Matewu 8

Guhawulugiswa nya mudwali nya sokono

(Marko 1:40-45; Luka 5:12-16)

1Na gu relela khu gigomoni, Jesu a di landrwa khu gidzemo nya gikhongolo. 2Khavbo avbo, a di yedwa khu mudwali moyo nya sokono, a ngaya mu khidzimela, khuye: “Pfhumu, wa gu dzina, nyi hawulugise.” 3Jesu na mu handzegide mandza, a di mu embela, khuye: “Nyi ngu dzina, hawuluga!” Mudwali wule a di dzegela gu hawuluga. 4#Wona gambe: Levh 14:1-32. Aholu Jesu a di mu laya, khuye: “U nga embeli muthu; indra dzi leyedza ga muphasi nya mhamba, gufela gu a ningela, khu guagiswa gwago, iso si rumwago khu Mosi, gasi gu khala nari wufakazi vbakari gwawe.”

Guhawulugiswa ga githumi gya muthangeli nya gikwata nya masotshwa

(Luka 7:1-10)

5Na gu bela Khafarinawume, a di tedwa khu muthangeli moyo nya gikwata nya lizana masotshwa, a ngata mu lombago, khuye: 6“Pfhumu, ndrangani gwangu nyi na ni githumi gi sanisekago ngudzu. Gi khwenyede sivbango.” 7Jesu a di mu hakha, khuye: “Nyi nata mu hawulugisa.” 8Aholu muthangeli wule a di mu hakha, khuye: “Pfhumu, nyi mwalo fanelo nya gu uwe u bele ndrangani gwangu; aholu rumela lito limwedo lago basi, githumi gyangu gi na vbanya. 9Kholu eni neni, nyi muthu nyi gu na ni vakhongolo vangu, nyi na ni masotshwa nyi ma rumago. Mumbe gu mu ruma, kheni, indra, a gu hongola; mumbe, kheni: Delu, ata; ga githumi gyangu, kheni: Gira egi, gi gu gira.” 10Na pwide magana yaya, Jesu a di mu liwuga ngudzu, a gu embela avo va nga bani va gu mu landra, khuye: “Nyi ngu mi embelani, khu lisine, kheni: Gima nyi si gu mani muthu nya gukhodwe nga oyu tigoni momu ga Israyeli! 11Nyi ngu mi embelani nya gukheni va nata nya vangi khu Khugadambo ni Muhwadambo vata khala vbamezatunu gumogo ni Abrahama, ni Isaki, ni Jakobe Mufumoni wa Ndzadzini, 12gasi va mune thomba va na rinywa vbavbandze, mugidemani, avbo va na guya lilago ni gu ketsa magwaha.”

13Khavbo avbo, Jesu a di embela muthangeli, khuye: “Indra, si na girege satshavbo kha nga idzo u khodwago khidzo.” Gikhati gile kamwe githumi gi di hawuluga.

Guhawulugiswa ga ngogadzi wa Pedro

(Marko 1:29-34; Luka 4:38-41)

14Jesu na bede ndrangani ga Pedro, a di ya mana ngogadzi wa Pedro na lade khu gupwa feveri. 15Na mu kuhide mandza feveri yi di dzegela guvbindra, a gu wuga a va sayisa. 16Ni silambo, va di mu yisela vathu nya vangi va nga bani vari ni madwali ni vatshavbo va nga bani na vari ni maphuvbo nya guvivbe gasi uye, khu magana yaye, a di ma tutumisa, gumogo ni gu hawulugisa vadwali. 17#Wona gambe: Isa 53:4. Gasi gu tadzisega, kharati, iso si nga ganedwago khu muprofeti Isaya, nya gukhuye: “Uye dzegide madwali yathu, a gu rwala wuvi wathu.”

Avo va vbwetago gu landra Jesu

(Luka 9:57-62)

18Jesu na wonide gukhuye randredwe khu vathu nya vangi, a di embela vapizane vaye gukhuye va tshatugela khisikheyi. 19Khavbo avbo, a di hidzimela gwaye muhevbudzi nya Nayo a nga mu embelago, khuye: “Muhevbudzi, nyi na gu landrela ni hayini avbo u na gu hongolago.” 20Jesu a di mu hakha, khuye: “Migehe yi na ni mavbala yawe; sinyoni sa damboni si na ni sihaga sawe. Aholu Mwamana wa Muthu mwalo avbo nya gukhihimele hungo waye.”

21Mumbe mupizane a di mu embela, khuye: “Pfhumu, nyi dige, guphela, nyi ya dzinga babe wangu.” 22Jesu a di mu hakha, khuye: “Uwe nyi landre. Va dige vafi va dzinge vafi vakwawe.”

Jesu a ngu rudzisa gingulu

(Marko 4:35-41; Luka 8:22-25)

23Uye na bede ngalavani vapizane vaye va di mu landrela. 24Avbovbo gi di duga gingulu nya gikhongolo, gi nga gira gu ngalava yi pfhuledwa khu mavimbi. Aholu Jesu a di lade. 25Vapizane vaye va di ya mu wusa, khavo: “Pfhumu, hi vbanyise, hi ngufa!” 26Jesu a di va embela, khuye: “Mwa gu thava ginani, vathu nya gukhodwe vbadugwana?” Na khugide, a di kawuka phuvbo ni mavimbi. Khavbo avbo, gu di manega malenga nya makhongolo. 27Vathu vale va di liwuga, khavo: “Gasi muthu muni oyu nya gu ambari phuvbo ni yiphwa si mu yingela?”

Guvbanyiswa ga va nya madwali nya mandriki

(Marko 5:1-20; Luka 8:26-39)

28Na va vbohide tshatugo tigoni ga Vagadharenu, a di khingwa khu vama vavili va nga bani vari ni maphuvbo nya guvivbe na va gu dugela marowoni. Va di gu garadza gule nya gu mwalo a nga bani a tiya gu vbindra khu ndzila yoyo.

29Avo va di gulumela, khavo: “Ginani hi nga gu ghohela, Mwamana wa Nungungulu? U tede guta hi tshanisela ginani, na gi si gu vbohi gikhati gyakone?”

30Dzi diromo vbafuvbyana vbale dzikhumba nya dzingi dzi nga bani dzi gu haviswa. 31Maphuvbo yale ma di mu lomba, khayo: “Wa gu hi tutumisa, hi dzumedzise hi ya bela mudzikhumbani mule.” 32Jesu a di ma embela, khuye: “Indrani!” Khavbo avbo, na ma dugide, ma diya bela mudzikhumbani, dzi nga tutumago dzi ya bela nondrwani, umo dzi nga ya mbembago dzatshavbo. 33Vahavisi vakone va di tutuma, va hongola dhoropani vaya tivisa iso si nga dugelela vama vale nya maphuvbo nya mandriki. 34Vathu vatshavbo va dhoropani va di yela Jesu gasi guya mu lomba gukhavo a khuge tigoni gwawe.

Currently Selected:

Matewu 8: BGG2014

Highlight

Copy