YOHANES 21

I Yesus nutingkaandaghu watangeng-E su tumatuhu-E i sire pitu

1Bou e'e I Yesus nutingkaandaghu watangeng-E sau paghisa su manga tumatuhu-E su Rano Tiberias. E'e ko nariadi kere i'i: 2Pia su silou i Simon Petrus, i Tomas ko isigho si Ana hindua, i Natanael bou Kana su Galilea, manga ana i Zebedeus dang dingang i sire rua tumatuhu I Yesus kowal᷊inge nukomol᷊i. 3#Luk. 5:5I simon Petrus nuhabari si sire manga dingange kowal᷊inge, “Ia neng masasae maname kina.”

“I kami tumuhu,” Angkungi sire si sie. Kute nasasae i sire nusumake su sakaeng. Kateho sihuwi matiwatu e'e i sire ta nakasame sarang simbua. 4Su tempo matangutiti manita maburesi, I Yesus kararisi su apeng, kateho i sire mang ta nakakiral᷊a I Sie e'e ko I Yesus. 5I Yesus nangul᷊i si sire, “Manga ana, pia kina si kumu e'e?”

Nisimbahi sire “Takoae.”

6 # Luk. 5:6 I Yesus nangul᷊i si sire, “Piloko soma i kumu pai su kuaneng u sakaeng, i kumu sarung makaal᷊a kina.” Bou e'e soma e'e nipilo i sire tamai, arawe hinsangu kaul᷊ie kina su l᷊al᷊unge, hakiu i sire ta nakatanggung sau namol᷊eng.

7Tumatuhu ko ikindaghi I Yesus nangul᷊i si Petrus, “Mawu dara e'e!” Suapang i Simon Petrus nakaringihi himoneu dara e'e ko Mawu, i sie dingang nul᷊oho pakeange (watu'u i sie takoae pakeange) wuhue nutumumpa su ake. 8Manga tumatuhu-E kowal᷊inge nutumuhu tarai su sakaeng sarang rul᷊unge apiru kapamol᷊enge soma ko napene u kina. I sire ta tumaniu marau bou rul᷊unge, patehang kitangu manga mahasu su metere. 9Suapangi sire natumpa bou sakaeng, i sire nakawua tutuhiu putung su se'e dang pia kina dingang u boroti timbo-timbo su wawoe. 10I Yesus nangul᷊i si sire, “Kenang pumbawa mai kina manga pirang mbua ko wuhue naal᷊a si kumu.”

11I Simon Petrus nusumake su sakaeng, wuhue namol᷊eng soma sarang rul᷊unge. Soma e'e napene u kina ko l᷊al᷊abo; kaul᷊i e mahasu l᷊ima mpul᷊o tilu su wuange. Dang maneng kere kaul᷊ie, soma e'e mang ta naghehe. 12I Yesus nangul᷊i sire, “Maite mamura,” Takoae sarang manga singkatau bou manga tumatuhu-E ko wahani mukina, “Yamang i'i ko i sai?” Watu i sire matitong ko I Sie ko Mawu. 13Bou e'e I Yesus nusumandighi si sire, nangal᷊a boroti e'e, dingang nunggil᷊e u e'e si sire. Kere l᷊ai nikoa-E dingang kina e'e.

14Ii katilunge I Yesus nutingkaandaghu watangeng-E su manga tumatuhu-E suapangu I Sie nuwangung bou papate.

I Yesus dingang i Petrus

15Suapang i sire bou nukumang, I Yesus nangul᷊i si Simon Petrus, “Simon, ana i Yona, apa i kau kumindaghi u Ia mborong nangilebe bou i sire i'i kumindaghi u Ia?”

“Tingari, Mawu,” nisimbahi Petrus, “Mawu matitong ia kumindaghi u Mawu.”

I Yesus nangul᷊i si sie, “Tal᷊ungete manga ana u domba-Ku.”

16Su karuange I Yesus nukina si sie, “Simon ana i Yona, apa i kau kumindaghi u Ia?”

“Tingari, Mawu,” nisimbahi Petrus, “Mawu matitong ia kumindaghi u Mawu.”

I Yesus nangul᷊i si sie, “Tal᷊ungete manga domba-Ku.”

17Su katilunge I Yesus sau nukina si sie, “Simon ana i Yona, apa i kau kumindaghi u Ia?”

I Petrus nasusa naunge watu'u I Yesus seng pakatilu nukina si sie. Kuteu i Petrus sau nusimimbahi, “Mawu, Mawu matitong u kaul᷊iu patiku. Mawu matitong ia kumindaghi u Mawu!”

Bou e'e Yesus nangul᷊i si sie, “Tal᷊ungete manga domba-Ku. 18Mang nuhino didato-Ku i'i: Su tempo ngi kau Mborong mangkuda, i kau sisane ngu mangiki kal᷊uwaengu, dang l᷊umal᷊eng tumuhu kaou. Kateho boko i kau seng maghurang, i kau sarung manogoru l᷊imangu, dang taumata ko wal᷊inge mangiki i kau dang mamambing si kau sarang murating u manga apa ko ta i kaou.” 19(Ringangu manga didato e'e I Yesus mupakal᷊ahe u kirapa sarung i Petrus mate mupakawantughu Mawu Ruata.) Bou e'e I Yesus nangul᷊i si Petrus, “Tuhue si Sia!”

I Yesus dingang u manga tumatuhu-E kowal᷊inge

20 # Yoh. 13:25 Su tempo ngi Petrus nuwihu, i sie nakawua tumatuhu ko ikukindaghi I Yesus su l᷊ikure e. (Ko i sie tempo ngi sire kakange kukangiang su sindihangi Yesus dingang ko nukina si Sie, “Mawu, ko i sai musingking su Mawu?”) 21Nakawua si sie i Petrus dingang nukina si Yesus, “Mawu, kirapa ringangi sie i'i?”

22I Yesus nusumimbahi, “Boko ia mo i sie matatana wiahi sarang ia sumongo, e'e wal᷊inge hal᷊i u. Kateho i kau tuhute si Sia!”

23Kute nakeke habari su tal᷊oara u manga tumatuhu I Yesus uare tumatuhu e'e seng ta mate. Sumbal᷊i I Yesus ta nangul᷊iu tumatuhu e'e seng ta mate, kateho: “Boko Ia mo i sie matana Wiahi sarang Ia sumongo, e'e wal᷊inge hal᷊i u.”

24Tumatuhu e'e ko seng nangonggo u kasaksiang u manga hal᷊i ko seng nariadi i'i. Ko I Sie l᷊ai seng namohe u e'e. Dang i kite matitong himoneu apang ko seng niul᷊i e'e tingari.

Didato pangingsuenge

25Mborong maul᷊i l᷊ai hal᷊i ko seng nikoa I Yesus. Boko kaul᷊ie iwohe simbau-pusimbau, supundangku seng ta mukiong tampa su kal᷊abo u dunia i'i pul᷊urangengu apang buki ko sarung i wohe e'e.

Currently Selected:

YOHANES 21: LAISXN

Highlight

Copy