Matayi 9

Yezu udi ujikija disama dia muena tuneke

(Mar 2.1-12; Luk 5.17-26)

1Yezu kubuela mu buatu, kupingana dishiya dia dijiba. Kuyaye mu tshimenga tshiabu.#9.1 Mu Mar 2.1 badi batela dina dia tshimenga tshia Yezu: Kefamawume. Tangila kabidi Mat 4.13. 2Bantu kufika ne muena tuneke muladike pa bulalu. Yezu umona ditaba dia bantu abu, kuambilaye muena tuneke ne:

— Muananyi, kolesha muoyi! Mibi yebe mmimane kujimina!

3Ke balongeshi bakuabu ba mikenji kuambilangana ne:

— Muntu ewu udi upenda Mvidi Mukulu!#9.3 Fuanyikija ne Lev 24.16.

4Yezu umanya meji avuabu bela, kubakonkaye ne:

— Nudi nuela meji mabi munda muenu bua tshinyi? 5Tshidi tshitekete mua kuamba ntshinyi: “Mibi yebe mmimane kujimina,” anyi “Juka, enda?” 6Kadi ndi musue bua numanye ne: Muana wa muntu udi ne bukole bua kujimija mibi pa buloba.

Ke Yezu kuambila muena tuneke ne:

— Juka, ambula bulalu buebe, pingana kuebe!

7Muntu awu kujuka, kuya kuende. 8Bantu bamona bualu abu, kutshinabu bikole. Kutumbishabu Mvidi Mukulu, bualu mmupeshe bantu bukole bua mushindu ewu.

Yezu udi ubikila Matayi

(Mar 2.13-17; Luk 5.27-32)

9Yezu kumuka muaba awu, kumona muntu musombe ku nzubu kuvuabu balambuila bitadi. Dina dia muntu awu mMatayi. Yezu kumuambila ne:

— Undonde!

Nanku Matayi kujuka, kumulonda.

10Ke Matayi kuakidila Yezu ku nzubu kuende.#9.10 Badi bafunda amu ne: ku nzubu kuende. Kadi tudi mua kumvua miaku eyi ne: ku nzubu kua Matayi; ki nku nzubu kua Yezu nansha. Fuanyikija ne Luk 5.29. Balambuishi ba bitadi ba bungi, ne bantu bakuabu kabidi bavua ne lumu lubi, kufikabu bua kudia ne Yezu, kabidi ne balongi bende, ku mesa. 11Baparushe bamona nanku, kukonkabu balongi ba Yezu ne:

— Mudi mfumuenu udia ne balambuishi, kabidi ne bena buenzayi mmunyi?#9.11 Fuanyikija tun. 10-11 ne Luk 15.1-2.

12Yezu umvua nanku, kubandamuna ne:

— Bantu badi ne bukole bua mubidi, kabena bakengela munganga to. Anu badi basama ke badi bamukengela. 13Nuye kuela meji bua kumvua tshidibu bafunde mu Mukanda wa tshijila ne: “Ndi musue bua nufuilangane luse. Tshiena njinga bua nundambule nyama nansha.#9.13 Osh 6.6.” Bualu tshiena umvue bua kubikila bantu bimpe, kadi anu babi.

Badi bakonka Yezu bua dijila dia biakudia

(Mar 2.18-22; Luk 5.33-39)

14Ke balongi ba Yowanane-Batiste kusemena kudi Yezu, bamukonka ne:

— Tuetu ne Baparushe, tudi tujila biakudia misangu mivule. Kadi balongi bebe kabena babijila bua tshinyi?

15Ke Yezu kubakonka ne:

— Nudi nuela meji ne: bantu batshidi basomba ne musedianganyi mu tshibilu tshia dibaka, badi mua kubungama anyi? Nansha kakese! Kadi matuku adibu bumusha musedianganyi, nebajile biakudia.

16Muntu kena mua kulamika tshitetela tshia ku tshilamba tshipiatshipia ku tshilamba tshikulukulu to. Bualu tshitetela etshi netshipande tshilamba tshikulukulu. Nanku muaba uvua mupandike neudiunde. 17Kabidi kabena mua kuela maluvu a nwinyo mapiamapia mu milondu ya biseba mikulukulu to. Bualu milondu ya biseba neyitayike, maluvu apumuke. Nanku milondu neyinyanguke. Kadi bua kulama bionsu bibidi bimpe, badi bela maluvu mapiamapia mu milondu ya biseba mipiamipia.

Nsongakaji, muana wa mfumu wa bena Yuda, ne mukaji udi ulenga ku tshilamba tshia Yezu

(Mar 5.21-43; Luk 8.40-56)

18Patshivua Yezu ubambila malu awu, mfumu kampande wa bena Yuda kufika. Kutuaye binu kumpala kua Yezu, umuambila ne:

— Muananyi wa bakaji utshidi ukula muoyi amu mpindiewu. Katuye, umutenteke tshianza. Nanku neapete muoyi.

19Ke Yezu kujuka, kulonda mfumu awu, pamue ne balongi bende.

20Mukaji mukuabu uvua ukenga ne disama dia mashi a muyeya bidimu dikumi ne bibidi. Kusemenaye panyima pa Yezu, kulengaye ku luzemba lua tshilamba tshiende. 21Uvua wela meji ne: “Meme mulenge anu ku tshilamba tshia Yezu, disama dianyi nedijike.”

22Yezu ukudimuka, umona mukaji awu, kumuambilaye ne:

— Muananyi, kolesha muoyi! Disama diebe ndimane kujika, anu bua ditaba diebe!#9.22 Badi mua kuandamuna kabidi ne: ditaba diebe ndikupandishe.

Anu pinapu, disama dia mukaji awu kujikadi.

23Yezu kufika ku nzubu kua mfumu wa bena Yuda. Kumonaye bimbi ba bisanji#9.23 Bimbi ba bisanji, nansha bedi ba nshiba, bavua bimba diba divua bamamu badila, nansha bimba kasala ka madilu mu nzubu wa mufue. bamane kudilongolola bua kujika muntu uvua mufue. Kumonaye kabidi bantu ba bungi bateka mutoyi. 24Ke kubambilaye ne:

— Patukayi, muana kena mufue to, mmulale.

Bantu abu kumuseka. 25Bamane kupatula bantu bonsu pambelu, Yezu kubuela mu nzubu, kukuata muana ku tshianza, muana kujuka. 26Lumu lua bualu ebu kumvuika mu ditunga dijima adi.

Yezu udi utabeja bampofu babidi

27Yezu kumuka muaba awu. Bampofu babidi kumulonda, benda bela mbila ne:

— Muana wa Davide, utufuile luse!

28Yezu mumane kubuela mu nzubu, bampofu abu kusemena kudiye. Yezu kubakonka ne:

— Nudi nuitaba ne: meme ndi mua kuenza bualu ebu anyi?

Kumuandamunabu ne:

— Eyowa, Mfumu.

29Ke Yezu kulenga mesu abu, wamba ne:

— Binuenzekele bu mudi ditaba dienu!

30Mesu abu kutabala. Yezu kubakandika ne diyi dikole ne:

— Telejayi bimpe: muntu kamanyi bualu ebu to.

31Kadi kuyabu kutangalaja lumu lua Yezu mu ditunga dijima adi.

Yezu udi wakuisha kamama

32Patshivuabu baya, kufikabu kudi Yezu, ne muntu uvua kamama, bualu uvua ne mukishi mubi. 33Anu Yezu wipata mukishi mubi awu, kamama kutuadija kuakula. Bantu bonsu kukema bikole, bamba ne:

— Katshia katuena banji kumona bualu bua mushindu ewu mu Izrayele!

34Kadi Baparushe kuamba ne:

— Muntu ewu udi wipata mikishi mibi ayi, bualu mmupete bukole kudi mfumu wa mikishi mibi!#9.34 Fuanyikija ne Mat 12.24.

Yezu udi ufuila bantu luse

35Yezu uvua upitshila mu bimenga bionsu ne mu misoku yonsu. Uvua ulongesha mu nzubu ya kutendelela ya bena Yuda. Uvua wenda wambila bantu Lumu lua Disanka lua Bukalenga bua Mvidi Mukulu. Uvua ujikija masama ne matekete onsu a bantu. 36Ke Yezu kumvua luse bua bungi bua bantu bavuaye mumone, bualu bavua bapungile, bakengakana, bu mikoku idi kayiyi ne mulami. 37Nanku Yezu kuambila balongi bende ne:

— Bintu bia kunowa bidi bia bungi, kadi bena mudimu badi mua kubinowa mbakese. 38Lombayi kudi muena budimi, bua atume bena mudimu bakumbane bua kubinowa.

Currently Selected:

Matayi 9: TSH96

Highlight

Copy