Matayi 13

Lusumuinu lua mumiaminyi wa ntete

(Mar 4.1-9; Luk 8.4-8)

1Dituku adi Yezu kupatuka mu nzubu,#13.1 Tangila Mar 2.1 ne diumvuija . kuya kusomba ku muelelu wa dijiba bua kulongesha. 2Bu muvua bantu bavule bamunguila, kubandaye mu buatu, kusomba. Bantu bonsu kuimana ku muelelu wa mayi. 3Yezu uvua ubalondela malu mavule mu nsumuinu, ubambila ne:

— Muntu kampande uvua uya kumiamina ntete. 4Pavuaye umiamina ntete mu budimi buende, imue kumata ku muelelu wa njila: nyunyi kuvua kuyizokola. 5Minga kumata mu buloba bua mabue, muvua kamuyi buloba buvule. Ntete kumena lukasa, bualu buloba kabuvua buondoke. 6Kadi munda munya, diba kuosha buloba. Mitshi kuuma, bualu kayi vua ne miji mile. 7Minga ntete kumata mu mitshi ya meba. Mitshi ya meba ayi kubanda, kukulakaja mitshi mimpe. 8Kadi minga ntete kumata mu buloba buimpe, kukuama miepu, eyi ne ntete lukama, mikuabu ne ntete makumi asambombu, minga eyi ne ntete makumi asatu.

9Ke Yezu kuamba kabidi ne:

— Muena matshi a kumvua wasangana kumvua anyiee? Umvuee!

Yezu udi wakula mu nsumuinu bua tshinyi?

(Mar 4.10-12; Luk 8.9-10)

10Balongi kusemena kudi Yezu, bamukonka ne:

— Muudi wambila bantu malu mu nsumuinu mmunyi?

11Ke Yezu kubandamuna ne:

— Mbanyishe bua nuenu numanye malu masokome a Bukalenga bua mu diulu, kadi ki mbanyishe bua bantu bakuabu baamanye nansha! 12Bualu muntu udi ne tshintu, neapete tshikuabu. Nanku neikale nabi bivule. Kadi udi kayi natshi, nebamunyenge tshikese tshidiye natshi. 13Ke pandi mbambila malu mu nsumuinu. Bualu badi batangila, kabayi bamona. Badi bateleja, kabayi bumvua. Nanku kabena bajingulula malu. 14Ke mudi miaku ya muambi Yeshaya ibakumbanyina ne:

“Mvidi Mukulu udi wamba ne:

nenuteleje, kanuyi numvua, kanuyi nujingulula.

Nenutangile amu kutangila, kanuyi numona.

15Bualu bena tshisamba etshi mbapapishe muoyi wabu,

mbadijike matshi,

mbabuikile mesu.

Bu bobu kabayi benza nanku,

mesu abu avua mua kumona,

matshi abu avua mua kumvua,

lungenyi luabu luvua mua kujingulula malu.

Nanku bavua mua kupingana kundi,

Meme kujikija masama abu.#13.15 Yesh 6.9-10, muvua bena Ngreke bandamune miaku ayi ku kale.”

16Kadi nuenu nudi bena diakalenga, bualu mesu enu adi amona, matshi enu adi umvua! 17Ndi nnujadikila bulelela ne: bambi ne bantu ba Mvidi Mukulu ba bungi bavua bajinga kumona binudi numona ebi, kadi kabavua babimona to. Bavua bajinga kumvua binudi numvua ebi, kadi kabavua babiumvua to.#13.17 Fuanyikija ne 1 Pet 1.10-12.

Yezu udi umvuija lusumuinu lua mumiaminyi

(Mar 4.13-20; Luk 8.11-15)

18— Kadi nuenu telejayi, nnumvuije tshidi lusumuinu lua mumiaminyi wa ntete luamba. 19Padi bantu bumvua bakuabu balongesha malu a mu Bukalenga bua mu diulu, kabayi bajingulula muyayabu, Muena bubi udi ufika, umusha bivuabu bamiamine mu muoyi wabu. Ke ntete idi ipona ku muelelu wa njila. 20Ntete idi ipona mu buloba bua mabue, ke badi bumvua muaku wa Mvidi Mukulu, bawanyisha diakamue ne disanka. 21Kadi muaku awu kawena wasa miji munda muabu. Badi bawakidila amu tshitupa tshikese. Padi dikenga dibakuata, nansha bantu babakengesha bua muaku wa Mvidi Mukulu awu, badi bateketelamu diakamue. 22Ntete idi ipona mu mitshi ya meba, ke badi bumvua muaku wa Mvidi Mukulu. Kadi disumpakana dia malu a bukua panu, ne mutshima wa biuma bia panu, bidi bikutakaja muaku, biupangisha mua kukuama bimuma. 23Ntete idi ipona mu buloba buimpe, ke badi bumvua muaku wa Mvidi Mukulu, bajingulula mudiwu. Badi bakuama bimuma, aba lukama, bakuabu makumi asambombu, banga makumi asatu.

Lusumuinu lua lupela

24Yezu kubelela lusumuinu lukuabu ne:

— Bukalenga bua mu diulu mbufuanangane ne muntu uvua mumiamine ntete mimpe mu budimu buende. 25Butuku, pavua bantu balala tulu, muena lukuna wende kuvua kumiamina lupeta mu ntete yende ayi. Pashishe kuyaye. 26Kadi ntete mimane kutoloka, miepu imueneka, ke lupeta alu kumueneka palu. 27Bena mudimu ba muena budimi kuya kudiye, bamuebeja ne: “Mfumu, se uvua mumiamine ntete mimpe mu budimi buebe. Kadi lupeta elu ndufume penyi?” 28Ke yeye kubandamuna ne: “Muena lukuna ke udi muenze awu.” Bena mudimu kumuebeja kabidi ne: “Udi musue tuye kulutula anyi?” 29Yeye kubenga ne: “To, bualu pa kulutula, nudi mua kujomuenaku ne ntete mimpe. 30Lekelayi, bionsu bikolele pamue too ne ku tshikondu tshia dinowa. Diba adi nengambile badi banowa ne: ‘Julayi bangabanga lupeta. Lusuikayi mu bisumbu bua kuluosha. Pashishe nuteke ntete mimpe mu diyeba dianyi.’ ”

Lusumuinu lua mutshi wa lusanga

(Mar 4.30-32; Luk 13.18-19)

31Yezu kubelela lusumuinu lukuabu ne:

— Bukalenga bua mu diulu mbufuanangane ne lutete lua mutshi wa lusanga,#13.31 Mu tshiena ngreke, mbafunde: mutshi wa sinapi, mmomumue ne: wa “moutarde”. Ke mutshi utudi katuyi nawu muetu munu. luvua muntu muele mu budimi buende. 32Lutete alu ndukese ku ntete yonsu. Kadi padilu lumena, ludi lukola, ludiunda, lupita mitshi yonsu. Nanku ludi luenza mutshi udi nyunyi ya kulu yibakila masua mu matamba awu.

Lusumuinu lua buanga bua mampa

(Luk 13.20-21)

33Yezu kubelela lusumuinu lukuabu ne:

— Bukalenga bua mu diulu mbufuanangane ne buanga bua mampa budi mukaji wangata, usangisha mu bukula kilo makumi abidi ne itanu, bua ditapi dionsu kutuntumukadi.

Yezu uvua ulongesha mu nsumuinu bua tshinyi?

(Mar 4.33-34)

34Yezu uvua ulongesha bantu malu onsu aa mu nsumuinu. Kavua ubambila bualu, kabuyi mu lusumuinu. 35Uvua wenza nanku bua kukumbaja miaku ivua Mvidi Mukulu mumanyishe muambi ne:

“Nembambile malu mu nsumuinu.

Nembamanyishe malu avuabu basokoke bantu,

biangatshile ku tshibangidilu tshia buloba.#13.35 Mis 78.2.”

Yezu udi umvuija lusumuinu lua lupela

36Nenku Yezu kumuka pavua bantu, kuya mu nzubu. Balongi bende kusemena kuvuaye, kumulomba ne:

— Utumvuije lusumuinu lua lupela ludi mu budimi abu.

37Yezu kubandamuna, wamba ne:

— Muntu udi umiamina ntete mimpe, ke Muana wa muntu. 38Budimi ke bantu. Ntete mimpe mbantu badi banyisha Bukalenga. Lupela mbantu badi bitaba Muena bubi. 39Muena lukuna udi umiamina lupela, ke diabolu. Dituku dia kunowa, ke dituku dia nshikidilu. Bena mudimu badi banowa, ke batumibue ba Mvidi Mukulu. 40Bu mudibu bajula lupela bua kubiela mu kapia, ke muenzekabi dituku dia nshikidilu. 41Muana wa muntu neatume batumibue bende, bua bumushe mu Bukalenga buende bantu bonsu badi babipisha bakuabu, ne benji bonsu ba malu mabi. 42Nebabele mu tshikutu tshia kapia. Nebadidilemu; nebatutakajilemu menu. 43Kadi bonsu badi bitaba Mvidi Mukulu, nebakenke bu diba mu Bukalenga bua Tatuabu.#13.43 Fuanyikija ne Dan 12.3. Badi ne matshi a kumvua nawu, basangana kumvua anyiee? Bumvuee!

Lusumuinu lua biuma bisokoka

44— Bukalenga bua mu diulu mbufuanangane ne biuma bisokoka mu budimi. Muntu kuvua kubisangana mu budimi amu, kubisokoka pende. Kupetaye disanka dipite. Ke padiye uya kupana bionsu bidiye nabi, bua kusumba budimi abu.

Lusumuinu lua mabue a busanga

45— Bukalenga bua mu diulu mbufuanangane ne ngendamushinga udi ukeba mabue malenga a busanga. 46Padiye upeta dikuabu dimpe dia mushinga mukole, udi uya kupana bionsu bidiye nabi, bua asumbe dibue adi.

Lusumuinu lua bukondu buvuabu bela mu mayi

47— Bukalenga bua mu diulu mbufuanangane ne bukondu buvuabu bela mu dijiba dia mayi. Kukuatabu mishipa ya mishindu yonsu. 48Bukondu bumane kuwula ne mishipa, balobi kubukoka ku mukuna. Kusombabu bua kusunguluja mishipa ayi: bavua bateka mimpe mu bisaka, bimansha ivua mibi. 49Ke muenzekabi dituku dia nshikidilu nanku. Batumibue ba Mvidi Mukulu nebavue kutapulula babi eku, bempe kuaka. 50Nebele babi mu tshikutu tshia kapia. Mu tshikutu amu nebadile, nebatutakaje menu.

Malu mapiamapia, ne malu a kale

51Yezu kubakonka ne:

— Nudi bumvue bionsu ebi anyi?

Bobu kuandamuna ne:

— Eyowa, tudi bumvue.

52Nanku Yezu kubambila kabidi ne:

— Ke mudi mulongeshi yonsu wa mikenji, padiye udienza mulongi wa malu a mu Bukalenga bua mu diulu, ufuanangana ne muena lupangu udi upatula bintu bipiabipia, ne bintu bia kale, mu tshibutshilu tshiende.

Bena mu Nazarete kabena bitaba Yezu to

(Mar 6.1-6; Luk 4.16-30)

53Yezu ujikija diakula mu nsumuinu, ku mukaye muaba awu, 54kuyaye mu tshimenga#13.54 tshimenga: ke Nazarete. Tangila 2.23 ne Luk 4.16. tshiyuabu bamukoleshe. Uvua ulongesha mu nzubu wa kutendelela. Bantu bonsu bavua bamuteleja, bavua bakema, bebejangana ne:

— Meji a nanku mmuapete kuepi? Munyi mudiye mua kuenza bishima bia mushindu ewu? 55Yeye ewu ki mmuana wa muena mabaya anyi? Mamuende ki Mariya anyi?#13.55 Fuanyikija ne Yow 6.42. Yakobe, Yozefe, Simone ne Yuda ki mbana babu anyi? 56Bana babu ba bakaji, katuena nabu patudi apa anyi? Kadi mmupete bukole ebu kudi nganyi?

57Ebi bionsu kubapangisha mua kumuitababu. Ke Yezu kubambila ne:

— Muambi wa Mvidi Mukulu, badi bamunemeka miaba yonsu, pa kumusha mu tshimenga tshiabu, ne mu nzubu ya bana babu.#13.57 Fuanyikija ne Luk 4.24; Yow 4.44.

58Yezu kuenzamu amu bishima bikese, bualu kabatua ne ditaba to.

Currently Selected:

Matayi 13: TSH96

Highlight

Copy