Matayi 12

Yezu udi mfumu wa Dituku dia Dikisha

(Mar 2.23-28; Luk 6.1-5)

1Matuku mamane kupita, Yezu kupitshila mu madimi a ntete ya kuenza bukula dituku dia Dikisha. Balongi bende bavua ne nzala. Kutulabu miepu, kudiabu ntete.#12.1 Tangila Diel 23.26. 2Baparushe bamona nanku, kuambilabu Yezu ne:

— Tangila, balongi bebe badi benza bualu, budi mikenji yetu mikandike dituku dia Dikisha.#12.2 Tangila Tshim 34.21.

3Yezu kubandamuna ne:

— Kanuena babale tshivua Davide muenze dituku dikuabu, pavua nzala mibasume, yeye ne bantu bende, anyi? 4Uvua mubuele mu nzubu wa Mvidi Mukulu. Yeye ne bantu be nde kudia mampa avuabu balambule Mvidi Mukulu. Kabavua ne dianyisha dia kudia mampa awu to. Mikenji yetu idi yamba ne: mampa awu, badi mua kuadia anu kudi batuangaji nkayabu.#12.4 kudiabu mampa: tangila 1 Sam 21.2-7. — …batuangaji nkayabu: tangila Lev 24.9. 5Kanuena babale kabidi mu mikenji ya Moshe mudi batuangaji mu nzubu wa Mvidi Mukulu bakuata mudimu, nansha dituku mene dia Dikisha. Nanku kabena balame mikenji ya dituku dia Dikisha to. Kadi kabena ne tshilumbu nansha.#12.5 Tangila Dib 28.9-10. 6Kadi ndi nnujadikila ne: unudi nende apa mmupite ne nzubu wa Mvidi Mukulu! 7Bu nuenu bumvue mene tshidi miaku ya mu Mukanda wa tshijila yamba ne: “Ndi njinga bua nuikale ne luse, tshiena ndomba bua nundambule milambu nansha,#12.7 Osh 6.6.” kanuvua mua kudiwula bantu badi kabayi ne bualu. 8Bualu Muana wa muntu udi mfumu wa dituku dia Dikisha.

Muena tshianza tshifulame

(Mar 3.1-6; Luk 6.6-11)

9Yezu umuka aku, kuyaye mu nzubu wabu wa kutendelela. 10Muntu uvuamu, muikale ne tshianza tshifulame. Bantu bavua muaba awu, bavua bakeba mua kufunda Yezu ne: mmuenze bibi. Ke pavuabu bamukonka ne:

— Mikenji yetu idi yanyisha bua bajikije disama dia muntu dituku dia Dikisha anyi?

11Yezu kubebeja ne:

— Muntu wa kunudi, yeye muikale ne mukoku amu umue, wowu mukuluke mu tshiina tshile dituku dia Dikisha, kena mua kuya kuupatula mu tshiina amu anyi? 12Kadi muntu udi mupite mukoku! Nanku mikenji yetu idi yanyisha bua tuambuluishe muntu dituku mene dia Dikisha.

13Nanku Yezu kuambila muntu awu ne:

— Olola tshianza tshiebe.

Yeye kolola tshianza, kushalatshi tshimpe bu tshikuabu. 14Ke Baparushe kupatuka mu nzubu, kuya kuelela Yezu tshifufu, bua kumanya muvuabu mua kumushipesha.

Muntu udi Mvidi Mukulu musungule

15Yezu umvua lumu lua tshifufu atshi, kumukaye muaba awu. Bantu bavule kumulonda. Yezu kujikija masama a bantu bonsu. 16Kadi kubakandikaye bikole bua kabambidi muntu ne: Yezu udi nganyi. 17Ke muvua miaku ivua Mvidi Mukulu mumanyishe muambi Yeshaya ikumbana ne:

18“Ke muntu wanyi undi musungule.

Ndi mumunange. Yeye kabidi udi unsankisha.

Nemmupe Mueyelu wanyi.

Neamanyishe bukua bisamba, mundi ndumbuluisha bantu.

19Kakutanda ne muntu. Kukuela mbila.

Bantu kabakumumvua wenza mayuki ne diyi dikole mu misesu.

20Dilenga dibendame, kakuditshibula.

Kakujima muendu utshidi ne kapia kakese.

Neenze nanku too ne padi malu mimpe

andi musue, atshimuna panu.

21Bisamba bionsu nebitekemene kudiye.#12.21 Tangila Yesh 42.1-4, bilondeshile muvua bena Ngreke bandamune kale.”

Bukole bua Yezu

(Mar 3.22-30; Luk 11.14-23)

22Diba adi kufikabu kudi Yezu ne muntu, muikale mpofu kabidi kamama, bualu uvua ne mukishi mubi munda. Yezu kujikija masama ende. Nanku muntu awu kutuadija kuakula, ne kumona kabidi. 23Bantu bonsu bavua bakatshila bivua Yezu wenza, bebejangana ne:

— Muntu awu udi mua kuikala Muana wa Davide anyi?

24Kadi Baparushe bumvue muvua bantu aba bamba, kuambabu ne:

— Muntu ewu udi wipata mikishi mibi, amu bualu mmupete bukole kudi Belzebule,#12.24 Tangila Mat 10.25 ne diumvuija . mfumu wa mikishi mibi!

25Kadi Yezu uvua mujingulule lungenyi luabu. Nanku kubambilaye ne:

— Bukalenga buonsu budi benabu baluishangana nkayabu, nebunyanguke lukasa. Tshimenga tshionsu tshidi benatshi baluishangana, nansha diku dionsu didi benadi benza nanku, tshimenga atshi, nansha diku adi, kabiakutungunuka nansha. 26Pikala diabolu wipata badi bende, udi udiluisha nkayende. Nanku bukalenga buende nebutungunuke bishi? 27Nudi nungamba ne: udi wipata mikishi mibi, bualu Belzebule mmumupeshe bukole. Kadi bena dienu, udi ubapa bukole bua kuyipata nnganyi? Bena dienu mene badi baleja ne: nuenu nudi bapile! 28Bulelela, ndi ngipata mikishi mibi ku bukole bua Mueyelu wa Mvidi Mukulu. Ke bidi bileja ne: Bukalenga bua Mvidi Mukulu bukadi bufike kunudi.

29Muntu kena mua kubuela mu nzubu wa muena makanda, kuangata bintu biende, kayi muanji kusuika muena makanda awu mionji. Yeye mumane kumusuika, udi mua kuangata bintu bionsu bidi mu nzubu awu.

30Udi kayi nanyi, mmumbenge. Udi kayi ungambuluisha bua kusangisha, udi umuangalaja. 31Ke pandi nnuambila ne: badi mua kujimijila bantu mibi yabu yonsu, nansha bipendu bidibu bapendangana.#12.31 bipendu bidibu…: badi mua kuandamuna kabidi ne: tshipendu tshidibu bapenda natshi Mvidi Mukulu. Kadi udi upenda Mueyelu wa Tshijila, kabena mua kujimija mibi yende to. 32Muntu udi upenda Muana wa muntu, nebajimije mibi yende. Kadi udi wamba Mueyelu wa Tshijila bibi, kabena mua kujimija mibi yende, nansha panu, nansha matuku atshidi kumpala.

Mutshi ne tshimuma tshiawu

(Luk 6.43-45)

33— Wewe musue kupeta bimuma bimpe, wikale ne mutshi muimpe. Wewe ne mutshi mubi, neupete bimuma bibi. Bualu badi bamanyina mutshi ku bimuma biawu. 34Nuenu ndelanganyi ya nyoka, nuenu bantu babi, mmunyi munudi mua kuamba bualu buimpe? Bualu mukana mudi muamba malu adi muwule mu muoyi tente. 35Muntu muimpe udi wenza malu mimpe, bualu munda muende mudi muimpe. Muntu mubi udi wenza malu mabi, bualu munda muende mudi mubi. 36Ndi nnujadikila ne: dituku didi Mvidi Mukulu ukosa nsambu, nebalumbuluishe bantu bua miaku yabu yonsu idi kayiyi ilengelela. 37Bualu nebakupishe, nansha nebakubingishe, amu bilondeshile miaku yebe.

Bantu badi balomba tshishima

(Mar 8.11-12; Luk 11.29-32)

38Diba adi bamue balongeshi ba mikenji ne bamue Baparushe kuamba Yezu ne:

— Mulongeshi, tudi basue ne: wenze tshishima, tutshimone. 39Yezu kubandamuna ne:

— Bena lelu mbantu babi, badi batombokela Mvidi Mukulu! Kadi badi amu balomba tshishima! Kadi kabena babenzela tshishima nansha. Nebabaleje amu tshishima tshia muambi Yona. 40Bualu, bu muvua Yona mushale munda mua mushipa munene munya ne butuku matuku asatu,#12.40 Tangila Yon 1.17. ke muashala Muana wa muntu munda mua buloba munya ne butuku matuku asatu. 41Dituku didi Mvidi Mukulu ukosa nsambu, bena Ninive nebabike bua kufunda bena lelu ku tshilumbu. Bualu bena Ninive bavua badilengeja pavuabu bumvua dilongesha dia Yona.#12.41 Ninive: ntshimenga tshikulu tshia mu ditunga dia bena Ashure ku kale. — Bena Ninive bavua badilengeja: tangila Yon 3.5. Kadi apa padi muntu udi mupite Yona. 42Dituku didi Mvidi Mukulu ukosa nsambu, mukalenga mukaji wa mu ditunga didi kuinshi, neabike bua kufunda bena lelu ku tshilumbu. Bualu yeye uvua mumuke ku ndekelu kua buloba, bua kuvua kuteleja miaku ya Shelomu ya meji.#12.42 Tangila 1 Bak 10.1-10. Kadi apa padi muntu udi mupite Shelomu!

Mukishi mubi udi upingana muaba wawu wa kale

(Luk 11.24-26)

43— Padi mukishi mubi upatuka munda mua muntu, udi utua eku ne eku mu tshipela, ukeba muaba wa kuikisha. Padiwu kawuyi upeta muaba awu, 44udi wamba ne: “Ndi mpingana mu nzubu muanyi mumvua mupatuke.” Udi ubuelamu, usangana mu nzubu mutupu, mukomba, mulengeja bimpe. 45Nanku udi uya kuangata mikishi mikuabu muanda mutekete mimupite ku bubi. Udi upingana nayi pamue, bua kusomba mu nzubu amu. Nanku muntu ewu mpindiewu udi mubi, mupite muvuaye kumpala. Ke muenzekela bantu babi ba mu tshikondu etshi.

Mamu ne bana babu ne Yezu

(Mar 3.31-35; Luk 8.19-21)

46Yezu utshivua wakula ne bantu, ke mamuende ne bana babu ba balume kufika. Bavua bimanyine pambelu, balomba mua kuyukila nende. 47Muntu mukuabu kuambila Yezu ne:

— Mamuebe ne bana benu ba balume badi bimanyine pambelu, bajinga mua kuyukila nebe.#12.47 Mu mikanda mikuabu ya kale, kabena basangana kanungu aka to.

48Yezu kuandamuna muntu awu ne:

— Mamu wanyi nnganyi? Bana betu ba balume mbanganyi?

49Pashishe Yezu kuleja balongi bende ne tshianza, wamba ne:

— Tangilayi, ke mamu wanyi ne bana betu ba balume. 50Bualu yonsu udi wenza tshidi Tatu wanyi udi mu diulu musue, ke muanetu wa balume, ne wa bakaji, ne mamu kabidi.

Currently Selected:

Matayi 12: TSH96

Highlight

Copy