MARIKO 14

Koncheng’ei bik ole bartoi Jesu

1Ak kingobata betusiek aeng’u kobiit igortab paska ak makatinik che ma kinde mermerek: ak kicheng’ tisiik che eechen ak sirik ole imuktoi konam eng’ ng’alset, si kobiit kobar inendet: 2amu kile icheget, Amat ongenam eng’ igorta, si mabolyo bik.

Kerong’jin mwaita Jesu eng’ Betania

3Ak ye kimi inendet Betania eng’ gotab Simon ne kiamei mogondosik, kota kotebyei eng’ amisiet, konyo kobogoriot ne tinyei chubait ne mi mwaita ne nyamdut ne bo kamanutiet ne o; ak kotui chubainato, ak korong’ji metinnyi. 4Ak kimi alage che kinerektos eng’ orit kolen, Amu nee si kibeet buch mwai? 5Amu kata yamei kealdae mwai che siirei denarisiek bogol somok, ak kigochi kibananok. Ak kiing’unyng’ung’ji inendet.

6Ago kile Jesu, Obagakte; kalya si oiim inendet? Kayaiywa boisiet ne mie. 7Amu otinye kotugul kibananok, ak eng’ ui tugul ye omache, omuchi oyachi ne mie: ago mami ane kotugul kobotok. 8Kagoyai ne imuchi: kasib koiil bortanyu agobo tubet. 9Ak amwawok iman ale, Ui tugul ole kiamjin logoiywek che miach eng’ ng’ony komugul, kemwaitoi agine ne kayai kobogoriondoni si kobiit koek kabwatet agobo inendet.

Chaamset ne kichaame Judas Jesu

10Ak kiwa Judas Iskariot, ne ki age eng’ taman ak aeng’, ole mi tisiik che eechen, si kobiit kong’wekyi icheget. 11Ak kingab kagas ichek, koboiboitu, ak koarorji kole, kogochi fedaisiek. Ak kicheng’ sait ne yamei si kong’wekta inendet.

Igorta ne bo let

12Ak eng’ betut ne bo tai ne bo makatinik che ma kinde mermerek, ye kienyei aruetab paska, kolenji alamalyennyi, Imache kebe ano si kechobun ole iame paska?

13Ak kiiyokto aeng’ che bo alamalyennyi, kolenji, Oba nganaset, ak otuiye chito ne ibu teretab beek: osub inendet; 14ak oldo tugul ole mong’jin inendet, olenji chitab kobo got, Kale Konetindet, Mi ano gonnyu ne bo toek, ole anyone aame igortab paska koboto alamalyennyu? 15Ak koboruok inendet got ne o ne bo barak ne tetat tuguk, ak ko chobot: ak ochobwech oloto.

16Kiba anyun alamalyet, kot koit nganaset, konyor ko u ye kaga kemwachi: ak kichob anyun paska. 17Ak kingoek koskoleny konyo koboto taman ak aeng’. 18Ak ye kitebyei eng’ amisiet, kole Jesu, Amwawok iman, ale, Ng’wektoa age eng’ okwek, inendet ne kiamisiei tuwai. 19Kotoi anyun koarogenso, ak kolenji inendet agenge agenge, Tos ane? 20Ak kilenji ichek, Noto ko agenge eng’ taman ak aeng’, ne kiburburtoi tuwai eng’ tabet. 21Amu wendi Weritab chi, ko u ye sirat agobo inendet: ago bwa eng’ chichoto king’wektae Weritab chi! Kita mie eng’ chichoto ko ma kisich.

22Ak ye kiamisiei icheget, konam makatiat, ak kingo kagoberur, kobutul, ak kogochi, ak kole, Onam: ni ko bortanyu. 23Ak kinam kikombet, ak kingo kagomwa kongoi, kogochi ichek: ak koee tugul. 24Ak kilenji, Chu korotikyuk che bo arorutiet, che tumdogei agobo che chang’. 25Amwawok iman ale, Ma aee kogeny che bo logoekab sabibuk, agoi betunoto ne aee che leelach eng’ bounatetab Jehovah. 26Ak kingo kagotien tiendo, komanda koba tulwet ne bo Emitik.

Sib komwaei Jesu kole bagaktoi alamalyet inendet

27Kolenji Jesu ichek, Kinachok okwek tugul: amu kigisir kele, Abire mestowot, ak koiyesta kechirek. 28Ago, ye kaging’eeta, andoenak awe Galili. 29Ago kilenji Petero, Agot nginach tugul agobo inye, ko maginacha. 30Ak kilenji Jesu inendet, Amwaun iman ale, rani, kemouni, kotom kote kipsoiywet konyil aeng’, iesioa konyil somok. 31Ak kimwa eng’ kimnatet ne o kole, Ngo nyolu kebegu tuwai, ko magoi aesien. Ak kimwa agichek tugul ko u noto.

Jesu eng’ Getsemane

32Ak kiit koret ne kiguure Getsemane, ak kilenji alamalyennyi, Otebe yu, ye asae. 33Ak kiimut Petero ak Jakobo ak Johana, ak kotoi kokwong’io mising’ ak koarogenso. 34Ak kilenji ichek, Kaarogen sobondanyu mising’ agoi meet: otebe yu ak oripse. 35Ak kiwa tai kitigin, ak kobutyi ng’ony, ak kosa kole, ngomugaksei, ko mie kosiirtoena sainito. 36Ak kimwa kole, Aba, Baba, imugaksei tuguk tugul eng’ inye; istaena kikombani: ago, ma ko u ye amache, ago ko u ye imache.

37Ak kinyo ak konyor ichek koruitos, ak kolenji Petero, Simon, irue? Ma imuch iripse agot sait agenge? 38Oripse ak osae, si mochut yomset: chamei tamirmiriet iman, ago nyaluli borto.

39Ak kiwa kogeny, ak kosa komwa ng’alechugaita. 40Ak kinyo kogeny, ak konyor koruitos, amu kiga nyigisitu mising’ konyekwak; ak kima kongen kit ne woljin inendet.

41Ak kinyo ne bo somok, ak kolenji ichek, Oruiye anyun nguno, omuuny: kagoyam; kagoit sait; ogeero, kageng’wekyi Weritab chi eunekab kiptengeginik. 42Ong’eetye, kebe: ogeero, kagorik inendet ne ng’wektaa.

Kenamei Jesu

43Ak ngunoto, kota kong’alali, konyo Judas, age eng’ taman ak aeng’, koboto tuiyet che tinyei rotokab chok ak siarisiek, kobunu ole mi tisiik che eechen ak sirik ak boisiek. 44Ak kiga koarorji ng’wektaindet ichek, kolenji, Inendet ne ang’ututi ko inendet noto; onam, ak omut ak oribote.

45Ak kingoit, kwo eng’ sainato ole mi inendet, ak kole, Rabbi; ak kong’utut. 46Ak kiiyogoito bichoto eunekwak ak konam inendet. 47Ago king’us rotwennyi bo chok age eng’ che kitonondos eng’ ye negit, ak koeb ititab otwogindetab tisiindet ne o. 48Ak kiwolji Jesu kolenji, Komong’u ak rotokab chok ak siarisiek, ko u ye osetyini rebindet, si onama? 49Kiami kobotok betusiek tugul eng’ hekalut anetisiei, ak kima onama: ago kayaak ni si kobiit kosulda sirutik.

50Ak kibagakta ichek tugul inendet, ak komwei.

51Ak kiisub inendet mureno age, ne kiilaachi anget inegei ne bo katanit, ak konam bichoto inendet; 52ak kometo ngorionoto bo katanit, komwei ach ngor.

Kimuti Jesu taitab tisiindet ne o

53Kiimut Jesu anyun kwo ole mi tisiindet ne o: ak koyumjigei inendet tisiik tugul che eechen ak boisiek ak sirik. 54Ak kiisub Petero inendet eng’ ye loo, agoi koit seremutab gotab tisiindet ne o; ak kitebyei koboto ng’atik, koyue mat. 55Kicheng’ anyun tisiik che eechen ak kapkiruoget komugul baornatet eng’ Jesu si kobiit kobar; ago kimanyor.

56Amu kibaorianji che chang’ lembech agobo inendet, ak ma namgei baornatenywa. 57Ak kitononso alak, kobaorian lembech agobo inendet, kole, 58Kigegas komwaei inendet kolen, Ang’eme hekaluni kigiyae eunek, ak ateech age eng’ betusiek somok ne magiyae eunek. 59Agot eng’ noto ko ma namgei baornatenywa.

60Kitonon anyun tisiindet ne o eng’ kwenunywa, koteebe Jesu, kole, Mewolu kiy? Nee ni baorianjinin bichu? 61Ago kisis, ama wol kiy. Kiteebe kogeny tisiindet ne o, kole, I Kristo inye, Weritab Ne Iberurot? 62Ak kile Jesu, A inendet: ak tun ogeere Weritab chi kotebyei eng’ eutab tai ne bo kamuktaet, konyonei eng’ bolik che bo kipsengwet. 63Ak kigerer ngoroikyik tisiindet ne o, kolen, Ta kemage nee baorinik alak? 64Kaogas ng’alek che yaach che mwaei: obwati nee? Ak kiiruokyi tugul kole nyoljin meet.

65Ak kitoi alak kosing’ilji inendet, ak kotuch togennyi, ak koluch, ak kolenji, Ng’orse: ak kinam ng’atik inendet ak korabach.

Kotiitos Petero Jesu

66Ak kingota komi Petero seremut ole bo ng’ony, konyo age eng’ tibik che otwogikab tisiindet ne o; 67ak kingogeer Petero koyue mat, kochiilji kong’ inendet, ak kolenji, Kiimi aginye koboto Nasaretindonoto, Jesu. 68Ago kitiiyo kole, Mangen, amaguitosi choto imwae: ak komanda kwo keter; ak kiito anyun kipsoiywet. 69Ak kigeer cheboto inendet, ak kotoi kogeny komwachi che tonondos eng’ ye negit, kolenji, Ni ko agenge eng’ icheget. 70Ak kitiiyo kogeny. Ak ne matia kolenji ichek kogeny che kitonondos eng’ ye negit Petero, Iman i agenge eng’ ichek amu i Galilindet. 71Ak kitoi kochubis, ak koyosio, kole, Mangen chichi omwae. 72Ak ngunoto kote kipsoiywet ne bo aeng’. Ak kiibwat anyun Petero ng’olyondonoto, ko u ye kiga komwachi Jesu inendet kole, Kotom kote kipsoiywet konyil aeng’, iesioa konyil somok. Ak kingobwat ng’olyondonoto, korir.

Currently Selected:

MARIKO 14: BUKUIT

Highlight

Copy