PANDARIADDI 11
11
Candi su Babel
1Paarorone, manga walahanna su ahewallu runia tumba'u uatahuanna sasinaukka sambau wuṛṛu i mangitou mappaattu wisara apan uasul᷊ungnga. 2Napawe i mangitou mammal᷊intadda su samba'an da'i, i mangitou na'omate su sambau leta'a ratakke su Babilonia, ana see namanuate poiaroddi. 3I mangitou uahahattote sangkatou ringannu waine, “Wette i ite ma'ola'a tela wuassu leta'a wuṛṛu lal᷊o'annu ma'oman sara maattikka.” Etearoddi i mangitou uatahuanna manga watu ipa'ola'a wal᷊en wuṛṛu tere'a ipandetta. 4Unni mangitou, “Wette i ite mapararisikku soa ringannu sambau candi apan puidde maddatingngu langitta, tadea'u i ite tumelengnga wuṛṛu tawe massal᷊iawukka su ahewallu runia.”
5Ne Mawu sinumossokke ma'ellega soa wuṛṛu candi apan niapararisikku taumata. 6Ana see i Tou nabbisara, “I mangitou indi sambau walahanna ringannu sasinaukka sambau, wuṛṛu indi wakkute panattaṛṛannu manga ṛiinni mangitou. Tate mal᷊annu lai i mangitou wotongnge ma'ola'a walate apulu mangitou. 7Mappianne i ite sumossokke wuṛṛu manongkakku sasinaukki mangitou tadea'u i mangitou tate waṛṛun kasunanna.” 8Etearoddi Mawu nanal᷊iawukki mangitou su ahewallu runia. Ana see i mangitou nangillol᷊ote napararisikku soa udde. 9Ana waugu udde soa udde nissago Babel, ana waugu isudde Mawu nanongkakku sasinaukku anambon walahanna, wuṛṛu wua isudde i mangitou nisal᷊iawukku Mawu su ahewallu runia.
Papapulunni Sem
(1Ta. 1:24-27)
10Ete indi papapulunni i Sem. Rua tonna napawe manawangnga wahewalla nal᷊iudda, su tempo Sem uukke 100 su tonnane, i tou naasomba sangkatou ana'a esakka aranne i Arpakhsad. 11Wua'udde i tou ta'e nabbiakka 500 su tonnane lai, ana see naasomba al᷊arṛṛana'a waine.
12Su tempo udde i Arpakhsad uukke 35 su tonnane, i tou naasomba ana'a esakka aranne i Selah. 13Wua'udde i Arpakhsad ta'e nabbiakka 403 tonna lai, wuṛṛu naasomba al᷊aṛṛana'a waine.
14Su tempo i Selah 30 su tonnane, i tou naasomba ana'a esakka aranne i Eber. 15Wua'udde i Selah ta'e nabbiakka 403 su tonnane lai, wuṛṛu naasomba al᷊aṛṛana'a waine.
16Su tempo i Eber uukke 34 su tonnane, i tou naasomba ana'a esakka aranne i Peleg. 17Wua'udde i Eber ta'e nabbiakka 430 su tonnane lai, wuṛṛu naasomba al᷊aṛṛana'a waine.
18Su tempo udde i Peleg uukke 30 su tonnane, i tou naasomba ana'a esakka, aranne i Rehu. 19Wua'udde i Peleg ta'e nabbiakka 209 su tonnane lai, wuṛṛu naasomba al᷊aṛṛana'a waine.
20Su tempo udde i Rehu uukke 32 su tonnane, i tou naasomba ana'a esakka aranne i Serug. 21Wua'udde i Rehu ta'e nabbiakka 207 su tonnane lai wuṛṛu naasomba al᷊aṛṛana'a waine.
22Su tempo i Serug uukke 30 su tonnane, i tou naasomba ana'a esakka, aranne i Nahor. 23Wua'udde i Serug ta'e nabbiakka 200 su tonnane lai wuṛṛu naasomba al᷊aṛṛana'a waine.
24Su tempo i Nahor uukke 29 su tonnane, i tou naasomba ana'a esakka, aranne i Terah. 25Wua'udde i Nahor ta'e nabbiakka 119 su tonnane lai, wuṛṛu naasomba al᷊aṛṛana'a waine.
26Napawe i Terah uukke 70 su tonnane, i tou naasomba siri tallu ana'a esakka, eteudde i Abram, i Nahor wuṛṛu i Haran.
Papapulunni Terah
27Ete indi papapulunni Terah: i Terah iamangngi Abram, i Nahor wuṛṛu i Haran. I Haran pia sangkatou ana'a esakka aranne i Lot. 28I Haran nate su wanuane sassane, eteudde Ur su Babilonia, su tempo yamangnge ta'e wiakka. 29I Abram naawingngi Sarai, wuṛṛu i Nahor naawingngi Milka ana'i Haran wawine. I Haran ta'e pia ana'a esakka waine aranne i Yiska. 30Udde i Sarai tinna.
31I Terah nanantangngu soan Ur su Babilonia suadio'a ringanni Abram anangnge, i Lot pulunne, wuṛṛu i Sarai mananambone, eteudde awingngi Abram. I tou pia pandumma inai watukku wanua Kanaan. Arawe napawe na'omate su Haran, i mangitou namanua poiaroddi. 32Wuṛṛu ete su tampa udde i Terah nate su uukka 205 su tonnane.
Currently Selected:
PANDARIADDI 11: LAITLD
Highlight
Share
Copy
Want to have your highlights saved across all your devices? Sign up or sign in