Matayi 14

Lufu lua Yowanane-Batiste

(Mar 6.14-29; Luk 9.7-9)

1Tshikondu atshi, Erode, mulombodi wa buloba bua Ngalileya, uvua mumvue bantu bayukila bua Yezu. 2Kuambilaye bantu bende ne:

— Muntu awu ke Yowanane-Batiste: udi mubike ku bafue! Ke padiye mua kuenza bishima.

3Bualu Erode ke utua mutume diyi kale, bua bakuate Yowanane, bamusuike mionji, bamuele mu nzubu wa lukanu. Uvua muenze nanku anu bualu bua Erodiyade, mukaji wa Filipe wabu.#14.3 Tangila Mar 6.17 ne diumvuija . 4Bualu Yowanane uvua mubele Erode ne:

— Kuena mua kuangata Erodiyade bu mukajebe nansha!#14.4 Tangila Lev 18.16; 20.21.

5Erode uvua musue kushipesha Yowanane. Kadi uvua utshina bena Yuda, bualu bena Yuda bonsu batua banemeka Yowanane bu muambi wa Mvidi Mukulu.

6Kadi dituku dia mufikilu wa diledibua dia Erode, muana wa bakaji wa Erodiyade uvua uja maja, bantu bonsu batua Erode mubikile batangile. Nsongakaji awu uvua mupite kusankisha Erode. 7Ke Erode kuditshipa bua kupesha nsongakaji awu tshionsu tshialombaye. 8Mamuende wa muana kumupa meji. Ke muana kuambila Erode ne:

— Umpeshe mutu wa Yowanane-Batiste mu dilonga amu mpindiewu!

9Mukalenga Erode kubungama bikole. Kadi bumuvuaye muditshipe, bantu bavuaye mubikile bumvue, kutumaye diyi, bua bapeshe nsongakaji mutu wa Yowanane. 10Kutumaye muntu mu nzubu wa lukanu, bua akosemu mutu wa Yowanane-Batiste. 11Kuambulabu mutu mu dilonga, kuutuadilabu nsongakaji. Yeye pende kuufila kudi mamuende. 12Balongi ba Yowanane kufika, kuangata tshitalu tshiende, kutshijika. Pashishe kuyabu kumanyisha Yezu malu onsu avua menzeke.

Yezu udi udisha bantu binunu bitanu

(Mar 6.30-44; Luk 9.10-17; Yow 6.1-14)

13Pavua Yezu mumvue bualu ebu, kumukaye kaba aka mu buatu. Kuyaye kupengama pa nkayende. Kadi bantu bavule kumanya ne: Yezu mmumuke. Nanku kumukabu mu bimenga, bayila ku muelelu wa mayi, benda balonda Yezu. 14Yezu upatuka mu buatu, kumonaye bantu ba bungi. Luse kumukuatalu. Kutuadijaye kujikija masama abu.

15Dilolu balongi kuya kuambila Yezu ne:

— Bukadi buila. Muaba ewu nku mpenga. Tangalaja bantu. Baye kusumba biakudia mu misoku.

16Yezu kubandamuna ne:

— Kabena mua kutangalaka to. Nuenu mene bapeshayi biakudia! 17Balongi kumuambila ne:

— Kadi muaba ewu, tudi amu ne mampa atanu, ne minyinyi ibidi ya mu mayi.

18Yezu kubambila ne:

— Bintuadilayi apa.

19Pashishe kutumaye diyi, bua bantu basombe panshi mu bisosa. Ke kuangataye mampa atanu, ne minyinyi ibidi ya mu mayi. Kutangilaye mulu, wela Mvidi Mukulu tuasakidila. Kukosaye mampa, kuapeshaye balongi, bua baabanyine bantu. 20Muntu yonsu uvua mudie muukute. Balongi kukunguja bisunsukile bivua bishale, bibondu dikumi ne bibidi#14.20 Fuanyikija ne 2 Bak 4.42-44. tente. 21Bavua badia bavua bantu bu binunu bitanu, katuyi tubala bakaji ne bana.

Yezu udi wenda pa mayi

(Mar 6.45-52; Yow 6.15-21)

22Diakamue Yezu kuambila balongi, bua babande mu buatu, bamudianjidile dishiya dia dijiba. Bualu utshivua ulayangana ne bantu. 23Yezu mumane kulayangana nabu, kubandaye nkayende pa mukuna bua kutendelela. Butuku, kushalaye muaba awu nkayende. 24Buatu bukavua bushilangane ne muelelu wa mayi mutantshi. Mavuala avua abutankula, bualu lupepele luvua lubuluisha. 25Patshiatshia, Yezu kuya kudi balongi bende, wenda pa mayi. 26Balongi bamumona wenda pa mayi, kutshinabu bikole, bela mbila ya bowa ne:

— Mukishi!

27Diakamue Yezu kubambila ne:

— Kanutshinyi. Meme! Koleshayi muoyi!

28Nanku Petro kulomba Yezu ne:

— Mfumu, ne ngwewe, utume diyi, mvua kuudi, ngenda pa mayi.

29Yezu kumubikila ne:

— Vuakunu!

Petro kupatuka mu buatu, wenda pa mayi, mutangile kudi Yezu. 30Kadi utangila lupepele, kumvuaye bowa, kutuadijaye kudiina mu mayi. Ke kuelaye diyi ne:

— Mfumu, unsungidile!

31Diakamue Yezu kolola tshianza, kumukuata, wamba ne:

— Akia! Ditaba diebe ndikese be! Udi upampakana bua tshinyi?

32Bonsu babidi kubuela mu buatu. Lupepele kutuya. 33Nanku balongi bavua mu buatu kutuila Yezu binu panshi, bamba ne:

— Udi Muana wa Mvidi Mukulu bulelela!

Yezu udi ujikija masama mu buloba bua Ngenesarete

(Mar 6.53-56)

34Kusabukabu dijiba, kufikabu mu buloba bua Ngenesarete.#14.34 Tangila Mar 6.53 ne diumvuija . 35Bena muaba awu kumanya ne: Yezu. Nanku kumanyishabu mu buloba bujima abu ne: wafiki! Ke bantu kufika ne babeedi bonsu kudiye. 36Bavua bamusengelela bua bantu bamulenge nansha ku luzemba lua tshinkutu tshiende. Bonsu bavua balulenga, bavua bumvua bimpe.

Currently Selected:

Matayi 14: TSH96

Highlight

Copy