Matayi 11

Yowanane-Batiste udi utuma balongi bende kudi Yezu

(Luk 7.18-35)

1Yezu mumane kuambila balongi bende dikumi ne babidi mikenji eyi, kumukaye muaba awu, kuyaye kulongesha mu bimenga bia mu ditunga. Kumanyishaye bantu Lumu lua Disanka.

2Yowanane-Batiste uvua mu lukanu. Kumvuaye balonda malu avua Kristu wenza. Kutumaye balongi bende bakuabu kudi Kristu, 3bua kumukonka ne:

— Wewe ke utuvua bamanye ne: udi ufika,#11.3 utuvua bamanye ne: udi ufika: ke Kristu, Meshiya uvua bantu batekemene. anyi tuindile mukuabu?

4Ke Yezu kubandamuna ne:

— Nupingane kudi Yowanane, numuambile binudi numvua, ne binudi numona: 5mpofu idi imona, batebuki badi benda, bena nsudi badi bapanda, bena mapapa badi bumvua, bafue badi babika, bapele badi babamanyisha Lumu lua Disanka.#11.5 Fuanyikija ne Yesh 35.5-6; 61.1. 6Muena diakalenga ngudi ungitaba, kayi unwila.#11.6 kayi unwila: badi mua kuandamuna kabidi ne: kayi ulenduka bualu buanyi.

7Balongi ba Yowanane bamane kumuka, Yezu kukonka bantu bua Yowanane ne:

— Mu tshipela nuvua baye kumona tshinyi? Nuvua bamone lushiba ludibu banyungisha kudi lupepele anyi? Nansha kakese! 8Nanku tshinuvua bakebe kumona ntshinyi? Muntu muvuale bilamba bimpe anyi? Kadi badi bavuala bilamba bimpe badi basomba mu nzubu ya bakalenga ba matunga. 9Kadi unuvua batekemene kumona nnganyi? Muambi anyi? Ndi nnujadikila ne: eyowa, unuvua bamone mmupite ne muambi mene. 10Yowanane ke udibu bamba mu Mukanda wa tshijila ne: “Meme Mvidi Mukulu, ndi ntuma muntu wanyi kumpala kuebe, bua akulongoluele njila.#11.10 Mal 3.1.” 11Eyowa, ndi nnujadikila bulelela ne: ku bonsu bavua bamamu balele, kakuena muntu wa buneme mupite Yowanane-Batiste. Kadi udi mushadile ku bonsu mu Bukalenga bua mu diulu, udi mupite Yowanane ku buneme. 12Biangatshile tshikondu tshivua Yowanane-Batiste utuadija kulongesha, Mvidi Mukulu kutuadija kulongolola Bukalenga buende. Kadi too ne ku lelu, bena tshimvundu badi bakeba kukandika bantu, bua kababuitabi.#11.12 Badi mua kumvua kanungu aka mishindu ibidi. Bakuabu badi bandamuna ne: amu bilobu nebibuele mu Bukalenga ebu. 13Bambi bonsu, ne Moshe mu mikenji yende, too ne ku Yowanane-Batiste, bavua amu bamanyisha bantu Bukalenga ebu. 14Nuenu basue kuitaba tshindi ngamba, numanye ne: Yowanane ke Eliya uvuabu batumanyishe ne: neafike! 15Udi ne matshi a kumvua asangane kumvua anyi? Umvue!

16Bena tshikondu etshi, ndi mua kubafuanyikija ne banganyi? Ndi mbafuanyikija ne bana badi basomba mu tshialu, banaya. Ke bamue kuambila bakuabu ne: 17“Tuetu kunuelela nshiba, bua nuje maja, nuenu nansha kuja! Tuetu kunuimbila misambu ya madilu, nuenu nansha kudila!’’ 18Yowanane kufika, kayi upita kudia, kayi unua maluvu. Bantu kumuamba ne: “Udi ne mukishi mubi munda!” 19Kadi Muana wa muntu kufika, muikale udia, unua. Ke kumuambabu ne: “Ewu mmudiavi, munu wa maluvu, mulunda wa balambuishi ba bitadi, ne wa bena buenzayi!” Kadi midimu idi Mvidi Mukulu wenza, idi ileja meji mimpe adiye nawu.

Badi babenga kuitaba

(Luk 10.13-15)

20Pashishe Yezu kutuadija kudiwula bena bimenga bavua bamone bishima bivule bivua-ye muenze, bualu kabavua badilengeja to. Ke Yezu kuambila bimenga ebi ne:

21— Wewe, Korazine, udi muena diakabi! Wewe, Betsayida, udi muena diakabi! Bualu bishima bidibu benzele muenu, bu biobi bienzekela mu Tire, ne mu Sidone, bena bimenga ebi kuonsu eku bakavua bavuale bilamba bikayapale, badilabe butu, bua kuleja ne: tudi basue kudilengeja.#11.21 Korazine ne Betsayida: ke misoku ibidi ivua pabuipi ne Kefamawume. — Tire ne Sidone: fuanyikija ne Yesh 23.1-18; Yez 26; Yowe 4.4-8; Am 1.9-10. 22Ke pandi nnujadikila ne: dituku didi Mvidi Mukulu ukosa nsambu, dinyoka dia Tire, ne dia Sidone, nedikale dishadile ku dienu. 23Wewe, Kefamawume, udi wela meji ne: neudibandile mu diulu anyi? Nansha kakese! Nebakuele mu kandondu ka buloba. Bualu bishima bidibu benzele muebe, bu biobi bienzekela mu Sodome, tshimenga etshi tshivua mua kuikalaku too ne ku lelu.#11.23 neudibandile…kandondu ka buloba: Yesh 14.13-15. — Sodome: tangila Tshib 19.24-28. 24Ke pandi nnujadikila ne: dituku didi Mvidi Mukulu ukosa nsambu, dinyoka dia Sodome, nedikale dishadile ku dienu.

Vuayi kundi, nenupete dikisha

(Luk 10.21-22)

25Tshikondu atshi, Yezu uvua wamba ne:

— Eyo, Tatu, Mfumu wa diulu ne buloba, ndi nkutumbisha, bualu udi muambile bantu bashadile malu audi musokoke bena meji ne bantu bavua balonga mikanda.#11.25 Fuanyikija ne 1 Kor 1.17-29. 26Eyowa, Tatu, ke muuvua musue ne: bienzeke nanku.

27Tatu mmumpeshe bintu bionsu. Kakuena muntu udi mumanye Muana, anu Tatu nkayende. Kakuena muntu udi mumanye Tatu, amu Muana nkayende, kabidi ne bonsu badi Muana musue kumanyisha Tatu.

28Vuayi kundi, nuenu bonsu badi bapungile ne bujitu bunudi nuambula. Meme nelumpeteshe dikisha. 29Ambulayi bujitu buanyi pambidi penu. Nuanyishe bua meme kunulongesha, bualu ndi mupole ne mupuekele ku muoyi. Nanku nenupete dikisha mu mioyi yenu.#11.29 Fuanyikija ne Yirm 6.16. 30Bujitu bundi nnupesha, nebunulengelele. Bujitu bundi nteka pa makaya enu, budi bupepele.

Currently Selected:

Matayi 11: TSH96

Highlight

Copy