PANDARIADDI 13
13
I Abram wuṛṛu i Lot nattal᷊ei
1I Abram nanantangngu Mesir wuṛṛu inaite watukku sawannakka, mattuddan watukku timukku Kanaan ringannu awingnge see lai al᷊awo'u darotongnge, wuṛṛu i Lot tinumantalongnga lai. 2I Abram alate atonna, i tou uatahuanna domba, ambingnga, sapi, see lai sal᷊a'a wuṛṛu wul᷊awanna. 3Ne i tou inaite wuassu tampa sambau watukku tampa waine, mattuda watukku Betel. I tou na'omate su leta'a su wallatu Betel wuṛṛu Ai, su tampa pia taṛṛinone suapa i tou dorone naddasanna 4wuṛṛu napararisikku mezbah. Isudde i tou massubba Mawu.
5I Lot lai uatahuanna amonanna wuṛṛu manga allangnga see lai domba, ambingnga wuṛṛu sapi. 6Ana waugu udde leta'a isudde tawe matiudda nannal᷊one atanaanni tarua, ana waugu winatangngi tarua tumaniten manambo. 7Ana see nariaddite pattatiakka su wallatu mallal᷊u'addi Abram wuṛṛu mallal᷊u'addi Lot. (Su tempo udde taumatan Kanaan wuṛṛu taumatan Feris ta'e uatana'a su leta'a udde).
8I Abram nabbisara si Lot, “Iaddua indi sangkatuṛṛangnga, dal᷊eo amungkangngu manga taumatanu wuṛṛu manga taumata'u uatatiakka. 9Ana waugu udde mappianne i ite mattal᷊ei. Pamilete wageangnge suapa wuassu leta'a indi apan ipaapulunu. Amungkangngu i'o inai su samba'a indi, ya'u sarun inai watukku tampa waine.”
10I Lot nanaile leta'a apan uapal᷊iwutta si tou wuṛṛu i tou naasilo manungku ahewallu Wawal᷊annu Yordan, maddatingngu soan Zoar manambo ua'ene, naal᷊ihidda Waillu Mawu ara'e naal᷊ihidda leta'u Mesir. (Etearoddi olangnge tantal᷊anna Mawu taambe naṛṛimunsa'a manga soan Sodom wuṛṛu Gomora.) 11Panginsueanne i Lot namile ahewallu Wawal᷊annu Yordan udde, ana see inaite watukku ra'i. Etearoddi ruan katou taumata udde natal᷊ei. 12I Abram sidutu uatana'a su leta'u Kanaan, arawe i Lot naddasanna su manga soa su wawal᷊anne naddatingngu maranin Sodom. 13Soa Sodom udde wawanuannu manga taumata apan tumaniten dal᷊eo wuṛṛu marosa su saruannu Mawu.
I Abram nangingkatta watukku Hebron
14Napawe i Lot inaite aroddi, Mawu nabbisara si Abram, “Wuassu tampa dararisiṛṛannu udde, pa'ellege paapia-pia su al᷊awo'u pi'une; 15i ya'u sarun mangonggolla si'o wuṛṛu su papulunnu ahewallu leta'a apan a'ellehannu udde tadea'u maola'a pussaanu saran mal᷊annu-l᷊annu. 16I Ya'u sarun mangonggolla si'o papapulunna apan tumanite manambo, ma'oman sara tawedu pia sangkatou apan botongnge maareengngi mangitou. Su ereapa taumata tawe maareengngu awu su leta'a, aroddi lai papapulunnu tawe iareengnga. 17Orassa indi, pal᷊intara'e ahewallu leta'a indi, ana waugu ya'u mangonggollu udde si'o.” 18Wua'udde i Abram nangingkattu rasanne ana see namanuate maranin manga punnu aaluanna pia taṛṛinone tampa patataṛṛamawuanna su Mamre maranin Hebron, wuṛṛu isudde i tou napararisikku mezbah su Mawu.
Currently Selected:
PANDARIADDI 13: LAITLD
Highlight
Share
Copy
Want to have your highlights saved across all your devices? Sign up or sign in
