab aldaisiet, 39ak ng’echerok che bo tai eng’ sunagogisiek, ak oldinwek che bo tai eng’ igorwek: 40ak korebe ichek mosogik gorikwak, ak kosaei sautik che koen kong’alsei; nyoru bichu kiruoget ne o kosiir.
Tuguk che kiigoito mosoget
41Ak kiteb ng’ony kotokyigei ole kiyumjin tuguk che kigoitoi, kogeer ole indoitoi tuiyet sendeisiek ole kiyumjin: ak kiinde magorek alak sendeisiek che chang’. 42Ak kinyo mosoget age ne kibanania, ak konde sendeisiek aeng’, che u kebeberta ne ming’in ne bo denarit. 43Ak kiguur alamalyennyi anyun kobwa ole mi inendet, ak kolenji, Amwawok iman ale, Kagonde mosogani banan che siirei che kagonde bik tugul che indoi tugukwak ole kiyumjin: 44amu kagonde ichek tugul che bo chang’indab tugukwak; ago kagonde inendet che bo banandanyi, tugul che katinyei, agot che kosobe.
Currently Selected:
MARIKO 12: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
