Matewu 9

Guhawulugiswa nya gilima gya Kafarinawume

(Marko 2:1-12; Luka 5:17-26)

1Khavbo avbo, na bede ngalavani, a di tshatuga aya dhoropani gwaye. 2Va di mu yisela gilima khu lithatho. Jesu, khu gu wona gukhodwa gwawe, a di embela gilima, khuye: “Mwanangu, tiya. Sighoho sago si tsetseledwe.” 3Va di manega vahevbudzi nya Nayo va nga alakanya mapimoni gwawe, khavo: “Oyu mwama a ngu hembulula Nungungulu.” 4Aholu Jesu, na wonide maalakanyo yawe, a di va wudzisa, khuye: “Khu ginani mu khalago ni maalakanyo nya guvivbe kharato? 5Khu gevbini gi vbevbugidego gu ganela gukheni: ‘Sighoho sago si tsetseledwe’, mwendro gukheni, ‘Khuga u gimbile?’ 6Kha nga ulo, gasi gu enu mu dziti nya gukhenu Mwamana wa Muthu a na ni tshivba nya gutsetselele sighoho mafuni momu; a di embela gilima, khuye: Khuga u eme, dzega lithatho lago u hongola gaya.” 7Khavbo avbo, gilima gi di dzegela gu khuga gi hongola gaya. 8Gidzemo, na gi wonide esi, gi di tala khu githawo, gi dhumisa Nungungulu a nga ningago vathu tshivba nya nga yile.

Guranwa ga Matewu

(Marko 2:13-17; Luka 5:27-32)

9Jesu na khugide khu vbale, a di wona mwama moyo nya gupwani khu Matewu, na khade wulangani gwaye nya gukhuphise, a mu embela, khuye: “Nyi landre!” Uye a di khuga a mu landra. 10Jesu, na romo vbamezatunu, ndrangani ga Matewu, a dita randredwa khu vakhuphisi ni sighohi, va ngata khalago navo vbamezatunu gumogo ni vapizane vaye. 11Vafarisi na va wonide esi, va di embela vapizane vaye, khavo: “Khu ginani muhevbudzi wanu a hodzago ni vakhuphisi ni sighohi?” 12Jesu, na va pwide, a di va kawuka, khuye: “Khandri vale va gu ni womi va vbwetago nyanga, aholu, vadwali. 13#Wona gambe: Mat 12:7; Hos 6:6. Indrani mu ya vbweta guti tshamuselo nya mahungu yaya: ‘Eni nya gu hatha wuhindzi guvbindra mhamba.’ Kholu kha nya tela guta rana va nya ndruda, aholu, sighohi.”

Guhala

(Marko 2:18-22; Luka 5:33-39)

14Khavbo avbo, vapizane va Johane va di mu yela vaya mu wudzisa, khavo: “Khu ginani ethu ni Vafarisi hi halago dzinyondro nya dzingi, vapizane vago va si hali?” 15Jesu a di va hakha, khuye: “Ina gu ngu kodzega gu dziphelegedzi dza mwane dzi swihala na dziri naye, gani? Ma nguta matshigu va na gu dzegedwago mwane. Gikhati gyogyo va na hala!”

16“Mwalo a thelago giziva nya giphya vbamwendratunu wa gale, kholu giziva gi na pferula mwendra wa gale. Khu kharato, mwendra wu na engedzelana gu pferuga. 17Kha nga gambe, mwalo a thelago wadwa nya wuphya malowoni ya gale. Wa gu gira kharato, wadwa nya givhayi wu na pola malowo,#9:17 Malowo: Vajudha va gu olovela gu thela wadwa umo nya sikhwama nya malowo. wu vbalaga wadwa ni gu luzega malowo. Aholu wadwa nya wuphya wa gu thedwa malowoni nya maphya, gasi satshavbo si pindruge.”

Nyamahegyane wa Jayiro ni nyamayi nya milovba

(Marko 5:21-43; Luka 8:40-56)

18Na nga gu va embela esi, a di vbohedwa khu moyo a nga bani ari muthangeli, a ngaya mu khidzimela, a mu lomba, khuye: “Nyamahegyane wangu a ngari gufa, aholu delu uta mu handzega mandza yago, a na vbanya.” 19Jesu a di khuga a hongola naye gumogo ni vapizane vaye. 20Khavbo avbo, nyamayi moyo a nga bani a dwala khu gu dugelela novba gipimo nya likhumi na mivili myaga, a di hidzimela khu hwane gwaye aya kuha tshoka nya mwendra waye. 21Kholu a di gu pimisa, kharati: “Nya nga kuha guambala gwaye, nyi na hawuluga.” 22Jesu na thendregedzide, a di mu khedza, khuye: “Mwanangu, tiya, gukhodwa gwago gu gu vbanyiside.” Gikhati gile kamwe, nyamayi wule a di dzegela gu hawuluga.

23Jesu, na vbohide ndrangani ga muthangeli nya nyumba nya nombelo, a diya mana va nya gu womba sitoliyo ni vathu va nga bani va wombedzelana dzihuwa nya gililo, a va embela, khuye: 24“Dugani, kholu nyamahegyane kha fa gilo, a di lala.” Aholu avo va di mu hega. 25Na va dugide vatshavbo vbavbandze, Jesu a di bela. Na mu pharide khu libogo, nyamahegyane a di wuga. 26Ndruma yakone yi di dzegela gu phalalega tigoni mule gwatshavbo.

Sikhumu sivili si ngu tudwa maho

27Jesu, na gu khuga khu vbale, a di landrwa khu sikhumu sivili na si gu rana, khiso: “Mwamana wa Dhavhidhe, hi pwele wusiwana.” 28Na vbohide ndrangani, sikhumu sile si di mu hidzimelela. Jesu a di si wudzisa, khuye: “Mu ngu khodwa nya gukhenu nyi na ni tshivba nya gugire isoso, gani?” Va di hakha, khavo: “Hi ngu khodwa, Pfhumu.” 29Khavbo avbo, a di va kuha maho yawe, khuye: “Gu na girege gwanu kha nga idzo mu khodwago khidzo.” 30Khu kharato, maho yawe ma di tulega. Jesu a di va laya, khuye: “Gwadi gwadi, mu nga embelini muthu.” 31Gani olu, na va khugide khavbo, va di phalalegisa ndruma yaye tigoni mule gwatshavbo.

Guhawulugiswa ga mwama nya gidudu

32Na va ngari gu duga, va di mu yisela gidudu, gi nga bani giri ni liphuvbo nya guvivbe. 33Me ni gu tutumiswa liphuvbo lile, gidudu gi di ganela. Gidzemo gi di tala khu guliwuga, khigyo: “Gima hi si gu woni nya nga esi tigoni momu ga Israyeli.” 34#Wona gambe: Mat 10:25; 12:22-24; Mark 3:22; Luk 11:14-15. Aholu, vafarisi va di khavo: “Uye a gu tutumisa maphuvbo nya guvivbe khu tshivba ya khongolo nya maphuvbo nya guvivbe.”

Jesu a ngu pwela gisiro vathu

35 # Wona gambe: Mat 4:23; Mark 1:39; Luk 4:44. Jesu a di gu gimbila gimbila ni madhoropa ni mitalala, na gu hevbudza dzinyumbani gwawe nya nombelo ni gutshumayela Ivhangeli nya mufumo, gumogo ni gu hawulugisa madwali yatshavbo ni dzingumbe dzinyumbani gwawe nya nombelo ni gutshumayela. 36Na wonide gidzemo, a di gi pwela gisiro, kholu vatshavbo va di garade havo hokohoko, kha nga dzinvuta nyambana muhavisi. 37Khavbo avbo, a di embela vapizane vaye, khuye: “Khu lisine, guvbwera gukhongolo! Aholu, sithumi sidugwana. 38Khu kharato, lombani ga mune lithembwe a rumele vavbweri nya dzimbewu dzaye.”

Currently Selected:

Matewu 9: BGG2014

Highlight

Copy