Matewu 10

Guhatha vapostoli

(Marko 3:13-19; Luka 6:12-16)

1Jesu a di rana vapizane, nya likhumi na vavili a gu va ninga tshivba nya gututumise maphuvbo nya guvivbe ni gu hawulugisa madwali ni mafumbu yatshavbo nya dzingumbe. 2Malina yawe khaya: Nya guphele khu Simoni, a ranwago pwani khu Pedro, ni ndriyaye Andreya; Jakobe ni ndriyaye Johane, sanana sa Zebhedhewu; 3Filipi ni Bharitolomewu; Tomasi ni Matewu, mukhuphisi; Jakobe, gyanana gya Alifewu, ni Tadhewu; 4Simoni Mukhanani, ni Judha Sikarioti, a gu uye a nga mu ningelago.

Gurumedwa ga vapostoli

(Marko 6:7-13; Luka 9:1-6)

5Jesu a di rumela ava nya likhumi na vavili, a va leletela, khuye: “Mu nga gimbilelini umo nya mahedheni, gambe mu nga belini dhoropani nya Vasamariya. 6Phelani khu gu yela dzinvuta dzi dzimedego dza nyumbani ga Israyeli. 7Gimbilani na mu gu huwelela, khenu: ‘Wufumu wa Ndzadzini womo vbafuvbi.’ 8Hawulugisani vadwali, wusani va nya gufa; agisani va nya sokono ni gu tutumisa maphuvbo nya guvivbe. Mu ningidwe mahala; ningelani nenu mahala. 9Mu nga pharini dzitsapawu nya ndralama, mwendro nya parata, mwendro nya sugu dziborisani gwanu; 10mu nga pharini mirava nya dzimbuva, mwendro dzingandzu dzimbili, silato ni ndronga; kholu githumi gi na ni fanelo nya gu hodziswe. 11Ni levbi lidhoropa mwendro talala mu na gu belago, vbwetani guti mwendro womo muthu nya gutumbege a gu ni fanelo. Khalani ndrangani gwaye kala mu gu vbindra. 12Ndrangani mu na gu belago, va loseni. 13Ndranga yoyo ya gu bani yiri ni fanelo, gurula gwanu gu na khale avbo; aholu ya gu bani yiri mwalo fanelo, gu na bwelele gwanu. 14Gasi avbo va na gumba mi hakha, mwendro gumba hakhwa mahungu yanu, mwa gu duga khu ndrangani momo, mwendro dhoropani momo, phuphuthani kudzudzwane wa migondroni gwanu. 15Khu lisine nyi ngu mi embelani, kheni litshigu nya gulamudwe, lidhoropa lolo li na dayiswa guvbindra Sodhoma ni Ghomora.

Gurumedwa ga vapizane

(Marko 13:9-13; Luka 21:12-17)

16“Wonani, nya gu mu rumelani kha nga dzinvuta vbakari nya masolwa; khu kharato, gengelani kha nga dzinyoga; mu rula kha nga matuva. 17Gwadigwadi ni vathu! Va na mi yisani miphathani nya gulamudwe, va mi kwamula mudzinyumbani gwawe nya nombelo; 18mu na yiswa mbeli ga vafumeli ni dzipfhumwana khu kotani yangu, mufela guya fakaza mahoni gwawe ni mahoni nya mahedheni. 19Aholu, mwa gu ningedwani, mu nga dzi garadzi khiso mu na guya ganelago ni maganelelo yakone; kholu gikhati gyogyo mu na embedwa igyo mu na ganelago. 20Kholu khandrenu mu na ganelago, aholu Liphuvbo la Babe wanu khilo li na mi ganelelago. 21#Wona gambe: Mark 13:12; Luk 21:16. Ndruye a na songa ndriyaye; babe a songisa mwanaye; sanana si na wugela vavelegi si va songa. 22#Wona gambe: Mat 24:9,13; Mark 13:13; Luk 21:17. Gasi enu mu na zondrwa khu vatshavbo khu kotani nya lina langu. Aholu uye a na tsaramago kala mahegiso a na vbanyiswa. 23Mwa gu tutumiswa dhoropani momo nya gukari, thavelani ga limbe. Kholu khu lisine nyi ngu mi embelani, kheni: Kha mu na vbedza gu dzuwulugela madhoropa ya Israyeli na si gu vbohi Mwamana wa Muthu.

24 # Wona gambe: Luk 6:40; Joh 13:16; 15:20. “Mupizane kha vbindri muhevbudzi waye, ni githumi kha gi vbindri mune waye. 25#Wona gambe: Mat 9:34; 12:24; Mark 3:22; 11:15. Gu enede ga mupizane a gu dzi kodza gu fanana ni muhevbudzi waye, ni githumi gu godza mune waye. Ambari nya gukhuwe khu mune ndranga va nga mu vala khavo khuye Bhelizebhu, va na khavo ginani khu ngamo yaye?

Uye hi yelago gu mu thava

(Luka 12:2-7)

26 # Wona gambe: Mark 4:22; Luk 8:17. “Khu kharato, mu nga thavi gilo, kholu gi mwalo gi nga fenengedzwago gi na gumba funungudwa; kha nga gambe, mwalo sihalo wu na gumba tidwa. 27Iso nyi mi embelago mugidemani, si tiviseni safani nya mihani; niso muyago khu gu lembedwa, si pwadzeni khu vbatshani nya dzinyumba. 28Mu nga thavi avo va songago givili, na va si kodzi gu songa hefemulo. Thavani, uye a dzi kodzago gu rinya givili ni hefemulo phalani nya nilo. 29Ina kha si ngu rengiswa sinyoni sivili khu kinyeta mweyo basi, gani? Ambari ulo gimwalo ni gimwegyo gi thegago vbavbatshi nyamba dzumedziswa khu Babe wanu! 30Ambari ni ndzudzu wa hungoni gwanu wu valedwe watshavbo! 31Khu kharato, mu nga thavi gilo kholu mu ngu phasa ngudzu guvbindra sinyoni nya singi.

Gufakaza Jesu muvathuni

(Luka 12:8-9)

32“Khu kharato, watshavbo uye a nyi dzumelago vbakari nya vathu, nyi na mu dzumela neni mahoni ga Babe wangu a guromo Ndzadzini. 33#Wona gambe: 2 Thim 2:12. Gasi uye a nyi dangago vbakari nya vathu, nyi na mu danga neni mahoni ga Babe wangu a guromo Ndzadzini.

Gidzumeledzwano nya guvbanye ni Kristo

34“Mu nga pimisi nya gukhenu nyi di resa gurula mafuni; kha nya resa gurula, aholu nyimbi. 35Kholu nyi dzude nyita hambanisa mwamana ni babe waye, nyamahegyane ni mayi waye, ngadzamwane ni mayinasale waye. 36#Wona gambe: Mik 7:6. Khu kharato, valala nya muthu va na dugela muvalongoni gwaye.

37“Uye a golago babe mwendro mayi guvbindra idzo a nyi golago khidzo, kha nyi faneli. Ni uye a golago mwanaye nya gikhwathana mwendro nya gyagadzyana guvbindra idzo a nyi golago khidzo, kha nyi faneli. 38Uye a si rwaligo gihambano gyaye a nyi landra, kha nyi faneli. 39#Wona gambe: Luk 17:33; Joh 12:25; Mat 16:24-25; Mark 8:34-35; Luk 9:23-24; 17:33; Joh 12:25. Uye a zamago gu vegedza womi waye, a na dzimeledwa khuwo, ni wule a na gu dzimedzago womi waye khu kotani yangu, a na wu mana.

Tshatshazelo nya mithumo ya yadi

(Marko 9:41)

40 # Wona gambe: Luk 10:16; Joh 13:20; Mark 9:37; Luk 9:48. “Uye a mi hakhago, kheni a nyi hakhago; gasi uye a nyi hakhago a ngu hakha Wule a nga nyi rumelago. 41Uye a hakhago muprofeti kha nga muprofeti, a na hakha tshatshazelo nya nga ya muprofeti; uye a hakhago muthu nya ndruda khu gukhuye muthu nya ndruda, a na hakha tshatshazelo nya nga ya muthu nya ndruda. 42Uye a ningago khokho nya mati nya gudzidzile ga moyo nya vapizane vangu nya gusolege, khu gu muti nya gukhuye mupizane wangu, khu lisine nyi ngu mi embelani, kha na dzimeledwa khu tshatshazelo.”

Currently Selected:

Matewu 10: BGG2014

Highlight

Copy