Matewu 7

Mu nga hingegedzeli guvivba vakwanu

(Luka 6:37-38,41-42)

1“Mu nga lamuli vakwanu, gasi mu si lamudwi nenu. 2#Wona gambe: Mark 4:24. Kholu, idzo mu na lamulago khidzo vakwanu, mu na lamudwa nenu khidzo. Ndronga mu na pimago khiyo vakwanu, khiyo mu na pimwago nenu khiyo. 3Khu ginani u khedzago gitoti gi guromo lisoni ga ndriyago, u si khedzi vhambala wu guromo lisoni gwago? 4U na dzi kodza kharini gu embela ndriyago, khuwe: ‘Wandruye, hidzimela nyi gu dusa gitoti lisoni gwago’ nuri ni vhambala lisoni gwago nuwe? 5Nyamaliphawe! Dusa guphela vhambala wu guromo lisoni gwago, khavbo u na dzi kodzago gu dusa gitoti gi guromo lisoni ga ndriyago.

6“Mu nga dzegi silo nya gukatege mu ninga dzimbwa, dzi nga mi wugelani dzi mi hodza; kha nga gambe, mu nga dzegi dzindralama dzanu mu ninga dzikhumba, dzi nga gandredzedwa.

Nombelo nya gusimamise

(Luka 11:9-13)

7“Lombani, mu na ningwa; vbwetani, mu na si mana; khokhothani, mu na tuledwa. 8Kholu muthu watshavbo a lombago, a ngu ningwa; uye a vbwetago a ngu si mana, ni uye a khokhothago, a ngu tuledwa. 9Khu wevbi melegi, vbakari gwanu, a ningago giwindri gyanana gyaye gya gu mu lomba gibaba? 10Mwendro gu gi ninga nyoga gya gu mu lomba ndzandzi? 11Nga wonani: Ambari enu nya gukhenu mu vivbedwe khu myonyo mu dzi kodzago gu ninga silo nya sadi sanana sanu, ahati Babe wanu a guromo Ndzadzini kha na nga ninga silo nya sadi vale va mu lombago, gani? 12#Wona gambe: Luk 6:12. Khu kharato, iso mu vbwetago gukhenu vathu va mi girele, va gireleni nenu, kholu khidzo kharati wu hevbudzago Nayo ni sihevbudzo sa vaprofeti.

Mwanya wu dugwana

(Luka 13:24)

13“Belani khu mwanya nya dugwana! Kholu ndzila yi yisago gumbembani yi anamide ngudzu; mwanya wakone nuwo. Nya vangi khavo va belago khiyo! 14Gasi ndzila yi yisago guvbanyani yi hongide ngudzu; mwanya wakone nuwo. Vadugwana va belago khiyo.

Simbo gu tidwa khu mihandro yaye

(Luka 6:43-44)

15“Dzi woneleni ni vaprofeti nya malipha, va tago vbakari gwanu kha nga dzinvuta, gasi khu ndrani masolwa nya guvbelele. 16Mu na vati khu mihandro yawe. Ina gu ngu hawa dziuvha mu sikakaradzani, mwendro makandzu mu sirangalabwani, gani? 17Simbo watshavbo nya wadi wa gu thela mihandro nya yadi; gasi uwo nyamba wadi wa gu velega iyo nyamba yadi. 18Simbo nya wadi kha wu dzi kodzi gu velega mihandro nyamba yadi. Kha nga simbo nyamba wadi wu si dzi kodzigo gu velega mihandro nya yadi. 19Simbo watshavbo wu si velegigo mihandro nya yadi wu ngu kokwa wu rinywa niloni. 20#Wona gambe: Mat 3:10; 12:33; Luk 3:9. Khu kharato, mu na vati khu mihandro yawe.”

Khu mani a belago Mufumo wa Ndzadzini

(Luka 13:25-27)

21“Khandri watshavbo wule a gukhuye: Pfhumu, Pfhumu, a na belago Mufumoni wa Ndzadzini. Aholu a na bela basi uye a girago gugola ga Babe wangu a guromo Ndzadzini. 22Nya vangi va na nyi embela litshigu lolo, khavo: ‘Ama Pfhumu, ina kamwe kha ha profeta khu lina lago, hi tutumisa maphuvbo nya guvivbe, gumogo ni gu gira siliwugiso nya singi khu lina lago, gani?’ 23#Wona gambe: Dzind 6:8. Khavbo avbo, eni nyi na va hakha, kheni: Kha nyi mutini ne vbadugwana. Leyani mbeli gwangu, enu mwatshavbo mu girago guvivba.

Gigengeli ni gipumbu

(Luka 6:47-49)

24“Wule a pwago mahungu yangu a ma landrisa, a gu fanana ni mwama nya mapimo a nga vbaha nyumba yaye mugiwindrini. 25Yi diwa ndzadzi nya yingi, yi gugumugisa mati nya mitsongo, gu manega talo; gumogo ni gu vetwa khu phuvbo nya gingulu nyumba yile; aholu kha ya thega, kholu yi tsitsidwe gwadi mugiwindrini. 26Gasi uye a pwago mahungu yangu a si ma landrisi, a gu fanana ni gipumbu gi nga vbaha nyumba yaye mulipfuleni. 27Yi diwa ndzadzi nya yingi, yi gugumugisa mati nya mitsongo, gu manega talo; gumogo ni gu vetwa khu phuvbo nya yikhongolo; nyumba yile yi di dzegela gu pfhungumuga yi thega wufendretiri.”

28Na vbedzide gu ganela magana yaya, gidzemo gi di liwuga sihevbudzo saye. 29Kholu a di gu va hevbudza kha nga uye a gu ni fanelo nya guhevbudze, nasiri kha nga vahevbudzi nya Nayo.

Currently Selected:

Matewu 7: BGG2014

Highlight

Copy