Matayi 10

Bapostolu dikumi ne babidi

(Mar 3.13-19; Luk 6.12-16)

1Yezu kubikila bapostolu bende dikumi ne babidi, kubapa bukole bua kuipata mikishi mibi, kabidi bua kujikija masama onsu ne matekete a bantu. 2Mena a bapostolu dikumi ne babidi adi nunku: wa kumpala ke Simone, uvua ne dina dikuabu dia Petro, ne muanabu Andre; Yakobe ne muanabu Yowanane, bonsu babidi bana ba Zebede; 3Filipe ne Bartolmayi; Tomase ne Matayi, mulambuishi wa bitadi; Yakobe muana wa Alfayi, ne Tadeyi; 4Simone, uvua mu tshisumbu tshia baluidi ba ditunga, ne Yudase Iskariyote, uvua mupangile Yezu.

Yezu udi utuma bapostolu bende

(Mar 6.7-13; Luk 9.1-6)

5Yezu kutuma bapostolu bende dikumi ne babidi aba, ubambila bivuabu ne bua kuenza ne:

— Kanuyi mu matunga a bantu badi kabayi bena Yuda, kanubuedi mu bimenga bia bena Samariya.#10.5 Tangila mu Diumvuija dia imue miaku: SAMARIYA. 6Nuye nangananga kudi mikoku mijimine ya mu tshisamba tshia bena Izrayele. 7Panuaya, nulongeshe bantu, nubambile ne: “Bukalenga bua mu diulu bukadi pabuipi!” 8Nujikije masama a babedi, nubishe bafue, numushe nsudi ya badi nayi, nuipate mikishi mibi. Bavua banupa bionsu tshianana, nupangane kabidi tshianana. 9Kanuangatshi tshiamu tshia mpawungi, nansha tshiamu tshitoke tshia mushinga mukole, nansha makuta a biamu mu bibombi bienu. 10Kanuyi ne tshibuta tshia luendu, kanuyi ne mutelu mukuabu, nansha ne bisabata, nansha ne dikombu dia luendu. Bualu muena mudimu udi ne bua kupeta biakudia biende.#10.10 Fuanyikija ne 1 Kor 9.14; 1 Tim 5.18.

11Panuafika mu tshimenga, nansha mu musoku, nukebe muntu wa disanka udi mua kunuakidila bimpe. Nushale kua muntu awu, too ne panudi numuka. 12Panuabuela mu nzubu, nuambe ne: “Bupole buikale mu nzubu emu.#10.12 Padi bena Yuda belangana muoyi, badi bajingilangana bupole (= shalom).” 13Pikala bena mu nzubu amu banuakidila bimpe, muoyi wenu wa bupole neushale kudibu. Kadi pikalabu babenga kunuakidila, muoyi wenu wa bupole Mupingane kunudi. 14Mu nzubu yonsu, nansha mu tshimenga, muikalabu babenga kunuakidila, nansha kunuteleja, nupatukemu. Kadi nututule lupuishi lua ku makasa enu.#10.14 Tangila Mar 6.11 ne diumvuija . 15Ndi nnuambila bulelela ne: dituku dia tshilumbuluilu, Mvidi Mukulu neanyoke bena tshimenga etshi bipite dinyoka dia bena Sodome ne bena Ngomore.#10.15 Sodome ne Ngomore: tangila Tshib 18-19.

Nebanukengeshe

(Mar 13.9-13; Luk 21.12-17)

16— Telejayi! Ndi nnutuma bu mikoku munkatshi mua nkashama. Nanku nuikale ne budimu bu bua nyoka, kabidi ne muoyi mulenga bu wa nyunyu wa nkudimba. 17Nudimuke, bualu bantu nebanufile ku bilumbuluilu binene, kabidi nebanukumishe mikaba mu nzubu yabu ya kutendelela. 18Nebaye nenu kudi balombodi ne bakalenga ba matunga bualu buanyi, bua nuenu kujadika bulelela buanyi kumpala kuabu, ne kumpala kua bantu badi kabayi bena Yuda. 19Pikalabu baye nenu kumpala kua balumbuluishi, kanupampakanyi bua tshinudi ne bua kuamba, ne bua mushindu unudi ne bua kuakula. Nenupete tshia kuamba anu diba adi. 20Nanku nuenu, kanuakuamba bualu, kadi Mueyelu wa Tatuenu newakuile munda muenu.

21Bantu nebafile bana babu bua kubashipabu. Baledi nebenze bia momumue ne bana babu balela. Bana pabu nebatombokele baledi babu; nebabashipeshe. 22Bantu bonsu nebanukine, bualu nudi nungitabe Kadi wananukila ne ku ndekelu, nebamusungidile. 23Panukengeshabu mu tshimenga kampande, nuye kusokomena mu tshikuabu. Ndi nnujadikila bulelela ne: Muana wa muntu neafike, kanuyi banji kujikija mudimu wenu mu bimenga bionsu bia bena Izrayele.

24Mulongi kena mua kupita mulongeshi wende. Muena mudimu kena mua kupita mfumuende. 25Mbimpe mulongi ikale bu mulongeshi wende, muena mudimu bu mfumuende. Pikalabu binyika mfumu wa diku ne: Belzebule#10.25 Belzebule: ndina dia diabolu, mfumu wa mikishi mibi. nanku bena diku mene nebabinyike mena mapite bubi.

Unudi ne bua kutshina

(Luk 12.2-7)

26— Nenku kanutshinyi bantu to. Bualu busokome buonsu nebumanyike. Bualu budi bantu kabayi bamanye, nebabumanye. 27Bualu bundi nnuambila mu midima, nubuambe patoke; bunudi numvua bamba mu musokoku, nubuambe, bantu bonsu bumvue. 28Nenku kanutshinyi bantu badi bashipa mubidi, kadi kabayi mua kushipa muoyi. Nutshine nangananga Mvidi Mukulu, udi mua kujimija#10.28 Fuanyikija ne Yak 4.12. diakamue mubidi ne muoyi mu kandondu. 29Nyunyi ya mishamisha ibidi, kabena bayisumbisha ku dikuta dimue anyi? Kadi nansha umue wa kudiyi kena mua kupona panshi, Tatuenu Mvidi Mukulu kayi mumanye. 30Kadi nuenu mimanye ne: nansha nsuki yenu idi mibadika yonsu. 31Nanku kanutshinyi to. Nudi bapite nyunyi ya mishamisha mivule mushinga!

Nuitabe Yezu kumpala kua bantu

(Luk 12.8-9)

32— Muntu yonsu udi wamba kumpala kua bantu ne: ndi wa Kristu, meme kabidi nemmuambe ne: ngwanyi, kumpala kua Tatuanyi udi mu diulu. 33Kadi muntu yonsu udi unwila#10.33 Fuanyikija ne 2 Tim 2.12. kumpala kua bantu, meme kabidi nemmuvile kumpala kua Tatuanyi udi mu diulu.

Bupole anyi nwita?

(Luk 12.51-53; 14.26-27)

34— Kanuedi meji ne: ndi mufike bua kubueja bupole pa buloba. Tshiena mufike bua kubueja bupole, kadi anu myita. 35Ndi muvue kusongakaja nsongalume ne tatuende, nsongakaji ne mamuende, mukaji wa muana ne mamuenende. 36Baluishi ba muntu nebikale anu bena diku diabu.#10.36 Tun. 35-36, tangila Mi 7.6.

37— Muntu udi unanga tatuende nansha mamuende bipite mudiye munnange meme, kena mungakanyine to. Muntu udi unanga muanende wa balume nansha wa bakaji bipite mudiye munnange meme, kena mungakanyine meme to. 38Muntu udi kayi wambula mutshi wende mutshiamakane, kayi undonda, kena mungakanyine meme to. 39Muntu udi musue kudilamina muoyi wende, neaujimije. Kadi udi ujimija muoyi wende bualu buanyi, neaupete.

Buneme bua balongi

(Mar 9.41)

40— Muntu udi unuakidila, udi ungakidila meme. Udi ungakidila, udi wakidila ewu udi muntume. 41Muntu udi wakidila muambi wa Mvidi Mukulu, bua padiye muambi, neapete difutu didibu bapesha muambi. Muntu udi wakidila muntu wa Mvidi Mukulu, bua padiye muntu wa Mvidi Mukulu, neapete difutu didibu bapesha muntu wa Mvidi Mukulu. 42Ndi nnujadikila bulelela ne: muntu udi upa umue wa ku bakese banyi aba nansha dikopu dia mayi matalale, bua padiye mulongi wanyi, kakubula difutu diende to.

Currently Selected:

Matayi 10: TSH96

Highlight

Copy