PANDARIADDI 12
12
I Abram niwagoannu Ruata
1 Mawu nabbisara si Abram, “Tantanga'e wanuanu, ṛuangannu amonannu wuṛṛu wal᷊en yamangngu, wuṛṛu inaite watukku wanua apan Ta'u ipantingidda si'o. 2I ya'u sarun mangonggolla si'o papapulunna apan manambo wuṛṛu i mangitou sarun maola'a walahanna apan bahewalla. I ya'u sarun mangal᷊amatta si'o wuṛṛu arannu mabbal᷊i tumelengnga, ma'oman sara i'o maola'a al᷊amatta.
3I ya'u sarun mangal᷊amatta manga taumata apan mangngal᷊amatta si'o
wuṛṛu mamontoga manga taumata apan mammontoga si'o.
Wuṛṛu ana waugu i'o
I ya'u sarun mangal᷊amatta anambon balahanna su runia.”
4-5I Abram uukke pitun pul᷊o l᷊ima su tonnane su tempo i tou nanantangngu i Haran, ere buatte nirolokku Mawu si tou. I Abram inaite watukku leta'u Kanaan suadio'a ringanni Sarai awingnge wuṛṛu i Lot ana'u tuṛṛangnge, wuṛṛu al᷊awo'u darotongnge see lai manga allangnge apan niasombanganni mangitou su i Haran.
Napawe i mangitou na'omate su Kanaan, 6i Abram namal᷊intaddu leta'a udde na'oman sara i tou na'omate su alu pia taṛṛinone su More, eteudde tampa patataṛṛamawuanna su Sikhem. (Su tempo udde taumatan Kanaan ta'e uatana'a su leta'a udde.) 7Mawu naipasilon batangan-Ne si Abram wuṛṛu nabbisara si tou, “Ete indi wanua apan Ta'u ionggolla su papapulunnu.” Ana see i Abram napararisikku sambau mezbah hunan Mawu apan buatte naipabilon batangan-Ne si tou. 8Wua'udde i tou nanassukku amatanne watukku timukka, watukku wageangngu leta'a pia bowone su samba'an da'i soan Betel, wuṛṛu naddasanna suwallatu Betel wuṛṛu soa Ai; Betel su samba'an baṛṛata wuṛṛu Ai su samba'an da'i. Isudde lai i tou napararisikku mezbah wuṛṛu nassubba Mawu. 9Wua'udde i tou nanassukku amatanne apia wuassu tampa sambau watukku tampa manansunna, mabbatukku samba'an timukku leta'u Kanaan.
I Abram su Mesir
10Arawe su Kanaan tantal᷊anna pia ṛutumma apan bahewalla, na'oman sara i Abram inaite arauanne lai watukku timukka, watukku wanua Mesir natana'a poiaroddi maddatingngu ṛutumma udde mal᷊iu. 11Su tempo i tou sumabbite passaranna wuṛṛu sumuttate watukku wanua Mesir, i tou nabbisarate si Sarai awingnge, “I'o maṛṛamaga atonna awingku. 12Amungkangngu taumatan Mesir maasilo si'o, i mangitou sarun massunna manungku i'o awingku ana see i ya'u sarun pateanni mangitou wuṛṛu i'o iwala wiakka. 13Nariaddi mappianne i'o pabbisarate manungku i'o tuari'u tadea'u i ya'u iwala mangitou wiakka wuṛṛu olaanna mapia ana waugu i'o.” 14Ne atonna, napawe i Abram niumamatte su passaranna wuṛṛu na'omate su wanua Mesir, taumata Mesir naasilo manungku i Sarai tumaniten maṛṛamaga atonna. 15Manga pira taumatan araratuanna naasilo si tou apiddu namasingkatta ratu manungku maṛṛamaga atonna wawine udde; ana waugu udde i tou niapidda watukku wal᷊en araratuanna. 16Ana waugu i Sarai, ratu naungnge mapia si Abram wuṛṛu nangonggollu manga allangnga si tou, ammul᷊annu domba wuṛṛu ambingnga, sapi, keledai wuṛṛu unta.
17Arawe ana waugu ratu nanganu si Sarai, Mawu nandantan al᷊aṛṛusa'itta apan maata'utta su ratu wuṛṛu manga taumata sulal᷊ummu wal᷊en araratuanne. 18Ana see ratu namago si Abram wuṛṛu naiwal᷊o si tou, “Apate apan niolangngu su saruangku indi? Anio tawe niwal᷊onu manungku udde awingngu? 19Anio niwal᷊onu manungku i tou tuarinu wuṛṛu namala'u manganu maola'a awingku? Indi i tou, awingngu; apira'e wuṛṛu roote!” 20Ratu namarenta siri pira mamanarane, wuṛṛu i mangitou napasabangngi Abram wuassu wanua udde suadio'a ringannu awingnge wuṛṛu al᷊awo'u darotongnge.
Currently Selected:
PANDARIADDI 12: LAITLD
Highlight
Share
Copy
Want to have your highlights saved across all your devices? Sign up or sign in