Matewu 11

Sirumwa sa Johane ga Jesu

(Luka 7:18-35)

1Na vbedzide gu ninga sileletelo sesi ga vapizane vaye nya likhumi na vavili, Jesu a di khuga khu vbale, gasi gu gimbila a hevbudza madhoropani gwawe.

2Johane, khu pasoni, a dipwa ndruma nya sigiro sa Kristo. A di rumela vapizane vaye, gasi guya mu wudzisa, khavo: 3“Khuwe wule a vbwetago guta, mwendro hi nga gu lindrela mumbe?” 4Jesu a di va hakha, khuye: “Indrani muya tivisa Johane iso mu nga si pwago ni gu si wona: 5Sikhumu si ngu wona, sikhurubwa si ngu gimbila, va nya sokono va ngu agiswa, sivbwiri si ngu pwa, vafi va ngu wuga, Mahungu nya Yadi ma ngu hevbudzwa sisiwana. 6Kategide saye wule a si khunguvanyiswigo kheni.”

7Na va hongode, Jesu a di phela gu embela gidzemo khu mahungu ya Johane, khuye: “Ginani mu ngaya gi wona giwulani? Tshava nya gu hanahaniswe khu phuvbo? 8Gasi ginani mu ngaya gi wona? Muthu nya guambale sombo nya gumbure? Avo va ambalago sombo nya gumbure va gu dugela mudzindrangani nya wufumu. 9Gasi ginani mu nga ya gi wona, na? Muprofeti? Ina. Khidzo nyi mi embelago, guvbindra ni muprofeti. 10#Wona gambe: Mal 3:1. Khuye oyu a thudwago khu Milowo, gupwani: ‘Nyi na thangisa mbeli gwago mwango wangu, gasi guya gu dongisela ndzila yago.’ 11Khu lisine nyi ngu mi embelani, kheni: Vbakari nya vathu vatshavbo va velegidwego khu nyamayi, mwalo a gu khongolo guvbindra Johane mubhapatisi. Aholu muthu nya mahegisela Mufumoni wa Ndzadzini khongolo gu mu vbindra. 12Gukhugela matshiguni ya Johane Mubhapatisi kala muhuno, Mufumo wa Ndzadzini wu ngu dwanedwa khu tshivba ni tshivba. Avo va gu ni tshivba va guya gu khu gu wu wandra. 13#Wona gambe: Luk 16:16. Kholu vaprofeti vatshavbo ni Nayo va di hevbudza kala gu vboha Johane. 14#Wona gambe: Mat 17:10-13; Mark 9:11-13. Mwa guvbwetani gu khodwa, dzitini nya gukhenu uye khuye Eliya a nga bani a gu vbweta guta. 15Uye a gu ni dzindzeve nya guyingise, a napwe.

Gumba khodwa

16“Aholu nyi na va fananisa ni mani vathu nya mela yoyu? Va ngu fanana ni sanana sile nya gu, na siromo mitendrelani, si ganedzisana, khiso: 17‘Hi wombide sitoliyo, kha mwa hana! Hi embide dzindzimo nya wusiwana, kha mwa lila!’ 18Dzude Johane Mubhapatisi, a si hodzigo gilo ni gu sela wadwa, mwari, khenu: ‘A na ni liphuvbo nya guvivbe!’ 19Dzude Mwamana wa Muthu, a hodzago ni gu sela, mwari, khenu: ‘Na ni limidzo, bewudzi, pari nya va khuphisi ni sighohi!’ Aholu guti gwa gu dzi yeyedza khu mithumo yaye.”

20Khavbo avbo, a di phela gu hembulula madhoropa yale a nga girago umo siliwugiso saye nya singi, khu gumba vbindrugedza gwawe, khuye: 21“Libango lago, Khorazini! Libango lago, Bhetisayidha! Kholu nari pwani Tiro ni Sidhoni va di wonide siliwugiso nya nga iso mu nga si wonago enu, na va dzi vbindrugedzide gale khu gu ambala dzisaku ni gu phorola nguma. 22#Wona gambe: Isa 23:1-18; Ezek 26:1—28:26; Joy 3:4-8; Amos 1:9-10; Zak 9:2-4. Khu kharato, nyi ngu mi embelani, kheni: Litshigu nya gulamudwe, gu na vbevbugisedwa Tiro ni Sidhoni guvbindra enu. 23#Wona gambe: Isa 14:13-15. Ahati uwe, Kafarinawume! U na dzi khusedza kala Ndzadzini, gani? U dzi pembide, u na rinywa phalani nya nilo, kholu, nari gupwani siliwugiso si nga girwago mahoni gwago si di giredwe tigoni ga Sodhoma, nolu litigo lolo na li nga romo. 24#Wona gambe: Gen 19:24-28; Mat 10:15; Luk 10:12. Ambari ulo nyi ngu mi embelani, kheni: Litshigu nya gulamudwe, gu na vbevbugisedwa Sodhoma guvbindra uwe.”

Nungungulu a gu dzi yeyedza ga va nya gu dzi sodzisa

(Luka 10:21-22)

25Gikhati gyogyo, Jesu a di khusa lito, khuye: “Nyi ngu gu rungudza, Baba, Pfhumu nya ndzadzi ni mafu, kholu u sihede va nya guti ni va nya gugengela silo sesi, u si yeyedza ga va nya gusolega. 26Ina, Baba, kholu khidzo si nga gu nengedzisago khidzo. 27Satshavbo nyi ningidwe khu Babe wangu. Mwalo a mu tigo Mwamana vbavbandze ga Babe ekha, gambe mwalo a mu tigo Babe vbavbandze ga Mwanaye ekha ni wule Mwamana a dzinago gu mu tulela. 28Deluni gwangu, enu mwatshavbo mu garadego ni gu lemedwa; eni nyi na mi hefemudza. 29Rwalani pingwi wangu, mu hevbula kheni nyi gu ni monyo nya gurule nuwo nya gu dzi sodzise, gasi mu mane gutangala nya mihefemulo yanu. 30Kholu sileletelo sangu kha si garadzi, ni pingwi wangu wu vbevbugide.”

Currently Selected:

Matewu 11: BGG2014

Highlight

Copy